Tia El Beluulechad Ngmo Mosobel?

Ngdirkak a ta el telecheroll el mla remenges a betok el lomelekoi el kirel a ullebongel er a beluulechad el ua chelechang. Te betok a medakt el kmo kelel metemall a beluulechad er a meklou el mekemad el lolab a dub. A rebebil a melatk el kmo a beluulechad a sebechel el metemall el oeak a terrekakl el mengikiongel er ngii. A rekuk bebil a melatk el kmo a nglemuu er a rolel a keizai a sebechel el rulleterir a rebetok el chad el mo kaucheraro e ketemall.

Tia el beluulechad ngmera el sebechel el mo nguemed? A lsekum ngmo uaisei, e ngbelkul a kmo ngerang? Ngmla ta el lengemed a beluulechad er a uchei?

A Beluulechad a Nguemed—A Kuk Tang a Mtechir

Chochoi, a beluulechad a ngilemed. Ka molebedebek er sel beluulechad el kmal mlo mekngit er a taem er a Noah. A Biblia a mesaod el kmo: “E a beluulechad er isel taem a mleeleb er a ralm el nguemed.” Ma Biblia a dirrek el melekoi el kmo: “[A Dios a] dirrek el dimlak lengebetii sel dimla beluulechad, e bai lilia ieleb er ngii el diak loluu er a Dios el beluulechad, e di mle ngike el omerk er a llemalt el Noah ma reteuid el chad el obengkel a lulsobelterir.”—2 Petrus 2:5; 3:6.

Mesang el kmo a ngemedel sel beluulechad ngmle belkul a ngera el tekoi e dimlak lebelkul a ngerang. Ngdimlak lebelkul a ngemedel a klechad. A Noah ma telungalek er ngii a silobel er a Ieleb er a beluulechad. Me tia el bleob el Chutem ma klebokel el btuch el ngar er a melidiul me ngdimlak lengemed. Ngsel “diak loluu er a Dios el beluulechad” a ngilemed, ngsel mekngit el blekeradel er a klechad.

Sera lorael a rengelekel a Noah el mo betok, e a kuk ta er a beluulechad a dilubech. Tiaikid el longeru el beluulechad, ma lechub e ngblekeradel er a beluulechad, a millemolem el ngar er ngii el me lmuut er a chelecha el taem er kid. A reksi er ngii a mui er a mekemad, ma delengerenger, ma kdekudel el omeruul. Ngera mo duubech el mo er tiaikid el beluulechad? Ngsebechel el mosobel?

A Ngar er a Medal Tia el Beluulechad

A uriul er a losaod er a telemellel a beluulechad er a taem er a Noah, e a Biblia a melemolem el melekoi el kmo: “Engdi eanged ma beluulechad er a chelechang a ulekedelad er ngii el osisiu el omelekingel a Dios, . . . e ngii a medul er a ngau.” (2 Petrus 3:7) Chochoi, ngdi ua losaod a ta er a remeluches er a Biblia el kmo: “A beluulechad [el tia el dengar er ngii er a chelecha el sils] a mo nguemed.”—1 Johanes 2:17.

A Biblia a diak lolekoi el kmo tia el bleob el chutem ma eanged el mui er a btuch a mo nguemed, el di ua blekerdelel sel sils er a Noah el dimlak lengemed. (Psalm 104:5) Ngbai, tia el beluulechad, el “eanged” er ngii, ma lechub e te mengeteklel a kabelment el ngar er a cheungel a ongetikaik er a Satan, ma “chutem” er ngii, ma lechub e ngtia el blekeradel er a klechad, a mo metemall el di ua lemedul er a ngau. (Johanes 14:30; 2 Korinth 4:4) Tia el beluulechad, ma lechub e tia el blekeradel er a chelsel, a kmal lulterekokl el mo nguemed el di ua sel beluulechad er a uchei er a Ieleb. A Jesus a dirrek el millekoi el lomekesiu aike el blekeradel er a “sils er a Noah” el mo er a blekerdelir a rechad er a uchei er a ullebengelel tia el beluulechad.—Matteus 24:37-39.

A Jesus, er sera lolekoi el kirel a sils er a Noah, e ngulenger er a kerrir a rechapostol er ngii el kmo: “Ngera el olangch a mo er ngii kau sel mei, ma ullebongel er a beluulechad?” (Matteus 24:3, King James Version) A rulebengkel a Jesus a mle medenge el kmo tia el beluulechad a mo nguemed. Chouai tia el klaodengei ngulemekdakt er tir?

Ngbai diak, e le Jesus er a losaod el kirel aike el mo duubech er a uchei er a telemellel a beluulechad, e ngmillisiich er tir me bo ldeu a rengrir ‘e le ngubet er tir a kmedang.’ (Lukas 21:28) Chochoi, te mengubet el mo mimokl er a Satan ma mekngit el blekeradel er a beluulechad er ngii e mo soiseb er a beches el beluulechad er a budech!—2 Petrus 3:13.

Engdi ngoingerang e tia el beluulechad a mo nguemed? Ngera el “lolangch” a lebilskid a Jesus el lolecholt er a “luut el mei er ngii, ma ullebongel er a beluulechad”?

