A Rengelekem Te Mla Mo Ungil el Kltmokl?
1. Ngera uchul me ngkirir a rengalek er a skuul el mo ungil el kltmokl?
1 Ngdi kmedu el mo sisebel a skuul. Me a rengelekem a ulterekokl el kuk mo chelebangel a beches el omelsemai me a orimel. Te dirrek el oba kmal ileakl el techall el mo ‘olecholt a klemerang.’ (Jn. 18:37) Me a leuaisei e te mla mo kltmokl?
2. Ngera el tekoi a kirir a rengelekiu el mo medengei me bo el ungil el kltmokl?
2 Ngmla mo bleketakl er a rengrir a rengelekem el kmo ngera belkul a deteloi a omengedaol er aike el chedaol el sils er a beluulechad me sel uchul me ngmekngit a deteloi er ngii? Te mla mo ungil el kltmokl el kirel a orimel el bo lechelebangel el kirel a mo er a ngarbab el skuul, me a tekoi er a klasisiik, me a dirrek el usbechel a rrom me a mekngit el kar? Te di mo melekoi el kmo ngmekngit er a klechelid er tir, me a lechub e te meduch el smodii a klaumerang er tir? —1 Pe. 3:15.
3. Ngmekerang e mo sebechir a ruungalek el ousbech er a Temel a Omengull el Ongalek el mo ungil el kutmeklterir a rengelekir?
3 A Usbechel a Temel a Omengull el Ongalek: Ko multerekokl el blechoel el mesaod a beches el tekoi el obengterir a rengelekiu er sel temel a skuul. Sel bo mkerekikl el mesaod a tekoi el kirel a skuul er a uchei er a sisebel a skuul e ngsebechel el oterekokl a rengrir me a uldesuir a rengelekiu. Ngera uchul me ngdiak mousbech er sel Temel a Omengull el Ongalek el meruul er tia el tekoi? Ngsebechem el oker er a rengelekem el kirel aike el tekoi el ngii a sebechel el mo meringel er tir sel lebo el siseb a skuul. A tekoi el mulsaod er aika el mereko el rak a sebechiu el omelekl er chelechang el kuk bla el nguu a ta er a dauch er a klengar e le mukeroul a klemedengei er tir. (Psa. 119:95) Ngsebechiu el melasem aika el tekoi el kau a sebechem el rullau el leko ke sensei, counselor, me a lechub e ke ta er a ngalek er a skuul. Mosisecheklterir a rengelekiu el mo meduch el ousbech er a Biblia el onger a ker. A ta el oungalek el chad a uluusbech er tia el omelasem el kutmeklterir a rengelekel el mo meduch el mengedecheduch er tirke el beches el sensei er tir er a bek el sisebel a skuul, e dirrek el ouchais er tir el kmo te Sioning er a Jehovah.
4. Ngera te mo meruul er ngii a remellomes a rengrir el oungalek el chad?
4 Aike el omelsemai el lechelebangel a rengeasek el Kristiano er aika el uriul el sils a di merael mo meringel. (2 Ti. 3:1) A remellomes a rengrir el oungalek el chad a melasem el olisechakl er a rengelekir el mo meduch el oltngakl a orimel er a uchei er a ledubech. (Osi. 22:3) Me a uchei er a sisebel a skuul e mngesuterir a rengelekiu el mo ungil el kltmokl el kirel aika el tekoi.