A Klengar el ngar er a Chelsel a Budech el Beches el Beluulechad

Sel omomes er a siasing el ngar er tia el babier, ngua ngera uldesuem? Ngdiak moureng el kirel a budech, ma deurreng, ma ungil el klengar el ngar er ngii er ngii? Ngulterekokl el mo uaisei. Engdi tiang ua leberrous el uldasu, el bo doumera el kmo ng mo er ngii a chouaika el blekeradel er tia el chutem?

Oumesingd el chad a locha omdasu el uaisei. A bebil er aike el blekeradel el ngar er ngii er a chelecha el sils a mekemad, ma delengerenger, ma klengerenger, ma secher, ma cheleuodel. Engdi ngar er ngii a ungil luchul a omelatk. A Biblia er a losaod er a ngar er medad el klebesei e ngouchais el kirel a “beches el eanged ma beches el chutem el bo lekiei er ngii a llemalt.”—2 Petrus 3:13; Jesaia 65:17.

A doltirakl er a Biblia, e aika el “beches el eanged” ma “beches el chutem” a diak lebeches el eanged el domes er ngii ma lechub el beches el chutem el dekiei er ngii. Tia el chutem el dekiei er ngii me sel eanged el domes er ngii a mirruul el cherrungel, ma Biblia a olecholt el kmo ngmo medechel el mo cherechar. (Psalm 89:36, 37; 104:5) Sel “beches el chutem” a mo melemalt a rengrir el chad el mo kiei er tia el chutem, e sel “beches el eanged” a mo cherrungel el renged, ma lechub e ng gobelment, el mo er ngii er a eanged, el mo mengedereder er a rokui el chad er tia el chutem. Engdi ngsebeched el mera loumerang el kmo a “beches el chutem,” ma lechub a kebkall el beches el beluulechad, ngsebechel el mo er ngii?

Ka molebedebek el kmo chouaika lungil el blekeradel a mle tedebechel a moktek er a Dios er a kot el luchul el kirel tia el chutem. Ngmilechititerir tirke el kot el lobekel er a chelsel sel Paradis er a Eden er tia el chutem e milsterir a ngerechelir el kmo: “Bo bekerredechel el mo betok el mekekii tia el beluulechad e mongedereder er ngii.” (Genesis 1:28) Ochoi, a Dios a mle soal a bo loungalek el berekii sel Paradis el mo er a beluulechad el rokir. Alta e te millilt el mo omtok er a Dios, e ullecholt er tir el kmo te diak lerredemelel a mo kiei el mo cherechar, engdi Dios a dimlak lengedechii sel kot el uldesuel. Ngbai kirel el mo tmaut el ngar er a chelsel a beches el beluulechad!—Jesaia 55:11.

Me nguaisei, sel omoluluuch er sel Nglunguuch er a Rubak, ma lechub e sel Delal a Nglunguuch, e molengit me lemei a Rengedel a Dios, e ke meluluuch el kirel a rengedel a eanged el mo olekngemed aike el chelebirukel er tia el chutem e mo mengedereder er tia el beches el beluulechad. (Matteus 6:9) E sebeched el mo ulterekokl el medenge el kmo a Dios a mo onger er tia el nglunguuch, e le Tekingel a tibir el kmo: “A remelemalt a rengrir a mo ouklalou er tia el chutem, me te mo kiei er ngii el mo cherechar.”—Psalm 37:29.

A Blekerdelel a Klengar el ngar er a chelsel a Beches el Beluulechad er a Dios

Ngkmal betok el klungiaol a mo er ngii er tia el beluulechad el oeak a Rengedel a Dios, e le ngmo kutmokl a rokui el ungil el tekoi el mle moktek er a Dios el kirir a rechedal el mo dmeu a rengrir er ngii er tia el chutem. A klauketui ma chelechei a mo diak, ma rokui el chad er tia el beluulechad a mo kausechelei. Ngar er a chelsel a Biblia, e a Dios a tilbir el kmo ngmo ‘merrob aike el mekemad er a bek el merekelel a beluulechad.’ “Aika el renged a mo diak lluut el mo er a mekemad, el kmal diak lluut el mengetmokl el kirel a mekemad.”—Psalm 46:9; Jesaia 2:4.

