Ngkired el Mengedaol Aike el Chedaol el Sils?

AIKE el chedaol el sils el longedaol a rechad el meliuekl er a beluulechad el rokir a diak lemengai a uchetemel er a Biblia. Me a leuaisei, aika el chedaol el sils ngulemuchel er ker? A lsekum e ngngar er ngii a library el sebechem el mo er ngii e meruul a research e ngmo mechas a rengum sel bo modengei a omesodel aike el chedaol el sils el longedaol el ngar er a beluu el omngar ngii. Ka me bo dosaod a bebil er ngii.

Easter. A The Encyclopædia Britannica a melekoi el kmo: “Ngdiak a omesodel a omengedolel a Easter er a chelsel a Beches el Testament.” Me a leuaisei, a Easter ngulemuchel er ker? Ngmengai a uchetemel er a omengull er a klsuul el chelid. Me alta te melekoi el kmo tia el chedaol el sils a mengedaol er a okisel a Jesus, engdi omerellel a diak el rolel a Klekristiano. El uai tiang, a The Catholic Encyclopedia a mesaod el kirel a “Easter bunny” el kmo: “A usangi a ta er a olengchelel a omengull er a klsuul el chelid e blechoel el omtechei er a cheroll.”

Beches el Rak. Ngar er a derta el beluu e ngdiak el osisiu a sils er tir er a Beches el Rak me a rolel a longedaol er ngii. A uchelel tia el sils er a Beches el Rak a losaod er ngii a The World Book Encyclopedia el kmo: “A merreder er a Rom el Julius Caesar a rirellii a January 1 el mo sils er a beches el rak er a 46 B.C. Me tia el sils a lerirellii a rechad er a Rom el kirel a Janus el ngii a mle chelid er a siseball, me a chesimer, me a uchelel a tekoi. Me a buil el January a ngiluu a ngklel er a Janus el mle teblo medal, el chimong a omes el bedul uchei me a chimong a omes el bedul uriul.” Me nguaisei, a omengedolel a Beches el Rak a mlengai a uchetemel er a omengull er a klsuul el chelid.

Halloween. A The Encyclopedia Americana a melekoi el kmo: “A oketmeklel a sils er a Halloween a ulemuchel er a uchei er a taem er a Rekristiano er a temir a re Druid [kleprist er a Celt er a irechar]. A re Celt a mla er ngii a ungil el klebesei er tir el kirir a reteru er a chelid er tir, el chelid er a sils me a chelid er a rulekoad . . . , e a ungil el klebesei er a rulekoad a mla er ngii er a November 1, el mle Beches el Rak er a re Celt. E tia el ungil el klebesei er a rulekoad a milekekokil el soiseb er a siukang er a Klekristiano.”

Bebil er a Chedaol el Sils. Ngkmal diak el sebeched el smaod a rokui el chedaol el sils el meliuekl er a beluulechad el rokir. Me nguaisei, engdi a Jehovah a kmal diak lekengei a chedaol el sils el kirir a rechad me a lechub e ngcheldebechel el loruul a rechad. (Jeremia 17:5-7; Rellir 10:25, 26) Ngdirrek el kired el melatk el kmo, a uchelel a ungil el klebesei me a chedaol el sils er a klechelid a mo oterekeklii el kmo a Dios ngkongei er ngii me a lechub e ngdiak. (Isaia 52:11; Ocholt 18:4) Aike el omellach el debetik er a 16 el bliongel er tia el babier a mo ngosukau el mo medengelii a uldesuel a Jehovah el kirel aike el chedaol el sils el loruul a rechad er chelechang.