“A Olangch”

Sel tekoi er a Griik el mloiuid el kmo “mei” a pa·rou·siʹa, el belkul a kmo “ngar er tiang,” ma lechub, e ngchemolt er tiang. Me sel lemeues aika el “lolangch,” e ngdiak lebelkul a kmo a Jesus a di kmedung e ngmei e ngbai belkul a kmo ngngar er tiang er a chelechang. Ngbelkul a kmo ngmla mo omuchel el mengederedel el ua diak lemeues el king e di kmedung e ngmo olekngemed er a recherrouel.—Chocholt 12:7-12; Psalm 110:1, 2.

A Jesus a dimlak lebeskid a di chimo el tekoi el ua “lolangch.” Ngsilaod a betok el blekeradel el bo domes er a beluulechad. Aika el rokui a mo duubech er a taem el lomekedong er ngii a remelluches a Biblia el kmo “uriul el sils.” (2 Timoteus 3:1-5; 2 Petrus 3:3, 4) Ka molatk a bebil er a tekoi el Jesus a uluuchais el kmo ngmo cholengchelel a “uriul el sils.”

“Ngmo kautok a rebeluu ma rebeluu, ma renged ma renged.” (Matteus 24:7) A domekesiu er a ngar er a mong e a mekemad er a chelecha el taem a kmal imis el meklou. A ta er a rechad er a reksi a millekoi el kmo: “Sel Kot el Mekemedil a Beluulechad [el lulemuchel er a rak er a 1914] a kmal di tilemall a ‘rokui el tekoi.’” Me nguaisei, engdi sel ongeru el mekemad a lmuut el kmal klou a ltilemellii. A mekemad a melemolem el melemall er tia el beluulechad el me er a chelechang. Chochoi, a tekingel a Jesus a sebechel el desa klou el otutel er a chelechang!

“E mo er ngii a bosech.” (Matteus 24:7) Uriul er a Kot el Mekemedil a Beluulechad e ngmla er ngii sel kot el klou el ngelsonges er a kall er a reksi. A ngelsengesel a kall a dirrek el mlo er ngii er a uriul er a Ongeru el Mekemedil a Beluulechad. A ngelsengesel a eiyo a ulsecherii a kmeed el ta er a eim el tiud er a ildois er a klechad, e omekoad er a bekord el 14 el milliol el ngalek er a bek el rak. Ngmera el tekoi, el ngar er ngii a “bosech”!

“Ngmo er ngii a meklou el desiu.” (Lukas 21:11) Sel domes, e a rechad el mlad er a desiu er a 1914 el mei, a bekord teruich el taem el chachisois a ildisir er tirke el chad el mla er a uchei. Ka molebedebek a di bebil er aike el meklou el desiu el mla er ngii: 1920, er a Sina, a 200,000 a mlad; 1923, er a Siabal, a 99,300 a meltemall; 1939, er a Turkey, a 32,700 a mlad; 1970, er a Peru, a 66,800 a mlad; ma 1976, er a Sina, bekord el 240,000 (ma lechub e nguaike el lolekoi a rebebil el kmo, ng 800,000) a meltemall. Me ngmera el lulterekokl el “meklou el desiu”!

“Bekoiueiuul el rakt er ker me ker.” (Lukas 21:11) Uriul er a Kot el Mekemedil a Beluulechad, e a rebekord el 21 el milliol el chad a mlad er a Spanish flu. A Science Digest a melekoi el kmo: “Ngar er a reksi e ngdirkak a mesisiich, e mereched el blekerdelel a kodall el uai tiang.” Seikid el taem el mei, e a rektel a chaidireng, ma kasinoma, ma AIDS, ma lmuut el bebil er a bekoiueiuul el rakt a mla mekodeterir a rebetok el dart el milliol el chad.

“Ma chelebirukel chomerk er ngii.” (Matteus 24:12) A beluulechad er kid er a 1914 el mei a kmal mla mo mui er a uldikel ma kdekudel el delengerenger. Ngar er a bebil er a beluu, e a rechad a dirrek el diak lorael el di tir a lemellomes. Ma leklebesei, e a rechad a chelsimer er a chelsel a rekeblirir el mesisiich el chosechesii ma chesmerir a telnget, e le te medakt el mo tuobed a leklebesei.

Ngelmuut el betok el tekoi a meldung el kmo ngmo duubech er a uriul el sils, e ngii el rokui el domes a otutel er a chelecha el taem. Tiang a belkul a kmo a ullebengelel tia el beluulechad a kmal kmedang. Engdi, ngdmeu a rengud, e le te mo er ngii a remo suobel. Uriul er a lolekoi el kmo “a beluulechad a mo nguemed,” e a Biblia a mle yaksok el kmo: “Ngike el meruul a soal a Dios a di kiei el mo cherechar.”—1 Johanes 2:17.

Me ngkired el mo suubii a soal a Dios e mo meruul er ngii. E seikid e ngmo sebeched el mo suobel er a ullebengelel tia el beluulechad e mo oldeu a rengud el diak a ullebengelel er aike el klengeltengat er sel beches el blekeradel er a beluulechad er a Dios. A Biblia a yaksok el kirel sel taem el kmo: “A Dios a . . . mo mesuld a bek el iuosech er a mederir [a rechad], e mo diak a kodall, ma klengiterreng ma langel ma ringel me ngmo diak.”—Chocholt 21:3, 4.

A lak lemocholt, e a rokui el oidel a mlengai er a tekoi er a Belau el Biblia.

[Picture Credit Line on page 6]

Photo Credits: Airplane: USAF photo. Child: WHO photo by W. Cutting. Earth-quake: Y. Ishiyama, Hokkaido University, Japan.