A Ureor el Meskid a Klou el Deurreng
1. Ngera el ureor el olengeseu er a rebebil el mo medengelii a Jehovah a ngar er ngii er chelecha el taem?
1 Ngkmal mle dmeu a rengrir tirke el ulemes er a rechad el mlo ungil er a rektir er a kot el dart el rak. (Lk. 5:24-26) Chelecha el taem er kid, e kede oldeu a rengud er tia el ureor el olengeseu er a rebebil el mo medengelii a Jehovah. (Och. 22:1, 2, 17) Ngmera el uchul a deurreng sel donguiu a tekoi el mla duubech el lochotii el kmo a Tekingel a Jehovah me a oureor el klisichel a mla ngmodech a klengar er a rederta el chad! Engdi a lmuut el klou el deurreng a mo er ngii sel doruul er tia el ureor el loeak a dosuub a Biblia el obengkel a chad el olengeriakl er a omesubel.
2. Ngera el deurreng a sebeched el mo obang sel dosisecheklii a chad a klemerang?
2 Ngtechang a ngklel a Dios? Ngera uchul me ngomechei a ringel me ngngar er ngii? Ngerang mo meruul a Rengedel a Dios el kirel a klechad? Ngdiak di bo dolechesuar a deurreng sel sekum kede onger a chouaisei el ker e kede dirrek el mo melechesuar er ngii sel desa deurreng er a medal a chad sel lesubii a klemerang. (Osi. 15:23; Lk. 24:32) A chad el mesuub a Biblia sel bo lolengeriakl er a omesubel, e ngsebechel el omuchel el ousbech er a ngklel a Jehovah sel loluluuch, e ngmodech a teletelel a loubail me a longetmokl er ngii, e chemoit a mekngit el blekerdelel, e omuchel el omerk er a klumech el mo er a rebebil. Me sel lolengeriakl e lerellii a telbilel a rengul e bo lemetecholb, e seikid e ngmo ta er a odam er kid e kldemed er a ureor. A derta er aike el ungil el bakes a meskid a uchul e ngsebeched el oldeu a rengud.—1 Th. 2:19, 20.
3. Ngera el bakes a kired el melai me bo el sebeched el omuchel a omesubel a Biblia el obengkel a chad?
3 Ngsebechem el Mo Teloi er Ngii? A lsekum e ngsoam el mo teloi er tia el kot el uchul a deurreng el ureor, e molengit er a Jehovah el kirel a techall el mo sebechem el mesuub a Biblia el obengterir a rebebil, e sola e moureor el oltirakl er a nglunguchem. (1 Jn. 5:14) Moldingel er a basio me a taem el sebechem el metik er a rechad. Mousbech a bek el techall el mo omuchel a omesubel a Biblia el obengterir a rechad. (Oli. 11:6) Sel obetik er a chad el semeriar e mdelemii a tane er a klemerang er a rengul, e mluut el mong el mo melubs er ngii.—1 Ko. 3:6-9.
4. Ngera uchul me ngkired el omuchel a omesubel a Biblia el obengterir a rechad el oba uldasu el kmo ngorechudel a taem?
4 Te kmal dirk betok a rechad el songerenger e meched a rengrir el kirel a llemalt. Ngtechang a mo ngosuterir el mo medengei a lmuut el betok el kirel a Jehovah el loeak a losuub a Biblia el obengterir? (Mt. 5:3, 6) Bo dekengei el tongetengii a klengar er kid el mo olengeseu el churrengelii tia el ureor er a berkel a klumech me a omeruul el disaiplo er a uchei er a bo el merek a sim.—Isa. 6:8.