Bo Luldalem e Lungil a Omelik er Kau
1. Ngera ngmesaod er ngii a Kot el Korinth 9:26 el kirel a omesiunged?
1 A apostol el Paulus a milluches el kmo: “Misei e ngak a diak krurt el ua lak lulterekokl a kbedul ngii, el diak kulik el ua kulik a eolt.” (1 Ko. 9:26) A Paulus a milsaod el kirel a otutel a turrekong er ngii me bo el sebechel el churrengelii a omesiungel el mo er a Jehovah. Me nguaisei, engdi a omellach el denguu er tiang a dirrek el sebeched el oltaut er ngii er a omesiunged. Ngsoad a bo luldalem e lungil a ‘omelik’ er kid me a lechub a tekoi el doruul, me bo el sebeched el kutmeklii a ungil el ureor el kirel a omesiou. El oeak a ngera el rolel?
2. Kede mekerang e oukerebai er a Paulus me tirke el ulemerk er a klumech er a kot el dart el rak sel dolilt er a taem me a basio el domerk er a klumech er ngii?
2 Bo er Aike el Basio el Lengar er Ngii a Rechad: A Paulus me a rebebil el ulemerk a klumech er a kot el dart el rak a uleldingel er aike el basio el ble lodengei el kmo te ngar er ngii a rechad er ngii. (Rel. 5:42; 16:13; 17:17) Me a lsekum e kede mtebengii el kmo ngar er a territory er kid e a rechad a oumesingd el ngar er a blai sel lekebesengei, e ngbai ungil a bo doldingel a obliil er seikid el taem. Ngoingerang e ngmeseked a stoang? Ngungil a domerk er a klumech er aika el basio er sel taem el lemeseked.
3. Ngoeak a ngera el rolel e ngsebechel el luldalem e ungil a omelik er kid sel domerk er a klumech er a territory er kid?
3 Bo Mungil el Kutmeklii a Ureor er a Basio el Moldingel er Ngii: Ngdirrek el kired el mo kerekikl me bo luldalem e lungil a omelik er kid sel domerk er a klumech er a territory er kid. El uaitiang, ngungil a bo lekesai a rechad el mo er a ta el basio er a bai ledak el betok el mo er a osisiu el basio, me bo el sebechel el ultebechel e lungil el merael a ureor. Me ngdi osisiu, sel doureor er aike el cheroid el territory, e ngsebeched el mereched el rokir a territory er kid, e dirrek el mo er ngii a klou el techellir a rebek el chad el mengedecheduch a lsekum e kede di mekesai. Me kid, ngsebeched el nguu a territory er kid el di kmeed er a blid me lsebeched el diak dongoit er a klou el taem el omekall el mo er a ta er a basio?
4. Ngera el tekoi a sebechel el ngosukid el mo meduch el ‘mengesokes rar chad’?
4 A Jesus a ulemekesiu er a rumerk er a klumech el ua rechad el ‘mengesokes rar chad.’ (Mk. 1:17) A moktek er a chad er a omenged a diak di lomerk er a kesekesel e lemerekong, e ngbai merkii a kesekesel me bo el sebechel el kosokes a ngikel. Me a meduch el chad er a omenged a mo er a basio el blil a ngikel er sel ungil el temel, e omuchel el mengesokes a ngikel. Nguaisei, te kerekikl e blak a rengrir el ousbech a duch er tir. Me kid a dirrek el ungil a bo doruul er a osisiu el tekoi el mo blak a rengud el churrengelii a omesiunged.—Heb. 6:11.