Moldeu a Rengum er a Ungil el Klausechelei
1. Ngera belkul a bo dodengelterir a rebetok el chad?
1 Kau ke melechesuar a kmes el deleuill el obengterir a rokui el mla metecholb el mesiungel a Jehovah? (Mk. 3:31-35) Ngkmal betok a techall el sebeched el kasisiich kid me a rudam me a rudos er kid er a uchei me a uriul er a miting. Ngkired el ousbech er tia el taem el mo medengelterir a rebetok el chad el oeak sel douetkeu er a rebeches el chad. Sel douchais aike el dilubech el mei er kid sel doldingel me a lechub a kuk bebil er a ungil el tekoi, e tiang a sebechel el mo uchul a omelisiich el mo er a rebebil.—1 Th. 5:11, 15.
2. (a) Ngera uchul me a rebebil a mengemedaol er a rediak el sioning el mo er a kldibel? (b) Ngera el ker a bo dosaod er tia el suobel?
2 Ungil el Klausechelei: A chad a diak el sebechel el merael el obengkel a Dios e osisiu el taem e ngobengterir a rechad er tia el mekngit e smecher el klechad el kongei aike el rokui el tekoi el louketui a Dios. A Biblia a mengelechel el kmo: “A mekngit el klausechelei a tomii a ungil blekeradel.” (1 Ko. 15:33) A rebebil el ngar er a ongdibel a locha mo sorir el mengemedaol er a rediak el sioning el chad el lodengelterir me a rechederir el diak el semeriar er a klemerang el mo er a kldibel, el omdasu el kmo tiang a sebechel el melisiich er tir el mo kongei er a klemerang. Nguaisei, engdi tia el tekoi ngolecholt a llomeserreng e oltirakl a Bades?
3. (a) Ngmekerang a doltirakl er a omellach el ngar er a 2 Korinth 6:14, 15 el kirel a kldibel? (b) Ngera sebechel el mo duubech a lsekum kid a mo er a kldibel el ngar er ngii a rechedad me a resechelid el tir a diak el Sioning?
3 Kede mla ngmai a omellach el kirel a bo dekerekikl er a deleuill er kid me a rechad er a beluu, me a rediak loumerang, me a redi chad. Ngera uchul me ngdiak el kired el teloi er tirke el chad el dirk melisiich a tekoi er tia el beluulechad e dirrek el dirkak bo el longull er a Jehovah? (2 Ko. 6:14, 15) A rebebil el diak el kerekikl er a deleuill er tir me a Dios, a mo obengterir a rechad el tir a dirk urrekodel er a uldasu me a teletael er tia el beluulechad, er a bai losiik a klausechelei el obengterir tirke el mla mukeroul el Kristiano, el tir a sebechir el ngosuterir el mo mesisiich el ngar er a klaumerang. Te diak lodengei el kmo a lobengterir a rechad er tia el beluulechad el diak el llechuul e ngsebechel el choitechetur a klaumerang er tir e tomelleterir.—Momekesiu er a 2 Thesalonika 3:14, 15.
4. Te rua techa el chad a kired el osiik a klausechelei er tir?
4 A chad el soal el oltaut er a klemerang a kirel el osiik er a resechelil el tir a blak a rengrir el mo er a Jehovah e dirrek el sebechir el ngosuir el mo merael el ngar er a klemerang e mo olengeriakl er a omesiungel el mo er a Dios. A resechelid me tirke el dekaodengei el chad a sebechir el ngar er ngii a lerellii er kid. Sei a uchul me ngrolel a llomeserreng a dosiik a klausechelei el obengterir a remeluu er a Dios el tir a melemolem er a kmes el deleuill er tir el obengkel a Jehovah!