A Rengeasek a Oker

Ngak a Kuusbech a Cell Phone?

A cell phone a kmal mla mo merael a chisel er a betok el beluu. Ngrullii el mo beot er kid el meruul a tekoi. A resechelid me a rechad er a blid a di sebechir el omekedong er kid er a ngii di el taem, er a ngii di el basio, me kid me ngsebeched el omekedong er tir. A bebil er aika el klalo a sebeched el meluches a mekedeb el tekoi er ngii e oldurokl, e a simbung el The Times er a beluu er a London a kmo: “Tiang a kot el beches el rolel a cheldecheduch el lousbech er ngii a remekekerei el chad el chadecheduch er a delongelir.” Ngdirrek el ngar ngii a cell phone el sebechel el omuked er a internet me ngsebechem el ousbech er ngii el mo er a Website me a dirrek el E-mail.

Nglocha ngar ngii a kloklem me a lechub e ke melatk el mo omechar er a kloklem. Me ngdi ungil, engdi lak mobes el kmo: “Ngngar ngii a eru el tekoi el kired el melatk.” Ngngar ngii a klungiolel a cell phone. Engdi ngungil a omolatk el kmo, a lsekum e ke mo mecherar, e a klemedengei er kau er a telemellel a sebechel el ngosukau el ousbech er ngii el ngar er a ungil el rolel.

‘Momekbuk a Cheral’

A Jesus a dilu el kmo a chad a kirel el ungil “lomekbuk a cheral” a klalo er a uchei er a loruul er a klou el tekoi. (Lk. 14:​28) Me tia el ulekrael ngungil el kirel a ocheral a cell phone? Chochoi. Nglocha sebechem el mecherar a cell phone el di beot a cheral, me a lechub e ke nguu el di tada. Engdi a lak mkerekikl, e ngsebechem el mo mengoit er a klou el udoud el di omechar a Airtime. E tiang a sebechel el oremelau el mo omechar a lmuut el bebil er a service er a cell phone, e mo soam el omechar er a lmuut el meringel a cheral el cell phone. A Hiroshi a kmo: “Ak kuureor el part time e mengudel a ududek me bo el sebechek el omechar a beches el dengua er a bek el rak.” E a rebetok el ngeasek a meruul er a osisiu el tekoi.

Mo lmuut me a lsekum a rechad er a blim a kongei el omechar a airtime er kau, me ngdirk klou a ultutelel el kirem el mo medengelii a klungel a udoud el mechoit el kirel. A ta el Kristiano el oldingel a ongdibel er a beluu er a Siabal a mtebengii el kmo: “A rebebil el chedil a kongei el mo betok a urerir me bo el sebechir el mengkad a blsel a cell phone er a rengelekir, e ngii el omeruul a di ungilbesul a lak el ngar ngii.” Me kemiu el ngeasek a ulterekokl el diak el somiu el omekberaod er a rechad er a blimiu!

Ngosur a Klou el Temed

A rebetok el chad el ulemuchel el ousbech a cell phone a mla mo medengei el kmo ngkmal ngosur a klou el temir, me ngmo diak el sebechir el remuul a meklou a ultutelel el tekoi. A Mika el mle blechoel el teloi er a rechad er a blil el omesoil e chadecheduch a kmo: “Chelechang, e sel ki bo merek el omengur e aki mo chemur a cell phone er kemam e mo kebii el mo er a delemerab er kemam.”

A simbung er a beluu er a London el The Guardian a kmo: “A edeitiud er a rengeasek el rekrir a ngar er a delongelel a 16 el mo er a 20 a bai kongei el loutext er a bai longedecheduch el lokiu a kuk ta er a rolel. A omeluches el text a beot a cheral er a dongedecheduch a dengua, engdi ngngosur a klou el temed el meluches er ngii. A Mieko a kmo: “A lsekum a chad a meluches el kmo ‘me a klukuk,’ e ak meluches el kmo ‘me a klukuk.’ E seikid e ngomuchel a omeluches el text el engelakl er a ta el sikang, el di chelsengsang el cheldecheduch.”

