“Bo Le Betik a Rengmiu er a Re Chedal a Dios el Mdak el Oumerang”

Aika el tekoi a milluches er a bekord el eru el telael el rak er a mla me mong. (1 Pe. 2:17) Engdi ngkmal kired el mo oltaut er chelecha el taem! Ngmekerang e sebeched el mo betik a rengud er a klodam er kid er a beluulechad el rokir? E mekerang e sebeched el kerekikl me lolemolem tia el bltkil a rengud alta kede ngar tia el diak a bltikerreng er ngii el beluulechad? (Mt. 24:12) Molasem el osiik a nger er aika el ker el oeak a omomes er a video el Our Whole Association of Brothers.

(1) Ngoingerang e kede mlo teloi er tia el klodam er kid a Rekristiano? (2) Ngerang a edei el osisiu el tekoi el doruul er a chelsel a klodam er kid el meliuekl er a beluulechad? (3) Te mekerang a rudam er kid e olecholt er a blakerreng er tir el omerk er a klumech el ngar er a (a) ked er a Alaska, (b) olekerodel er a diall, me a (c) chereomel er a Peru? (4) Ngera me ngdiak el kired el mo omdasu el kmo a berkel a klumech a kuk di ta er a ureor? (5) Mouchais a bebil er a olechotel a kmo te mekerang a Resioning er a Jehovah e kasisiich e chachelaod er a delongelir er a (a) uriul er a desiu, (b) uriul er a typhoon, me a (c) temel a mekemad er a delongelir a rechad er a chimo el beluu? (6) Ngoeak a ngera el rolel e ngsebeched el rokui el mo olecholt er tia el olengchelel a klodam er kid a Rekristiano? (Jn. 13:35) (7) Ngerang a klungiolel sel dedak el oureor el omekedechor a blil a ongdibel er kid? (8) Te milekerang a rudam er kid el ngar er a Eastern Europe me a Russia e melemolem el kmeed er a Jehovah alta ngdimlak el sebechir el omerk er a klumech? (9) Ngera el ileakl el tekoi a loruul a Resioning me bo el sebechir el mo er aike el meklou el ongdibel, e ngera uchul? (10) Ngmekera tia el video e mla smisichau el mo blak a rengum el (a) mengull er a Jehovah el ngar er aike el miting er a Rekristiano el obengterir a rudam er kau, (b) mo olengeseu er a rechad sel lengar er ngii a chelebuul, e (c) mo blak a rengum el omerk er a klumech er a ngii di el taem me a ngii di el rolel? (11) Ngoeak a ngera el rolel e oingerang e ngsebeched el ousbech er tia el video el ngar er a omesiunged?

A bltkil a rengud er a Jehovah a uchul me kede teloi er tia el klodam er kid el meliuekl er a beluulechad. Me ngmera el soad el mo mesuub el kirel e ouchais er a rechad el kirel. Ngdirrek el betik a rengud er a rechad el Jehovah a betik a rengul er tir. Sel dolengeseu er tir sel lebo er ngii a chelebuul, e ngdiak domdasu el kmo a Dios a mo mereng a suled. Kede bai mereng a sulel e le kede omes er tia el klodam er kid el ua lemekreos el sengk el mla er ngii el mei er kid. Me chelecha el lorael el mocha ulebongel er tia el diak a bltikerreng er ngii el beluulechad, e me dolemolem el olecholt a bltikerreng el mo er a klodam er kid er a beluulechad el rokir.