A Remesiou el Kristiano a Kirir el Meluluuch
1. Ngera usbechall me bo el sebeched el churrengelii a omesiunged?
1 Ngdiak el sebeched el di kid el churrengelii a omesiunged. A Jehovah a omeskid a klisiich el mo meruul a ureor. (Fil. 4:13) Ngousbech er a rechanghel er ngii el ngosukid el mo metik er a rechad el ua sib. (Och. 14:6, 7) A Jehovah a ngike el uchul me a tane er a klemerang el dolalem e melubs a mukeroul. (1 Ko. 3:6, 9) Ngmera el klou a ultutelel el kirir a remesiou el Kristiano el mo ultuil er a Demad el ngar er a eanged el oeak a nglunguuch!
2. Ngera bebil er a tekoi el sebeched el meluluuch el kirel?
2 Kired: Ngkired el meluluuch er a bek el taem el bo doldingel. (Efe. 6:18) Ngera bebil er a tekoi el sebeched el meluluuch el kirel? Ngsebeched el meluluuch me bo el sebechel el ungil a osenged el kirel a basio el doldingel er ngii me a dirrek el kirel a blekeu el reng. (Rel. 4:29) Ngsebeched el olengit er a Jehovah me lomekrael er kid el mo er a remelemalt a rengrir el chad el sebeched el mesuub a Biblia el obengterir. A lsekum a chad er a blai a oker a ker, e ngsebeched el dulii a kedeb el nglunguuch el ngar er a rengud el lolengit er a Jehovah me lengesukid el mo ungil el onger. (Neh. 2:4) Ngdirrek el sebeched el olengit er a llomeserreng el mo merruul er a omesiunged me ngmelemolem el kot el tekoi er a klengar er kid. (Jak. 1:5) A Jehovah a dirrek el dmeu a rengul sel doreng a sulel el kirel a techall el dobang el mesiou er ngii.—Kol. 3:15.
3. A nglunguuch el kirir a rebebil ngmekerang a lekilungii a ureor er a berkel a klumech?
3 Kirir a Rebebil: Ngdirrek el kired el “meluluuch el kirel a tang ma ta[ng],” e omasech a ngklir a rekldemed a lungilbesul. (Jak. 5:16; Rel. 12:5) A chelitechetul a bedengem ngmeluk er a klungel a sebechem el meruul er ngii er a berkel a klumech? A leuaisei e moluluuch el kirir a rekldemem el mesisiich a bedengir. Bo lulterekokl a rengum el kmo a nglunguchem a ngar er ngii a lerellii er a rebebil! Ngdirrek el ungil a doluluuch me a rulab a dereder lak bo lomtok er tia el urered er a berkel a klumech, me a rudam er kid “[le]kiei el chelellakl el ngara budech.”—1 Ti. 2:1, 2.
4. Ngera me ngkired el blechoel el meluluuch?
4 A berkel tia el ungil el chais er a beluulechad el rokir a kmal klou el ngerachel. Engdi a “[de]blechoel meluluuch,” e ngmo sebeched el kutmeklii tia el ureor el oeak a ngelsuil a Jehovah.—Rom 12:12.