A rebetok el ousbech a cell phone a locha mo mechas a rengrir a lsekum te mo odekdak aike el taem el ousbech a dengua er tir er a chelsel a ta el buil. A 19 a rekil el redil el Teija a kmo: “Ngar er a osengir a rebetok e te kongei el kmo a cell phone a ngosur a klou el taem.” Me a lsekum e ngkmal kirem el ngar ngii a dengua er kau, e ngklou a ultutelel el mkerekikl el melatk aike el taem el mousbech er tia el klalo.

A ngeasek el dil el Kristiano el Marja a kmo: “Ngar er aike el meklou el ongdibel er kid e a rebetok el mekekerei el chad a outext er a delongelir. Tiang a kmal ngar ngii el omeruul er chelecha el taem!” Me a osisiu el blekeradel a bla lutebengii er a delongelir a rengeasek el Kristiano er sel taem el loldingel a obliil. A Biblia a mengelechel er a Rekristiano el mo ungil el ousbech er a techellir el meruul er a omesiungir. (Efe. 5:16) Me ngkmal klengiterreng sel domes er tir el mengoit er a mekreos el temir el di mengedecheduch aika el dengua!

Berrotel el Cheldecheduch

A Marie a mesaod er a ta er a telemellel aika el klalo el kmo: “Tia el rolel a cheldecheduch el di melemalt el mo er a ta el chad, el diak el mei er a blai, a ngar er ngii a letemellii e le rechad er a blil a ngalek a diak lodengei el kmo ngousbech er a dengua me a lechub e ngmengedecheduch er a techang.” A rebebil el ngeasek a ousbech aika el dengua el meleketek a berrotel el deleuill er tir me a resechal me a lechub e te redil. E ngar ngii a remlo diak el kerekikl me te mlo meruul a tekoi el lodengei el kmo ngdiak el sebechir el meruul sel lomes er tir a rechad. Ngmilekerang e mo uaisei?

A simbung er a London el The Daily Telegraph a kmo: “A text message a rullii me ngdiak el sebeched el mo medengei aike el tekoi el loruul a [rengeasek.] Me ngkmal ngar ngii a lerellii er kau sel lak mesang me a lechub e mrengesii ngike el tang. A Timo a kmo: “A rebebil a omdasu el kmo a text message a ungil el rolel a cheldecheduch. Me ngoeak aika el text message e ngsebechir el meluches a ngii di el tekoi el ngii a meringel er tir el melekoi er sel taem el lechelebangel er a chad.”

A 17 a rekil el Kristiano el Keiko er a lekot el mo er ngii a cell phone er ngii, e ngulechotii a number er ngii el mo er a rebetok el sechelil. Ngdi mle telkib el taem e ngmocha omuchel el outext er a bek el sils el mo er a ta el sechal er a ongdibel er ngii. Ngkmo: “A kot e aki ulemuchel el keluches el mesaod a tekoi er a bek el sils, e sola e mocha mesaod a mondai er a klengar er kemam. Aki rirellii a ileakl el deleuill er kemam el ousbech aika el cell phone.”

Ngmlo dmeu a rengul er a lenguu a ngeso er a rechad er a blil me a remechuodel el Kristiano er a uchei er a lebo el klou el tekoi. Ngdilu el kmo: “A uchei er a lebeskak a cell phone er ngak, e a rechad er a blik a ulemeklatk el kirel a omeluches el text message el obengkel a sechal, engdi ngak a di mle bek el sils el kuluches el mo er ngii. E tiang a dimlak el ungil el rolel a usbechellek er tia el klalo.”

A Biblia a mengelechel er kid el mo ‘klikiid [a] ukltked.’ (1 Pe 3:16) Me ngbelkul a kmo sel mousbech a cell phone, e ngkirel el diak bo luchul e bo merur el mo lmuut er a taem el sebechel a chad el omes me a lechub e ngremenges a tekingem. Bo blechoel el melatk el kmo ngdiak a ta el tekoi el sebechel el obart er a osengel a Demad el ngar er a eanged. A Biblia a mesaod el kmo: “E diak a tara bleob el diak bo le cholt er medal a Dios, ma rokuil tekoi a di diak le delekedokel el ulecholt er medal, me ngkired el mesaod er kid er ngii. (Heb. 4:13) Me a lmuut el tang, ngera uchul me ngsoam el melemolem el ngar ngii a berrotel el deleuill er kau me a ta er a chad?

