Ngrirellii a Demal me a Jehovah el Mo Dmeu a Rengrir

Ke mesa redil el ngar er a siasing?— Ngngelekel a chad el ngklel a Jeftha. A Biblia a diak louchais er kid er a ngklel, engdi kede medengei el kmo ngrirellii a demal me a Jehovah el mo dmeu a rengrir. Ka me bo dosuub el kirel ngii me a demal el Jeftha.

A Jeftha a mle ungil el chad e milengoit er a klou el taem el olisechakl er a ngelekel el redil el kirel a Jehovah. Ngmle mesisiich el chad e mle ungil el mengeteklir a rechad. Me a rechad er a Israel a ullengit er ngii el mo mengeteklir el mo oumekemad el omtok er a recherrouir.

A Jeftha a milluluuch el olengit a ngeseu er a Dios el mo mesisiich er a mekemad. Ngtilbir el kmo a lsekum e ngmo mesisiich e ngmo msang a Jehovah ngike el kot el chad el me tuobed er a blil sel luut el me remei. E ngika el chad a mo oureor er a klemengetel a klengar er ngii er a chedaol Tento e kiei er bita er ngii. A chedaol Tento a mle basio el rechad a mo er ngii e mengull er a Dios er a ngar er a mong el taem. Nguaisei, a Jeftha a mlo mesisiich er a mekemad! Ke medengei el kmo ngtechang a mle kot el tuobed er a blil er sera be lrei?—

Ochoi, ngngelekel a Jeftha el redil! Ngika di mle chimong el ngelekel, e chelechang e a Jeftha a mocha kirel el mo mecherei me ngmerael. E tiang a rirellii el kmal mo mekngit a rengul. Engdi ka molatk, ngii a rirellii a telbilel. Me ngdi mle mereched a ngelekel el kmo: ‘Papa, kau a rirellii a telbiil el mo er a Jehovah, me ngkirem el otireklii.’

A ngelekel a Jeftha a dirrek el kmal mle mekngit a rengul. Ngar er a chedaol Tento e ngdiak el sebechel mo bechiil me a lechub e ngmo oungalek. Engdi ngii a kmal mle soal el otireklii a telbilel a demal e mo rullii a Jehovah el mo dmeu a rengul. E tiang a kuk mle klou a ultutelel er ngii er a bo el bechiil me a lechub e ngmo oungalek. Me ngmirrael er a blil e mlo oureor er a chedaol Tento er a klemengetel a klengar er ngii.

Omomdasu e a tekoi el lurruul er ngii ngrirellii a demal me a Jehovah el mo dmeu a rengrir?— Ochoi, nguaisei! Me a lsekum e kau a mo olengesenges e mo betik a rengum er a Jehovah e ngsebechem el mo ua ngelekel a Jeftha. E dirrek el sebechem el rullii a demam me a delam me a Jehovah el kmal mo dmeu a rengrir.