Ngsoam el Mo Medengei a Lmuut el Betok el kirel a Biblia?

Ngera Uchul Me Kede Menguiu er a Biblia?

A BIBLIA a diak el ua ngii di el kuk bebil er a babier​—⁠e le ngngar er a chelsel e ngngar er ngii a omellach el okiu a bltikerreng el mla er a Dios. (1 Thesalonika 2:13) A lsekum ke oltirakl el meruul aike el lolisechakl a Biblia, e ngkmal mo klou a klungiaol el omnguu. Ngmedechel a bltkil a rengum el mo er a Dios me kau a mo kmeed er ngii, e ngii ngike el Lomesterir a rechad aike el “bek lungil ngat ma bek el cherrungel el sengk.“ (Jakobus 1:17) Ngmo sebechem el medengei el kmo ngmekera obo er ngii el ngar er a nglunguuch. Aike el taem el omchelebangel a mondai, e ngsebechem el mo melechesuar a ngelsuil a Dios. A lsekum ke rullii a klengar er kau el mo oltirakl aike el ungil el blekeradel el lolekoi a Biblia, e a Dios a mo meskau a diak a ullebengelel el klengar.—Rom. 6:23.

A Biblia a ngar er ngii er ngii a klemerang el sebechel el mo uchul a llomes. Tirke el mo ngmai a klemedengei er a Biblia a sebechir el mo mimokl er aike el betok el cheleuid el luldasu el mengedereder a klengar er a rebetok el milliol el chad. El di ua tia el olechotel, a dodengelii a klemerang el kirel a tekoi el mo duubech er a uriul er a lemad a chad a sebechel el rullid el mo mimokl er a dakt el kmo a rulekoad a sebechir el tomellid ma lechub a rulekoad el chedad ma resechelid a chuarm a klengar er tir. (Esekiel 18:4) A osisecheklel a Biblia el kirel a okiis er a rulekoad a sebechel el mengelaod a rengrir tirke el mla orideterir a rebetik er a rengrir er a kodall. (Johanes 11:25) A dodengelii a klemerang el kirir a remekngit el anghel e ngmengelechel er kid me kede kerekikl aike el kengaol el tekoi el sebechel el mo duubech el oeak a oltuubladek e ngosukid el mo medengei el kmo ngera uchul me ngkmal betok a uldikel er tia el chutem.

A omellach el ngar er a chelsel a Biblia a ochotii er kid el kmo ngua ngera el rolel a klengar a doltirakl e ngsebechel el mo uchul a klungiaol el me er kid. El ua tiang, a chad el “di ngii el kilmeklii a rengul” a sebechel el ngosuir a klisichel a bedengel. (1 Timoteus 3:2) A “de kikidid ra bek el idokel ra bedenged ma rengud“ e ngdiak a ngera el derellii el mo tomall a klisichel a bedenged. (2 Korinth 7:1) A doltirakl a omellach el debetik er a Biblia e ngdirrek el melisiich a deurreng er a chelsel a chebechiil ma dirrek e kede mo olab a ungil el uldasu el kirel aike el tekoi el doruul.—1 Korinth 6:18.

Alsekum ke oltirakl a Tekingel a Dios, e nglmuut el mo dmeu a rengum. A klemedengei er a Biblia a ngosukid el mo metik er a budech er a uldesued ma deurreng er aike el ngar er ngii er kid e meskid a omelatk. Ngngosukid el mo omekeroul a ungil el blekeradel el ua klechubechub, ma bltikerreng, ma deurreng, ma budech, ma blekokeuii, ma klaumerang. (Galatia 5:22, 23; Efesus 4:24, 32) Choua ika el blekeradel a olengeseu el meruul er kid el mo ungil el bechiil el sechal ma lechub e kede bechiil redil, ma chedam ma lechub e kede chedil, ma ngalek el sechal ma lechub e kede ngalek el redil.

Ngmla ta el omkora melebedebek el kirel a klengar er a ngar er a medad? A ulaoch er a Biblia a ngosukid el mo medengei el kmo kede kirel ker er a temel tia el klechad. Aika el ulaoch a diak di louchais el kirel a blekeradel er a beluulechad el dekiei er a chelsel er a chelechang e ngdirrek el lolecholt el kmo ngdi kmedung e a Dios a mo ngodechii tia el chutem el mo paradis.—Chocholt 21:3, 4.

