Kingdom News No. 35

Ngsebechir A Rokui El Chad El Mo Kaubltikerreng?

A Bltikerreng El Mo Er A Rengar Er A Bita Er Kid A Mla Mo Mekelekolt

A REBETOK el milliol el chad a melechesuar er tir el ua leblal riid e kmal meringel a klengar er tir, e diak a ngii di leker el sebechir el mo er ngii el kirel a ngeseu. A ta er a redil el mle chad er a siobai a melekoi el kmo: ‘A ta er a klebesei e a ta el mellakl el dil el kiliei er a chosisiu el chellibel el kkiei er ngii a millengod er a chesmerel a blik e kmo ngkmal sabisi. Ak mle ungil el mengedecheduch er ngii engdi ak di mle beches el louchais er ngii el kmo ak mle mechesang. Me ngkmo mousubes er ngak el mle mengesang er kau e mirrael.’

Ngklou el klengiterreng, e le isel kesus e ngii el mellakl el dil a di mle ngii el nguu a klengar er ngii. Uriul e ngke el chad er a siobai el redil a dilu el kmo ak silubii a tekoi el loeak a “meringel el rolel.”

A ngelsengesel a bltikerreng el mo er a ngar er a bita er kid a blechoel el mo uchul a mekngit el mo duubech. Sera lengar er ngii sel klou el klautok er a delongelir a rekakerous el bedengir a rechad el kiliei er a beluu er a Bosnia ma Herzegovina, el ngii a mle tedebechel a beluu er a Yugoslavia, e ngbetok el milliol el chad a mlorimel el tuobed er a blirir ma rebetok el teruich el telael a mlokoad. Er a rua techang? A ta el kekerei el chekebil el mlorimel el tuobed er a belual a melekoi el kmo: “Te chad el kiei er bita er kemam. Aki kmal medengelterir.”

Ngar er a chelsel a beluu er a Rwanda e te betok el dart el telael el chad a mlad, el loumesingd er tir a mlokoad er a rechad el kiliei er a bita er tir. A chais er a The New York Times a melekoi el kmo: “A rechad er a Hutu ma rechad er a Tutsi a dilak el kiei, e mlengebechiil er a delongelir, el dimlak lomekerreu ma ka ble lodengei el kmo ngtechang a Hutu ma techang a Tutsi. E ngii a kiul duubech a tekoi el mlo uchul e ngulemuchel a koad el chad er a delongelir.”

Ngdi chosisiu, a rechad er a Judea ma rechad er a Arab a dmak el kiei er a beluu er a Israel, engdi a betok er tir a kaucherarou. A osisiu el blekeradel a meues er a delongelir a rechad er a Katolik ma rechad er a Protestant el kiei er a beluu er a Ireland ma lmuut el bebil el merael el mo obdois er a beluulechad el rokir. Ngdirkak er a reksi er a klechad choua blekerdelel er a chelecha el beluulechad el kmal diak a bltikerreng er a chelsel.

Ngera Ma Bltikerreng el Mo er a Rengar er a Bita er Kid a Mla Mo Mekelekolt?

Ngike el Lulemeob er kid a meskid a nger. A Tekingel, el Biblia, a omekedong aikang el kmo “nguriul el sils,” el ngii a taem el losaod er ngii a ulaoch er a Biblia el kmo, a rechad a mo “diak lechubechub.” A Jesus a ulemlaoch el kirel aikaikid el “blsechel a ringel,” ma lechub e “ngullebongel er tia el blekeradel,” el kmo “ngmo mekelekolt a bltikerreng er a rebetok.”—2 Timoteus 3:1-5; Matteus 24:3, 12.

A ngelsengesel a bltikerreng er a chelechang a olecholt el kmo kede kiei er a uriul el sils er tia el beluulechad. Me ngdmeu a rengud, e le tia el tekoi a dirrek el belkul a kmo ngkmal di kmedung e tia el mekngit el diak loluu er a Dios el beluulechad a mo mutechei er a beches el beluulechad el mo mechederedel el loeak a bltikerreng.—Matteus 24:3-14; 2 Petrus 2:5; 3:7, 13.

Engdi ngngar er ngii a ungil el luchul e ngsebeched el mera el loumerang el kmo a chouaisei el lomelodech a mera el sebechel el mo er ngii—el mera el sebechir a rokui el chad el mo kiei el kaubltikerreng?

BLTIKERRENG EL MO ER A RENGAR ER A BITA ER KID​—⁠A MERA EL NGAR ER NGII

“NGTECHA ngke el mera el ngar er a bita er ngak?” tia mle keril a ta el chad er a llach el mo er a Jesus. Ngulterekokl el locha milengiil er a Jesus el mo dmu er ngii el kmo, ‘Te chad er a Judea.’ Engdi nguleak a cheldecheduch el kirel a ungil a chomerellel el chad er a Samaria, e a Jesus a ulechotii el kmo a rechad er a bebil er a beluu a dirrek el ngar er a bita er kid el chad.—Lukas 10:29-37; Johanes 4:7-9.

A Jesus a millisiich el kmo a ongingil a bltikerreng er kid el mo er a Dios, e a bltikerreng er kid el mo er a rechad el ngar er a bita er kid a kirel el mo omekrael er a klengar er kid. (Matteus 22:34-40) Engdi ngngar er ngii a ngii di lecheldebechel er a rechad el mera el mla chocholt a bltikerreng er tir el mo er a rengar er a bita er tir? A rekot el Kristiano a mle uaisei! A rechad el mle medengelterir el kirel a klaubltikerreng el mlocholt er a delongelir.—Johanes 13:34, 35.

