A Rokui el Ringel A Kmedung el Mo Diak!

Nglocha mla er ngii a taem er a chelsel a klengar er kau, el muleker el kmo, ‘Ngera uchul me ngngar er ngii a kmal betok el ringel?’ Ngar er aika el betok el telael el rak, e a telungalek er a klechad a kmal mla mo chuarm er a mekemad, ma chelebuul, ma tellemall, ma delengerenger, ma chelebirukel, ma secher, ma kodall. Ma ika el mereko el dart el rak e a klechad a chilarm a kuk lmuut el betok el ringel er aike el di mla ngar er ngii er a ngar er a mong el mei. Ngkol sebechel el mo er ngii a ullebengelel aika el rokui el ringel?

A nger el mengelaod a rengud a kmo choi, e kmal di kmedung e ngmo uaisei! A Tekingel a Dios, el Biblia, a melekoi el kmo: “E a re dengerenger a mo dibus . . . ngdi tirkel medemedemek a mo ungilbesrir el kiei el ngar a beluu el ungil a rengrir er a cherrungel budech.” El mo ua ngera klteketel? “A re melemalt a mo ungilbesrir el kiei er a chelsel a beluu e mo oubeluu er ngii el di blechoel.”​—Psalm 37:10, 11, 29.

Uriul er a lokngemed a delengerenger ma ringel, e tia el beluulechad a mo meketmokl el mo paradis. E sola e a rechad a mo sebechir el kiei el mo cherechar el cherrungel a klisichel a bedengir el ngar er a deurreng. A Tekingel a Dios a omlaoch el kmo: “[A Dios a] mo mesuld a bek el iuosech ra mederir, e mo diak a kodall, ma klengiterreng ma langel ma ringel me ngmo diak.”​—Chocholt 21:4.

Ngar er a chelsel sel beches el beluulechad, e a rulekoad a dirrek el mo sebechir el lmuut el me ngar e oldeu a rengrir er a ua ike el klengeltengat el kmo: “Ngmorngii chokiis rar melemalt mar diak lemelemalt.” (Rellir 24:15) Misei a uchul ma Jesus Kristus a mle sebechel el melekoi er ngike el lulebult el mekngit el chad el ngii a ulechotii a klaumerang el mo er ngii el kmo: “Ke mo obengkek el ngara Baradis.”​—Lukas 23:43.

Ngera Uchul Me Ngmlo er Ngii a Ringel?

A lsekum ngmle moktek er a Dios el kirir a rechad el mo er ngii a mengasireng el klengar er tir er a ngar er a mederir el klebesei, e ngngera uchul me ngkilengei a ringel me lomuchel? E ngera uchul me ngmilechei me ngmedechel el kemanget el taem?

A Dios er sera lomeob er a Adam ma Eba, e ngrirelleterir el mle cherrungel a bedengir ma uldesuir. Ngngilititerir el mo er a chelsel a paradis el sers e milsterir a ureor el lomotech a rengrir. A Biblia a melekoi el kmo: “Ma Dios er a le ues a ikel bek el bla leruul e ng kmal mlo ungil a rengul.” (Genesis 1:31) Oleko te ullengesenges er a Dios, e ngmlo sebechir el omechell er a remecherrungel el ngalek, ma bek el merkelel tia el chutem a mlo sebechel el mo paradis, ma rechad a mlo sebechir el kiei er ngii el ngar er a budech ma deurreng el mo cherechar.

A Dios a lilia er a rengul a Adam ma Eba el ua leblekerdelel a omebelel a klechad sel mengasireng el sengk el ngii a sel llemeltir el mo melilt a tekoi. Ngdimlak el di leua lak a uldesuel el mesil el robot. Engdi, a bo lolemolem a deurreng er tir a mle ultuil er tir el ousbech er ngii el llemeltir el mo melilt a tekoi el ngar er a melemalt el rolel—el mo olengesenges a llechul a Dios. A Dios a melekoi el kmo: “Ngak a RUBAK el Dios [el Jehovah] el olsisechakl er kemiu el mo ungilbesmiu, ak ngikel omekrael er kemiu er sel rael el kiriu el okiu ngii.” (Isaia 48:17) A mekngit el usbechel a llemeltir el mo melilt a tekoi a mlo uchul a klou el tellemall el kirir, e le te dimlak lobeob el mo ungilbesrir el ileakl er a Dios. A Biblia a melekoi el kmo: “Ng diak a chad el medengelii a le bor ngii er a ngar medal, e diak a chad el sebechel el chodereder a blekeklel.”​—Jeremia 10:23.

Ngmekngit a rengud, e le tirke el mle kot el demad ma delad a millatk el kmo ngmle sebechir el meleakl er tir er a Dios e di melemolem el ungilbesul a klengar er tir. Engdi sera lotngeklii a omengederederel a Dios, e ngmlo diak lomekerreu er sel cherrungel el klengar er tir. Me seikid e ngmlo mechitechut a bedengir me te mlo chuodel e mlad. Me kid el ngelekir, a mludiukes er sel diak lecherrungel el blekerdelel a klengar ma kodall.​—Rom 5:12.

