A Rahab a Uluumerang er a Jehovah

Ka me dolatk el kmo kede ngar er a mats er a Jeriko. E tia el mats a ngar er a beluu er a Kanaan, el rechad er ngii a diak loumerang er a Jehovah. A redil el ngklel a Rahab a kiei er tiang.

A Rahab er a lekekerei el redil e ngrirenges a chisel a Moses er a lomii er a Bekerkard el Daob e longetakl er a rechad er a Israel el tuobed er a Ekipten. Ngdirrek el rirenges a chisel a Jehovah er a lengesuterir el mo mesisiich er a mekemad el omtok er a recherrouir. E chelechang e ngorrenges el kmo a rechad er a Israel a mla locha tento er tir er a bita er a Jeriko!

A ta el kebesengei, e a reteru el chad er a Israel a mlo er a Jeriko el mo ourabek me a lechub e te mlo osiik a berrotel el tekoi el kirel tia el mats. Me te mlo er a blil a Rahab. Me ngullengit er tir me be ltuu e lekiei. E sel kesus, e a king er a Jeriko a mlo medengei el kmo a ruurabek a ngar er a chelsel a mats e mla mo er a blil a Rahab. Me a king a ulderecheterir a rechad el mo melai er tir. A Rahab a ulemart er tirka el ourabek er a chedoel a blil e dilu er a rechedal a king el kmo: ‘A ruurabek a mla er tiang engdi te mla tuobed er a mats. Me a lsekum ko mereched el mong e ngsebechiu el mdechemeterir!’ Ke medengei el kmo ngera uchul me a Rahab a omekerreu er tirka el ourabek?— E le ngoumerang er a Jehovah e medengei el kmo ngmo mesterir a rechad er a Israel a beluu er a Kanaan.

A uchei er a letobed er a blil a Rahab, e tirka el ourabek a tilbir el kmo ngii me a demal me a delal me a ruchedal a mo suobel er sel taem el bo lemetemall a Jeriko. Me ke medengei el kmo ngera te dilu er ngii me bo loruul?— Te dilu el kmo: ‘Mokur tia el bekerkard el ekil er a mado er kau. A omoruul el uaisei, e a rebek el chad el ngar er a blim a mo suobel.’ A Rahab a riruul a rokui el tekoi el ledilu er ngii tirka el ourabek. Ke medengei el kmo ngera mo duubech er a uriul?—

A sesei el klebesei er a uriul, e a rechad er a Israel a mirrael el meliuekl er a mats el diak longerodech. Te mirruul er tiang el tang er a ta el sils el mle uaisei el elolem el klebesei. Engdi sera ongeuid el sils, e te mirrael el meliuekl er a mats el euid el taem. E sola e uleldiu el klou a ngerir, me a Jehovah a riruul a cheuatel er a beluu me ngmlongkangk el meriou. Engdi sel blai el mle ulak a bekerkard el ekil er a mado er ngii a dirk dechor, alta e ngmla er a cheuatel er a beluu! Ngsebechem el mesang el ngar er a siasing?— A Rahab me a demal me a delal me a ruchedal a silobel!

Ngera sebechem el suubii er a Rahab?— A Rahab a uluumerang er a Jehovah e le ngsiluub a kmal betok el ungil el tekoi el kirel. Kau me ke dirrek el mesuub a kmal betok el ungil el tekoi el kirel a Jehovah. Kau ke oumerang er ngii el di ua Rahab?— Aki medengei el kmo ke oumerang er ngii!