Ngungil Ak Bo er a Kemeldiil?

1. (a) Ngera el meringel el omelilt a bo dechelebangel er ngii, e ngera el tekoi a kmal kired el melatk er ngii? (b) Ngera el ker a kired el di kid el oker er kid?

¹ Ngsebechel el mo meringel er kid sel dolilt el kmo kede mo er a kemeldillel a chad el diak el ngar er a klemerang me a lechub e ngdiak. Kid el soad el melilt a tekoi el odeuir a rengul a Jehovah a uchul me ngungil a di lekid el oker er kid el kmo: ‘A Jehovah ngsoal a bo kuruul a ngerang? Ngera el omellach er a Biblia a kirel el omekrael er a uldesuek? Ngmekerang e sebechel el melemolem el ungil a ukltkek e diak bo kuruul a tekoi el mo uchul a telemellel a klaumerang er ngak me a rebebil?’

2. (a) A lsekum e a siukang er a kemeldiil a melisiich klsuul el osisechakl, e ngkirel el mo ua ngerang a osenged er ngii? (b) Ngera el tekoi a sebechel el mo duubech a dengar er a delongelir a rechad el meruul er ngii?

² Molatk a Omellach er a Biblia: A ta er a omellach er a Biblia el melutk el kirel tiang a debetik er ngii er a 2 Korinth 6:​14-18. A 17 el kekerei el bades a kmo: “Ma Dios a melekoi el kmo, ‘Mcheridemiu er tir, e mngeseklemiu er tir. Lak mongesechusem er kemiu.’ ” Me a leuaisei, e ngdiak el kired el teloi a ngii di el siukang er a kemeldiil el chelsechusem er a klsuul el osisechakl el kmo a rulekoad a ngar er ngii a lerellii er tirke el dirk ngar. Me a lsekum e kede melatk el mo er a kemeldiil, e ngungil a di lekid el oker el kmo, ‘A lsekum e ak dengchokl el iliuekl er a rechad el meruul a tekoi er a klsuul el klechelid, e ngmo meringel er ngak el diak bo kubengterir el meruul aika el tekoi?’ A lsekum ngmo mekngit a rengud e mocha teloi aika el klsuul el omeruul e kede mla tomellii a blakerreng er kid el mo er a Jehovah el Dios, e tiang a tekoi el kmal diak domdasu el mo meruul er ngii. A lsekum e kede mo er a kemeldiil, e ngklou a ultutelel a doterekokl a rengud el kmo ngdiak bo deteloi a ngii di el ngerang el oltuub er a Jehovah.

3. Ngera el tekoi a kired el melatk me lak bo dolibas er a rebebil?

³ A ongeru el omellach er a Biblia a sebeched el metik er ngii er a 1 Korinth 10:​32: “Bo mkerekikl me lak le bor ngii a mekngit el blekerdeliu er mederir a re chad er a Judea ma re Chisentael, ma lechub a ikelesia er a Dios.” E kuk mekerang a lsekum e kede mle teloi er a siukang er a kemeldiil el diak el mekngit engdi a rebebil a omdasu el kmo tiang a uldimukl er a dakt er a rulekoad? A tekoi el doruul ngsebechel el melibas er tirke el medengei aike el loumerang e lolisechakl a Resioning er a Jehovah el kirir a rulekoad? A debo er tia el kemeldiil e ngtomellii a ukltkir a rechad er a ongdibel me a lechub a rechad er a beluu? Me nguaisei, engdi ngsebeched el melibas er a rechad er a beluu a lsekum e ngdiak debo er a kemeldillel a chedad?​​—Mt. 18:​6; 1 Ko. 8:​12, 13.

4. Ngera uchul me ngklou a ultutelel a lungil a ukltked er medal a Jehovah?

⁴ A ongedei el omellach a ngar er a Rom 14:​22, 23, el melekoi el kmo: “Ng ngeltengat ngikel chad el diak bo louedikel a rengul, sel loruul er a lodengelii el kmo ng ungil.” Ngkirem el mo kerekikl el merriter el kmo a tekoi bo molilt er ngii ngera ngrullii er a ukltkem.

5. (a) Ngtechang a kirel el melilt el kmo kede mo er a kemeldillel a chad el diak el ngar er a klemerang me a lechub e ngdiak? (b) Ngmekerang e sebeched el melilt a melemalt el tekoi?

⁵ Ngerechelem: A uriul er a doluluuch e dolebedebek aike el omellach er a Biblia, el ua aike el mildung er bab, e a derta el Kristiano a kirir el di tir el melilt el kmo te mo er a kemeldiil me a lechub e ngdiak, alta tia el kemeldiil a mo er ngii er a ikelesia, blil a chad me a lechub e ngbasio er a debull. (Gal. 6:​5) A derta el Kristiano a ngerechelir el merriter er a tekoi e kongei aike el tekoi el mo duubech er a uriul er a lengiltii sel bo loruul er ngii. (Rom 14:​12) A siukang er a rechad a sebechel el mo uchul a betok el tekoi el mo mengeuid er kid. Engdi a ukltked el mla mosisechakl er a Tekingel a Dios a mo ngosukid el melilt a melemalt el tekoi.​​—Psa. 119:​105.