Sel Kot el Klou a Ultutelel el Tekoi​—⁠el Omengedereder

Ngera uchul ma Dios a dimlak lokngemedii a Adam ma Eba e lluut el omeob er a kuk ta er a obekel er a klechad? E le sel omengederederel a Dios er a eanged me tia el chutem, el sel llemeltel el mo mengedereder, a mleasem. Ma ker a dilubech el kmo, Ngtechang a ngar er ngii a llemeltel el mo mengedereder, ma omengederederel techang a melemalt? Ma leuaisei, e a rechad, ngbai kuk mo ungilbesul a klengar er tir a lak longedereder er tir a Dios? A Dios er sera lebesterir a rechad a ungilbesul el klemengetel a taem el lemimokl el di tir el mengedereder er tir, e ngmlo sebechel el di tang e moterekokl el mo cherechar el kmo ngmo klungiolir a rechad a bo lekiei el chederdall er a Dios ma lechub e ngbai ungil el di tir el mengedereder er tir. A taem el lebilecherei a Dios el kirir a mle kirel el kemanget me bo lsebechir a rechad el mo melasem a bek el bedengel a tekoi er a politiks, ma rolel a klengar, ma keizai, ma klechelid el ileakl er a ulekrael er a Dios.

Ngera mlo rsel? A betok el telael el rak er a reksi er a klechad a meketeklii el kmo ngbai mengal el mlo betok a ringel. Ngar er a chelsel aika el mereko el dart el rak, e a telungalek er a klechad a chilarm aike el kot el mekngit el blekeradel el mla ngar er ngii. Te betok el milliol el chad a lulekodeterir er a temel a Holocaust er a Hitler. Te kuk betok er a 100 el milliol el chad a lulekodeterir er a mekemad. A delengerenger ma kdekudel el omeruul a ngar er ngii er ker me ker. A usbechel a mekngit el kar a mla oberk er a beluulechad el rokir. A bekoiuiuul el rakt el oeak a deleboes el omeruul a melemolem el lobridang el mengal el mo klou. Te betok er a teruich el milliol el chad a mad er a bek el rak er a klengerenger ma rakt. A klengar er a telungalek ma tekoi er a kldung a mla metemall er ker me ker. Ngdiak a gobelment er a klechad el sebechel el sumechokl aika el mondai. Ngkmal diak a ta er tir el mla oridii a cheluodel, ma secher, ma kodall.

A blekeradel er a klechad a di ua sel lulemlaoch er ngii a Biblia el kirel tia el taem er kid. A Tekingel a Dios a meketeklii tia el taem er kid el ua “luriul sils” er tia el mekngit el blekeradel er a beluulechad el ngii a “blsechel a ringel.” Me ngdi ua sel lullekoi er ngii a Biblia el kmo, ‘Mar mekngit el chad mar mengeblad a mengal mora mekngit.’​—2 Timoteus 3:1-5, 13.

Ngdi Kmedung e Ngmo Diak a Ringel

A rokui el ocholt a meketeklii el kmo kede kmedang er a ullebengelel sel taem el klechad a mle meringel el melasem el kiei el ileakl er a Dios. Me ngkmal mla mo bleketakl el kmo a omerrederel a klechad el ileakl er a Dios a kmal diak el sebechel el mo ungilbesul. Ngdi ta el omerredelel a Dios a sebechel el meskid a budech, ma deurreng, ma cherrungel el klisichel a bedenged, ma diak a ullebengelel el klengar. Me seikid e sel kengei er a Jehovah el milechei a chelebirukel ma ringel me ngmelemolem a olekeda er a ullebengelel. Ngdi kmedung e a Dios a mo sumechokl a mondai er a klechad sel bo lokngemedii tia el mekngit el blekeradel er a beluulechad el rokir.

A ulochel a Biblia a dmu el kmo: “Me sel taem el orreder tirkel king [el omerreder er a klechad el ngar er ngii er a chelecha el taem] e a Dios el ngar a eanged a mo toketekii a rengedel [el ngar er a eanged] el mo diak a ulebengelel. . . . E ng bai mo okngemed a ikel bebil er a renged el rokui [el ngii a mengedereder er a chelecha el taem] e sola e ngii a mo medechel el mo cherechar.” (Daniel 2:44) A omengebkellel a klisichel a omengederederel a Jehovah, ma llemeltel el mo mengedereder, el oeak a Rengedel el ngar er a eanged a iseikid a kot el klou a ultutelel el osisechakl el ngar er a Biblia. Me sera lomlaoch el kirel a klou a ultutelel el olangch er a “uriul sils,” e a Jesus a dilu el kmo: “Me tial evangkelio ra rengedel a Dios a mo oberk ra belulechad el rokir, el kirel locholt el bedul a bek el renged; e sola e ngmochu ullebongel.”​—Matteus 24:14.

Sel lemei a ullebongel, e te rua techang a mo suobel? A Biblia a onger el kmo: “A re melemalt e diak a telemellir el chad a mo kiei er a beluu el diak bo le cheroid er ngii. Ngdi Dios a mo melai er a re dengerenger el oltobed er tir er a beluu.” (Osisechakl 2:21, 22) A remelemalt a tirke el mesuub a soal a Jehovah e oltaut a tekoi el lesuub. A Jesus Kristus a dilu el kmo: “A diak a ullebengelel klengar tiakid el bo lodengelkau el dital meral Dios, ma Jesus Kristus el ngikel mulderchii.” (Johanes 17:3) Chochoi, a “belulechad . . . a mo nguemed; ngdi ngikel meruul a soal a Dios a di kiei el mo cherechar.”​—1 Johanes 2:17.

A oidel a Biblia el lousbech er ngii sel Biblia el Tekoi er a Belau, engdi a lsekum e ngmengodech e ngmo mocholt.