Bo Dungil el Olisechakl er Tirke el Mesuub a Biblia
1. Ngera el ngerachel a lolab a re publisher el lolisechakl a Biblia?
1 Ngdiak a chad el sebechel el mesiou er a Dios a lak el Jehovah a “mekrolii.” (Jn. 6:44) Me nguaisei, engdi a re publisher el olisechakl er tirke el mesuub a Biblia a kirir el meruul er a ngerechelir el olengeseu er a rechad el mo kmeed er a Demerir el ngar er a eanged. (Jak. 4:8) E tiang a kirel el ousbech er a omengetmokl. A di donguiu a derta el parakurab e doker a llechukl el ker a diak di el tiaikid e lungiang el ngosuterir el mo ungil el medengelii e lenguu tia el ungil chais me bo el sebechir el olengeriakl.
2. Ngera ngkutmeklii a ungil el omesubel a Biblia?
2 A bo el sebeched el ungil osisecheklterir tirke el mesuub a Biblia, e ngkirel a publisher el ngosuir a chad el losuub el obengkel el mo (1) medengei aike el lolisechakl a Biblia, (2) kongei aike el lolisechakl a Biblia, e (3) oltaut er a klengar er ngii aike el lolisechakl a Biblia. (Jn. 3:16; 17:3; Jak. 2:26) Ngsebechel el mo melai a buil el momekrael er a chad el mo medengei aika el ungil dauch er a omesubel a Biblia. Nguaisei, engdi a derta er aika el dauch a ochotii el kmo ngkirel ker er a rolel a loleketek er a delongelel ngii me a Jehovah me a telbilel a rengul el mo er ngii.
3. Ngera uchul me a rungil el sensei a oker a ker el mo medengei a uldesuir a rechad?
3 Ngera Ngomdasu er Ngii Ngike el Mesuub a Biblia?: A lsekum ngsoam el mo medengei el kmo a chad el mosuub a Biblia el obengkel a ungil medengei a tekoi el losuub e kongei, e mngesuir el mo sebechel el melekoi a ngar er a uldesuel e kau bai mongeroid er kau er a rokui el omesaod. (Jak. 1:19) Ngungil medengei a lolekoi a Biblia el kirel a suobel el mosuub er ngii? Ngsebechel el di ngii el mesaod er tia el suobel el olab a di tekingel? Ngua ngera uldesuel el kirel aike el suobel el bla lesuub? Ngoumerang el kmo aike el lolisechakl a Biblia a melemalt? (1 Th. 2:13) Ngmedengei el kmo aike el suobel el losuub a kirel el ngar er ngii a lengedechii er a rolel a klengar er ngii? (Kol. 3:10) A lsekum ngsoad el mo medengei a nger er aika el ker, e ngkired el okiu a delemedemek e oker a ker el mo medengelii a uldesuel, e orrenges a tekoi el lolekoi.—Mt. 16:13-16.
4. Kede mo mekerang a lsekum a chad el mesuub a meringel er ngii el mo medengei me a lechub e ngoltaut aike el tekoi el losuub er a Biblia?
4 A blekeradel el bla bo desau el meruul me a rolel a domdasu a tekoi a delalem er a chelsed me kede ousbech er a klou el taem el mo melodech. (2 Ko. 10:5) E kuk mekerang a lsekum ngike el chad el dosuub el obengkel a diak el kengei me a lechub e loltaut a tekoi el losuub? A kllourreng a usbechall me bo el sebechel a ungil a klemengetel el taem el kirel a Tekingel a Dios me a chedaol reng el mo oureor er a rengul a chad el mesuub. (1 Ko. 3:6, 7; Heb. 4:12) Me ngblechoel el ungil a kuk bo dosaod er a ta er a suobel a lsekum ngike el mesuub a meringel er ngii el mo medengei me a lechub e ngoltaut a osisechakl er a Biblia er a bai dorrimel er ngii. Me a dolemolem el olecholt a kllourreng me a bltikerreng sel dolisechakl er ngii er a Biblia, e a cherengel a taem e ngmo sebechel el melodech a blekerdelel.