Mongeseu el Mo Medengelii a Biblia

Altang mla ta el molasem el menguiu er a Biblia e miltik er ngii el kmo ngmeringel el bo dodengei a tekoi er a chelsel. Altang locha diak modengei el kmo ke osiik er a keskelel a Biblia el kirel a nger er a kerim. A lsekum ke uaisei, e ngdiak el di lekau el tang. Kid el rokui a ousbech a ngeso el mo medengei a Tekingel a Dios. A Resioning er a Jehovah, el ngar er a chelsel a bekord el 235 el beluu, a omesterir a rebetok el milliol el chad a diak el ocheraol el omesubel a Biblia. Ngkmal dmeu a rengrir el dirrek el ngosukau.

Ngblechoel el ungil a dolemolem el mesuub el omuchel er aike el uchetemel a osisechakl. (Hebru 6:1) Sel omolemolem, e kau a sebechem el mo melai a “medecherecher el kall”—el ngii, aike el dmolech el tekoi er a klemerang. (Hebru 5:14) A Biblia sei a klisiich el lolterekokl a tekoi. Aike el babier el mesaod a bebil er a tekoi er a Biblia, el ua sel babier el dai er ngii a kmo Ngerang a Soal a Dios a Doruul?, a sebechel el ngosukau el mo medengei a bebil er a Bades ma omesodel a kakerous el suobel.

Kau Ke Kongei el Mo Mengoit er a Telkib er a Temem er a Bek el Sandei el Mo Medengelii a Biblia?

A omesubel a Biblia a blechoel el sebechel el mekedmokl er a taem ma basio el ungilbesul er kau. Te betok a mesuub er a rekeblirir. A rebebil a mesuub el oeak a dengua. A program er a omesuub, a diak el kora skuul el ngar er ngii a rebetok el chad, e ngbai ileakl el tekoi el lruul el kmal di kirem me ngrodemii a blekerdelel a klengar er kau, ma klemedengei er kau ma skulem. Ngdiak a omelai el skeng, ma diak a tekoi el kirem el mo meruul el kora mo omekrur er kau. A kerim el kirel a Biblia a mo monger, me kau a mo suubii el kmo ngmekera omolekeed er kau er a Dios.

Ngdiak el kirem el omechar er a choua itia el omesubel a Biblia el mekedmokl el kirem. (Matteus 10:8) Tiang a diak locheraol el mo er a rechad er a rokui el klechelid ma dirrek el mo er tirke el kuk diak a klechelid er tir engdi te semeriar el melechel a klemedengei er tir el kirel a Tekingel a Dios.

Te rua techang a sebechir el me teloi er tia el omesuub el obengkem? A telungalek er kau el rokir. Ma ngii di el sechelim el soam el mengemedaol er ngii me ngdirrek el sebechir el me teloi er a omesuub. Ma lechub e a kuk lsoam, e ngsebechem el kuk di kau el tang.

Te betok el chad a ocheueklii a ta el sikang er a tal sandei el di kirel choua itia el omesubel a Biblia. A lsekum kau a sebechem a kuk betok el sikang ma lechub e ngdi sebechem a kesai el bung er a bek el sandei, e a Resioning a kmal sebechir el lotireklii sel sebechem el ngosukau.

A Okedong el kirel a Omesuub

Aki mengemedaol er kemiu me msiiketerir a Resioning er a Jehovah. A ta er a rolel e ngsebechem el meruul er tia el tekoi a oeak a omoluches el mo er a ta er aika el address el llechukl er a eou. E seikid e ngmo sebechel el mekedmokl a chad el eko mesuub a Biblia el obengkem el diak el ocheraol.

□ Modureklii a babier el Ngerang a Soal a Dios a Doruul? Mochotii a omelekoi el soam.

□ Mosiik er ngak el kirel a diak el ocheraol el omesubel a Biblia.

A oidel A Biblia el lousbech er ngil a Kedeb el Chuodel el Testament ma Beches el Testament, engdi a lengodech e ngullecholt.