Kau, Ngngar Ngii a Klaumerang er Kau?

A bo dodeuir a rengul a Jehovah e ngkirel ngar ngii a klaumerang er kid. Me nguaisei engdi Biblia melekoi el kmo “ngdiak le rokuil chad a ngarngii a kloumera er tir.” (2 Th. 3:​2, BT) A apostol Paulus er a lolekoi el uaisei e ngmilsaod el kirir a re “chaitituokel a rengrir el mekngit el chad” el uleldechelakl er ngii. Engdi aika el tekingel el kirel a klaumerang a ngar ngii a lmuut el klou el belkul. A rebebil er a rechad olechib osengir er aike el bleketakl el olechotel a kmo ngngar ngii a Dios el Ulemeob. (Rom 1:20) A rekuk bebil a kmo te oumerang el kmo ngar ngii a lmuut el mesisiich el klisiich. Engdi te ousbech er a lmuut el klou el klaumerang el mo odeuir a rengul a Jehovah.

Ngkirel mo ulterekokl a rengud el kmo ngngar ngii a Jehovah e ngii omesterir omeksulir tirke el ngar ngii a mera el klaumerang er tir. (Heb. 11:6) A klaumerang a ta er a rodech er a chedaol reng. E a denguu a chedaol reng e ngkired el meluluuch el mora Jehovah el lolengit er ngii. (Lk. 11:​9, 10, 13) A dirrek el ta er a klou a ultutelel el rolel e kede nguu a chedaol reng a sel donguiu er a mlukreng el Tekingel a Dios. E seikid e ngmo sebeched el melebedebek aike el donguiu e oltaut. A chedaol reng er a Jehovah sebechel omekrael er a klengar er kid e ngosukid el mo nguu a klaumerang el odeuir a rengul.