A Renged el Mo Mengedereder er a Chutem el Rokir

Ka molangch el kmo ngera el Renged a dosaod er ngii?— Ochoi, ng Rengedel a Dios, el ngii a Renged el mo rullii tia el chutem el mo baradis. Ngsoam el mo medengei a lmuut el betok el kirel tia el Renged?—

A bek el renged a ngar er ngii a king er ngii. E ngike el king a mengedereder er a rechad er a belual. Ke medengei el kmo ngtechang a King er a Rengedel a Dios?— Ng Jesus Kristus. Ngkiei er a eanged. E di kmedung e ngmo King er a rokui el chad el ngar tia el chutem! Omomdasu e ngmo dmeu a rengud er sel taem el Jesus a mo King er a chutem el rokir?—

Ngkmal mo dmeu a rengud! Ngar er a Baradis, e a rechad a diak bo el kakoad me a lechub e te mo er a mekemad. A rokui el chad a mo kaubltikerreng. Ngdiak a chad el mo smecher me a lechub e ngmad. A remeiko a mo omes, me a remechad a mo orrenges, me tirke el diak el sebechir el merael a mo remurt e melechesokl. A rokui el chad a mo betok a kelir. Me a charm a mo dmak el milil e dirrek el mo milil el obengked. A rechad el mlad a lmuut el me ngar. A rebetok er tirke el sechal me a redil el mulsuub el kirir el ngar tia el babier el ua Rebeka, Rahab, David me a Elias a dirrek el lmuut el me ngar! Kau ngsoam el mo olsiuekl er tir sel lluut el mei?—

A Jehovah a betik a rengul er kau e soal a bo el deu a rengum. Me a lsekum e ke melemolem el mesuub el kirel a Jehovah e olengesenges er ngii, e ngmo sebechem el kiei el mo cherechar el ngar er a klebokel el baradis! Tiang soam el tekoi?—