Moterekokl a Temel me a Usbechellel

A lsekum e ke melatk el mo omechar er a cell phone er kau, e ngungil el bo morriter el kmo ke mera el ousbech er ngii me a lechub e ngdiak. Mosaod er ngii el obengterir a rechad er a blim. A rebebil a di ua uldesuel a ngeasek el Jenna el kmo: “A rengeasek a dirkak bo el bekongerachel me ngdiak el sebechir el ousbech a cell phone.”

Mo lmuut er a taem el molatk el mo er ngii a cell phone er kau, me ngdirk klou a ultutelel el mkerekikl sel mousbech er ngii. El mekerang? Moterekokl a temel me a usbechellel. El uai tiang, msebechii a ildisel a Airtime el momechar. E le lak mkerekikl e ngsebechem el di mo mengoit a udoud el kirel. Nglocha ungil a omosaod er tia el tekoi el obengterir a rechad er a blim.

Ngungil a cho bo mkerekikl el kmo ngoingerang, e uangerang a usbechellem er tia el klalo. Moterekeklii a tabesul el rolel a usbechellem er aika el klalo. A Shinji a melekoi el kmo: “Ngdi ta el taem er a ta el sils el kumes er a mailbox er ngak, e di meluches el onger aike el meklou a ultutelel el tekoi. Me tiang a mla rulleterir a resechelik me ngdiak loldurokl aike el diak a ultutelel el tekoi el mei er ngak. A lsekum e ngngar ngii a kmal orechudel el tekoi, e te bai omekedong er ngak.” Me a lmuut el tang e ngkired el mo kerekikl er a rechad el dongedecheduch er tir. Lak di mereched el olecholt er a number er kau. Moltaut aike el melemalt el ulekrael el di ua sel molilt er a rungil el sechelim.​—1 Ko. 15:33.

A Biblia a melekoi el kmo: “A bek el tekoi el duubech el ngar tial beluulchad a duubech er sel belsechel, . . . belsechel el di deluk ma belsechel el dongedecheduch.” (Oli. 3:1, 7) Me ngbleketakl el kmo ngkirel el ngar ngii a taem e aika el cell phone er kid a kirel el ‘di lmuk.’ Me aika el miting er a kid el Kristiano me a odingel a obliil a “belsechel” a taem el dongull er a Dios er kid, el diak dongoit er ngii el ousbech a dengua. Tirke el oungerachel er a osbitar me a gas station a lmuches a sign el olengit er a rechad me lokoad a cell phone er tir. Me ngoeak a omengull e kede kongei el oltirakl aika el ulekrael. Me ngbelkul a kmo, ngkired el olecholt er a lmuut el klou el omengull el mo er Ngika el Kot el Ngarbab el Merreder er a eanged me a chutem!

A rebetok el chad a mekoad me a lechub e te mengkekerei a ngerel a dengua er tir a lsekum e ngdiak longiil a meklou a ultutelel el okedong. A rebebil a kuk mechei a dengua er tir er cheroid me lak lerengesii, e le ngkmal sebeched el di mo onger er a dengua er kid er a uriul.

A lsekum e ke tibir el mo omechar er a cell phone er kau, e bo el tabesul a usbechellem er ngii, e lak becherei me bo el omtebechel er a klengar er kau. Me ngbleketakl el kired el kerekikl aike el meklou a ultutelel el tekoi. A Biblia a kmo: “A tabesul el uldesuiu bo lodengelii a rokui el chad.” (Filipi 4:5, New World Translation) Me a lsekum ke tibir el mo oudengua, e ngungil a cho bo mousbech er ngii el ngar er a tabesul el rolel.