Ngmekerang a Loureor a Chelechad er a Ruungerachel er Chelecha el Sils?

Sera taem er a rekot el Kristiano, e a kekerei el cheldebechel er a “re apostol ma re mechuodel” el ngar er a Jerusalem, a milsiou el ua chelechad er a ruungerachel el millib a meklou a ultutelel el tekoi el kirel a ongdibel er a rengellitel el Kristiano. (Rellir 15:2) Te mo oba ta el uldasu er a uriul er a losaod a Bades e loltirakl a ulekrael er a chedaol reng er a Dios. (Rellir 15:25) A osisiu el tekoi a meketmokl er chelecha el sils.

A Dios a ousbech er ngii el meruul a soal. A rengellitel el odam el mesiou el ngar er a Chelechad er a Ruungerachel a kmal semeriar er a Tekingel a Dios, e klou a klemedengei er tir er a teletelel a lemeketmokl a ureram me a rolel a longer a ker el kirel a tekoi er a klechelid. Te mo dmak er a bek el sandei el mo mesaod aike el ousbech a klodam er a beluulechad el rokir. Me ngua sera taem er a rekot el Kristiano, e aike el osisechakl el mengai er a Biblia a meketmokl el oeak a babier me a lechub a rudam el oldingel a ongdibel me a rekuk bebil. E tiang a ngosuterir a rechedal a Dios el mo omdasu e meruul a tekoi el ngar er a kltarreng. (Rellir 16:4, 5) A Chelechad er a Ruungerachel a omtebechel er a oketmeklel aike el tekoi el melisiich a klaumerang er kemam, e melisiich a ureor er a berkel a klumech er a Renged, e oungerachel el melilt er tirke el odam el mo olab a ngerachel er a ongdibel.

Ngkerekikl el oltirakl a ulekrael er a chedaol reng er a Dios. A Chelechad er a Ruungerachel a ultuil er a ulekrael er Ngike el Kot el Ngarbab el Merreder el Jehovah me a Bdelul a ongdibel el Jesus. (1 Korinth 11:3; Efesus 5:23) A rechedal tia el chelechad a diak lomdasu el kmo te mengeteklir a rechedal a Dios. Tir me tirke el rokui el ngellitel el Kristiano a ‘oltirakl er a Ngelekel a Sib [el Jesus] el mor a ikel le bor ngii.’ (Ocholt 14:4) A Chelechad er a Ruungerachel a oba omereng el saul sel ki moluluuch el kirir.

• Te rua techang a mle chedal sel chelechad er a ruungerachel er a taem er a rekot el Kristiano?

• Ngmekerang a Chelechad er a Ruungerachel a losiik a ulekrael er a Dios er chelecha el sils?