Me tia el beluulechad el rokir a mo meketmokl el mo uai a paradis. A Biblia a dmu el kmo: “A ked a mo dmeu a rengul, ma bung a mo omung el ngar er a cheloit el beluu. . . . A omoachel el ralm a mo omaoch er a ked; ma mekeald el chelechol a mo klou el diosech, ma cheliliik el chutem a mo mui er a madedok.”—Jesaia 35:1, 6, 7.

Ngmo er ngii a betok luchul a deurreng el ngar er sel Paradis el chutem. Ngdiak lluut el mo er ngii a resongerenger e le ngesonges a kelir. A Biblia a melekoi el kmo, “A chutem a mla otebedii a smengel.” (Psalm 67:6; 72:16) Ma rokui el chad a mo dmeu a rengrir er a rdechel a urerir, el ua letilbir a Ulemeob el kmo: “Te mo dualem a sers er a bilong, e mo dmeu a rengrir er a bilong; ngdiak lekuk ngodech el chad a mo melim.”—Jesaia 65:21, 22.

Ngar er sel beches el beluulechad er a Dios, e a rechad a dikea lluut el mo kiei er aike el meseked el apartment ma lechub aike el metetemall el blai, e le moktek er a Dios a kmo: “A rechad a mo toketek a blai e mo kiei er ngii; el diak lengodech el chad a mo ousbech.” Ma Biblia a tibir el kmo: “Ngdiak lebo lak a ultutelel a urerir.” (Jesaia 65:21-23) Me nguaisei ngkmal mo ungil a urerir a rechad. Ngdiak lebo leseselk a rengrir er a klengar er tir.

E mo er ngii a taem, el Rengedel a Dios a lmuut el mo kutmeklii sel lungil el deleongel el mla er ngii er a chelsel a sers er a Eden er a delongelir a recharm, ma delongelel a charm ma rechad. A Biblia a dmu el kmo: “A ngelekel a kaming a mo tmak ngii ma leopard el bad, ma ngelekel a kerebou ma ngelekel a laion maike el betok el medinges el charm a mo tmak; e a kekere el ngalek el sechal a mo omekrael er tir.”—Jesaia 11:6-9; Hosea 2:18.

Ka di molatk, a rokui el secher ma chelitechetul a bedengir a rechad a mo mukungil el ngar er sel Paradis el chutem! A Tekingel a Dios a melisiich er kid el kmo: “Ngdiak a chad el mo dmu el kmo: ‘Ak smecher.’” (Jesaia 33:24) “E [a Dios] a mo mesuld a bek el iuosech er a mederir, e mo diak a kodall, ma klengiterreng ma langel ma ringel me ngmo diak, e le ngmla nguemed aike el dimla ngar er ngii.”—Chocholt 21:4.

Ngmekerang e Tia Sebechel el Mo er Ngii el Kirem

Me ngulterekokl el kmal ungil a rengum el kirel aike el telbilel a Dios el kirel a blekerdelel a klengar el mo er ngii er a chelsel sel beches el beluulechad er a llemalt er ngii. Malta e a rebebil a omdasu el kmo chouaika el ungil el tekoi a diak lsebechel el mo er ngii, engdi ngike el betik a rengul el Lulemeob a soal el meskid a rokui el ungil el tekoi.—Psalm 145:16; Mika 4:4.

Engdi, ngar er ngii aike el kired el mo meruul a lsoad el mo kiei el mo cherechar el ngar er sel merema el Paradis el chutem. Ma Jesus a ulechotii a ta er aike el meklou a ultutelel el tekoi, er a loluluuch el mo er a Dios el kmo: “A diak a ullebengelel el klengar tiakid el bo lodengelkau el di ta el mera el Dios, ma Jesus Kristus el ngike el mulderchii.”—Johanes 17:3.

Ma leuaisei a lsoad el mo kiei er a chelsel sel beches el beluulechad er a Dios, e ngkired el kot e kede mo mesuub aike el soal a Dios emo oltirakl er ngii. E le tia klemerang el kmo: Tia el “beluulechad ma ngelbokl er a beluulechad a mo nguemed; engdi ngike el meruul a soal a Dios a di kiei el mo cherechar,” e mo dmeu a rengrir er aike el diak a ullebengelel el klengeltengat el bo lebesterir ngike el betik a rengul el Ulemeob er kid.—1 Johanes 2:17.

A rokui el bades er a Biblia el milluches a mlengai er a Biblia er a Tekoi er a Belau, a lak louchais er a oidel a ta er a Biblia.