4 EL BLIONGEL
A Rolel a Omomtebechel a Udoud
“Mnga ngesou er a ungil uldasu me bo mungil er a ikel moruul.”—Osisechakl 20:18
Kid el rokui a ousbech a udoud el mengetmokl a telungalek er kid er aike el dousbech. (Osisechakl 30:8) E le a ‘udoud a mesebechakl er kid.’ (Olisechakl 7:12) Alta ngmo chetituokel er a rubekel a losaod a udoud, engdi lak bechei a udoud me bo luchul a mondai er a chebechiieliu. (Efesus 4:32) A rubekel a kirir el ngar er ngii a klaumerang er a delongelir e dmak el oureor sel losaod el kirel a chitel a udoud.
1 BO MKEREKIKL EL MELIB A TEKOI
A LOLEKOI A BIBLIA: “A lsekum ng ngar ngii er kemiu a melatk el mo omekedechor er a tebekebok, e a kot e ng mo dengchokl e mes a mo cheral e mesal kmo ng ngar ngii a udoud el sebechel el rokir ngiil ureor ng diak.” (Lukas 14:28) Ngklou a ultutelel el kiriu el terung el mo dmak e tibir el kmo ngmekerang a obo mousbech a ududiu. (Amos 3:3) Molilt aike el kiriu el mo omechar e momes el kmo ngtela el udoud a sebechiu el chemoit. (Osisechakl 31:16) Ngdiak el belkul a kmo ngar er ngii a ududiu me ko momechar a klalo. Molasem el diak momals er kemiu. E di mongoit aike el ngar er ngii er kemiu el udoud.—Osisechakl 21:5; 22:7.
SEBECHEM EL MERUUL:
A lsekum a ulebongel er a buil e ngmo er ngii a medeel el ududiu, e molilt el terung el kmo ko mo mekerang el kirel a ududiu
A lsekum ng ngesonges a ududiu, e mtib a tekoi el bo moruul me bo mongesadel a chitel a udoud. El ua tiang, ngsebechiu el di kemiu el meruul a keliu er a bai bo momengur er a blil a blengur
2 MOUCHAIS A KLEMERANG EL KIREL A UDUDIU
A LOLEKOI A BIBLIA: “Mchachedecheduch a klemerang.” (Sekaria 8:16) Molekoi a klemerang er a bechim el kirel a kerrekerngem me a udoud el mongoit.
Bo blechoel el oker er a bechim sel molilt a meklou a ultutelel el tekoi el kirel a ududiu. (Osisechakl 13:10) A omosaod a udoud el terung e ngosukemiu el mo melemolem er a budech er a chelsel a chebechiieliu. Momes a kerrekerngem el diak di el ududem, e ngbai ududiu el telungalek.—1 Timothy 5:8.
SEBECHEM EL MERUUL:
Mtibir el terung er a klungel a udoud el sebechiu el mengoit er ngii er a bai mkakerker er a bek el taem
Lak mongiil el mo er sel duubech a mondai e bo mosaod el kirel a udoud