A Samuel a Millemolem el Meruul a Melemalt el Tekoi

A Samuel er sera lebuik, e nguluureor e kiliei el kmeed er a chedaol Tento, el basio el rechad a mlo er ngii e mengull er a Jehovah. Ke medengei el kmo ngmilekerang a Samuel e mlo er a chedaol Tento? A kot e me bo dosuub el kirel a delal, el Hana.

Ngmle kemanget el taem el Hana a mle soal a tolechoi engdi ngdimlak el sebechel el mo oungalek. Me ngmilluluuch el mo er a Jehovah e ullengit er ngii me lengesuir. Ngtilbir el kmo a lsekum e ngmo er ngii a ngelekel el sechal e ngmo odureklii el mo oureor er a chedaol Tento e mo kiei er bita er ngii. A Jehovah a ullenger er a nglunguchel me ngmlo er ngii a ngelekel el sechal. Ngmilengeklii el Samuel. Me ngdi ua letilbir a Hana, a Samuel er sera le edei me a lechub e le euang a rekil, e ngiluu el mo er a chedaol Tento el mo mesiou er a Dios er isei.

A Eli a mle ngarbab el prist er a chedaol Tento. A reteru el ngelekel a dirrek el uluureor el prist er isei. Lak mobes el kmo a chedaol Tento a mle blil a Dios er a omengull, me a rechad a mle kirir el meruul a ungil el tekoi er a chelsel. Engdi a rengelekel a Eli el sechal a mirruul a kmal mekngit el tekoi. A Samuel a ulemes aike el tekoi el lurruul. A Samuel ngmirruul a mekngit el tekoi el ua rengelekel a Eli?— Ngdiak, ngmillemolem el meruul a melemalt el tekoi, el di ua lullisechakl er ngii a demal me a delal.

Omomdasu e ngera mle kirel a Eli el meruul er ngii el kirir tirka el teru el ngelekel?— Ngmle kirel el omals er tir. Ngdimlak el kirel el mechititerir me lolemolem el oureor er a blil a Dios. Engdi a Eli a dimlak loruul el uaisei, me a Jehovah a mlo kesib a rengul er ngii me a rengelekel el sechal. Me ngtilbir el mo omals er tir.

A ta el kesus er a lemechiuaiu a Samuel, e ngrirengesii a chad el oleker er ngii el kmo: ‘Samuel!’ Me ngrirurt el mo er a Eli, engdi a Eli a dilu el kmo: ‘Ngdimlak kuleker er kau.’ Tia dilubech el lmuut el eru el taem. A uriul er a ongedei el taem, e a Eli a dilu er a Samuel el kmo a lsekum e nglmuut el rongesii a ngor, e ngkirel el dmu el kmo: ‘Ak ulengit me mongedecheduch e RUBAK, a kurrenges.’ Me tiaikid a lurruul er ngii a Samuel. Me a Jehovah a dilu er a Samuel el kmo: ‘Mouchais er a Eli el kmo ak mo omals er a telungalek er ngii el kirel aike el mekngit el tekoi el bla lrruul.’ Omomdasu e ngmle beot er a Samuel el ouchais er tia el tekoi el mo er a Eli?— Ngdiak, ngdimlak. Me alta Samuel a mle medakt, engdi ngriruul aike el ledilu er ngii a Jehovah. Aike el lullekoi a Jehovah a tilaut. Tirke el teru el ngelekel a Eli el sechal a mlad el uldimukl er a Eli.

A Samuel a ungil el kerebai el kired. Ngmirruul a melemalt alta e ngmilsterir a rebebil el meruul a mekngit el tekoi. E kau a kuk mekerang? Kau ke mo ua Samuel e melemolem el meruul a melemalt el tekoi? A omoruul el uaisei, e ke mo rullii a Jehovah me a demam me a delam el mo dmeu a rengrir.