7 EL SUOBEL
Ngmla Ta el Momelechesiu er Kau el Kora Sabisi e Medakt?
Ka momes er ngika el kekerei el buik el ngar er a siasing. A domes er ngii e ngkora sabisi e medakt, nguaisei? Ngmla ta el momelechesiu el uaisei?— A rebek el chad a omelechesiu el uaisei a lebebil er a taem. A Biblia a mesaod el kirir a resechelil a Jehovah el dirrek el ulemelechesiu er tir el sabisi e medakt. A ta er tir a mle Elias. Ka me bo dosuub el kirel.
A Jesebel a mle soal el omekoad er a Elias
A Elias a kiliei er a Israel er a ngar er a mong el taem, er a uchei er a lemechell a Jesus. A Ahab el king er a Israel a dimlak longull er a mera el Dios el Jehovah. A Ahab me a bechil el Jesebel a milengull er a klsuul el chelid el Baal. Me a ruumesingd el chad er a Israel a mlo omuchel el mengull er a Baal. A Kuin el Jesebel a kmal mle mekngit a blekerdelel e mle soal el omekoad er tirke el rokui el mengull er a Jehovah, el uldimukl er a Elias! Ke medengei el kmo ngmilekerang a Elias?—
A Elias a chiliis! Ngchiliis el mo er a medideriik el beluu e mlo mertii er a chelsel a ii. Omomdasu e ngera uchul me ngchiliis?— Ochoi, ngmle medakt. Engdi a Elias a dimlak el kirel el medakt. E ngera uchul? E le ngmle medengei el kmo a Jehovah a sebechel el ngosuir. A Jehovah a ulechotii a klisichel el mo er a Elias er a uchei. A ta el taem, e a Jehovah a ulenger er a nglunguchel a Elias er a lotengelii a ngau er a eanged. Me ngkmal sebechel a Jehovah el ngosuir a Elias er chelechang!
Ngmilekerang a Jehovah er a lolengeseu er a Elias?
Me a Elias er a lengar er a chelsel a ii, e a Jehovah a milengedecheduch er ngii e uleker el kmo: ‘Ke mekera er tiang?’ Me a Elias a ulenger el kmo: ‘Ngdi ngak el tang a dirk mengull er kau. Ak kmal medakt e le rechad a melasem el omekoad er ngak.’ A Elias a ulemdasu el kmo a rokui el mesiungel a Jehovah a mla mad. Engdi a Jehovah a dilu er a Elias el kmo: ‘Ngdiak, ngdiak el mera el tekoi. Te ngar er ngii a 7,000 el chad el dirk mengull er ngak. Bo bekeu. Ngar er ngii a lmuut el betok el ureor el kumeskau el bo moruul!’ Omomdasu e a Elias ngmle dmeu a rengul el remenges aika el tekoi?—
Ngera sebechem el suubii er a tekoi el dilubech el mo er a Elias?— Ngdiak mluut el mo omelechesiu er kau el sabisi e medakt. Ngar er ngii a resechelim el betik a rengrir er a Jehovah e dirrek el betik a rengrir er kau. A Jehovah a dirrek el ngar er ngii a klou el klisichel, e mo blechoel el olengeseu er kau! Kau ngdiak el deu a rengum el mo medengei el kmo a Jehovah a mo blechoel el olengeseu er kau?—
MONGUIU EL NGAR ER A BIBLIA ER KAU
1 King 19:3-18
Psalm 145:18
1 Petrus 5:9