E kuk mekerang er a chelecha el sils? Ngngar er ngii a ngii di el chad el lolecholt er a bltikerreng el uaise el bltkil a rengul a Kristus? The Encyclopedia Canadiana a melekoi el kmo: “A urerir a Resioning er a Jehovah a okisel e dirrek el okedbechel sel mle kot el Klekristiano el mlocholt er a Jesus ma redisciplo er ngii . . . Te rokui el di odam.”

Tiang ngera belkul? Ngbelkul a kmo a Resioning er a Jehovah a diak lebechei a ngii di lengerang—el ka lebliongel er a rechad, ma lechub a beluu, ma lechub a bedengir a rechad—me bo luchul e bo louketui e lomekoad er a rengar er a bita er tir. Ngdiak lebo lomekoad er a ngii di lechad e le ngua bla lteot a saider er tir el mo chosib er a sers ma biskelengir el mo klekedall er a omengimd el dellomel. (Isaia 2:4) A Resioning, a bai lodengelterir a rechad el kmo te blechoel el kot el lomuchel el mo meruul a tekoi el lolengeseu er a rengar er a bita er tir.—Galatia 6:10.

Sei a uchul a melluches er a Sacramento Union el babier er a California a dilu el kmo: “Ngsebeched el kmo a lsekum a rokui el chad er a beluulechad a mo kiei el loltirakl a tekoi el loruul a Resioning er a Jehovah e ngulterekokl el meterob a merserasech el kodall ma klauketui, e a bltikerreng a mo mengederedel.” A ta er a chad er a omeluches er a Ring a ngklel a magazine el ngar er a beluu er a Hungary a dilechel el kmo: “Ak mesa el kmo a lsekum a Resioning er a Jehovah a di tir el tang a kiei er tia el beluulechad, e ngmo diak a mekemad, ma urerir a rebulis a di mo omekrael a mlai ma lechub e te meruul a passport er a rechad e merkong.”

Engdi, kede rokui el kongei el kmo, ngklou el lomelodech a kirel el mo er ngii er tia el chutem e ngmochu sebechir a rokui el chad el mochu kiei er a chelsel e kaubltikerreng. Chouai tia el lomelodech, ngmekerang e mei? (Moutekangel el lomes er a ullebongel el page.)

SEL BOCHA LEKAUBLTIKERRENG A ROKUI EL CHAD

A NGLUNGUUCH el lullisechakl er ngii a Jesus Kristus a olecholt el kmo a klou el lomelodech a kmal di kmedang. Ngar er sel merael a chisel el Cheldecheduch el Ngar er a Rois, e a Jesus a ullisechakl er kid el meluluuch el kmo: “A rengedem lemei. Ma udesuel a rengum lemeruul er a chutem el ua omerellel er a eanged.”—Matteus 6:10, King James Version.

Ngerang a Rengedel a Dios? Ngmera el gobelment, el mengederedel el ngar er a eanged. A Jesus Kristus, el ngii a “Prince er a Budech” a mla mengilt er a Demal el mo Merredel.—Matteus 10:7; Isaia 9:6, 7; Psalm 72:1-8.

Sel lemei a Rengedel a Dios, e ngngera mo duubech el me er tia el mui er a klauketui el beluulechad? “Isel renged” a mo “okngemed” aike el rokui el mechebirukel el gobelment er tia el chutem. (Daniel 2:44) A Biblia a mesaod el kmo: “A beluulechad a mo nguemed . . . , engdi ngike el meruul a soal a Dios a di kiei el mo cherechar.”—1 Johanes 2:17.

A Biblia a melekoi el kirel ngii el beches el beluulechad er a Dios, el kmo: “A remelemalt a mo ungilbeserir el kiei el ngar er a chelsel a beluu e mo oubeluu er ngii el di blechoel.” (Psalm 37:9-11, 29; Osisechakl 2:21, 22) Ngkol mo ua ngera lungil taem isei! “E mo diak a kodall, ma klengiterreng ma langel ma ringel me ngmo diak.” (Chocholt 21:4) A rulekoad me te lmuut el me ngar, e a beluulechad el rokir a mukbeches el mo paradis.—Isaia 11:6-9; 35:1, 2; Lukas 23:43; Rellir a Rechapostol 24:15.

Ma bo dekiei er sel beches el beluulechad, e ngkired el mesuub el mo kaubltikerreng, el ua lolisechakl er kid a Dios el mo meruul. (1 Thesalonika 4:9) A ta er a chad er a Orient el mesuub a Biblia a dilu aika el kmo: “Ak kmal lomes e mengiil el kirel sel taem, el leyaksok er ngii a Biblia el kmo, a rokui el chad el kiei a mla suubii a klaubltikerreng.” E kid a kmal sebeched el loba ulterekokl el reng el kmo a Dios a moltaut a telbilel! Ngmelekoi el kmo, “Aika tekingek, me ngmo meketmokl.”—Isaia 46:11.

Engdi a bo lsebechem el mo oldeu er a rengum er aike el klengeltengat el ngar cheungel a Rengedel a Dios, e ngkirem el mo melai er a klaodengei er kau er a Biblia, el ua loruul er ngii a rebetok el milliol el melemalt a rengrir el chad er a beluulechad el rokir. (Johanes 17:3) Sel 32 el llel el brochure el dai er ngii a kmo Ngerang a Soal a Dios a Doruul? a sebechel el ngosukau. Mnguu a babilengem el loeak sel mlechesii sel coupon el ngar er a uchei er tiang e modureklii el mo er sel kot el kmeed er kau el address.

[Picture Credit Line on page 2]

A chad el berrotel el omoes ma kemeldiil el ngar er a Bosnia: Reuters/Corbis-Bettmann