Sel Duubech a Kerior

Me alta e ke melasem er a tkurrebab el sebechem el mo er ngii a deurreng er a chebechiielem me a telungalek er kau, engdi ngsebechel el duubech a bkaischemrungel el tekoi el mo uchul e ngmo meringel er kau el melemolem el dmeu a rengum. (Olisechakl 9:11) Ngoeak a bltikerreng e a Dios a ngosukid sel bo dechelebangel a ringel. Me a lsekum koltirakl aika el omellach er a Biblia, e kau me a telungalek er kau a mo sebechiu el outekangel el mo lmuut er aike el kmal mekngit el blekeradel.

1 BO MULTUIL ER A JEHOVAH

A LOLEKOI A BIBLIA: “Moterekokl a ikel rokui el tekoi el suebek a rengmiu er ngii, ele ng kerekikl el omekerreu er kemiu.” (1 Petrus 5:7) Bo blechoel el melatk el kmo a Dios a diak el ngii a uchul a mondai er kau. (Jakobus 1:13) Me sel molekeed er kau er ngii e ngmo ngosukau el ngar er sel kot el ungil el rolel. (Isaia 41:10) “Msbedii er a ikel ngar a rengum.”​—Psalm 62:8.

Ngdirrek el sebechem el mo metik a ongelaod sel monguiu e mosuub er a Biblia er kau er a bek el sils. E seikid e ke mo melechesuar a Jehovah a ‘lolengeseu er kau er a rokui el chelebulem.’ (2 Korinth 1:3, 4; Rom 15:4) Ngtilbir el mo meskau a “budech er a Dios, el diak el sebechel a chad el mo cherrungel el medengelii.”​—Filipi 4:6, 7, 13.

SEBECHEM EL MERUUL:

• Moluluuch el olengit er a Jehovah me lengesukau el mo chelellakl a rengum e bo el sebechem el ungil el omdasu

• Momelekl a rokui el tekoi el mullilt, e mngiltii sel kot el ungil el kirem

2 MOMEKERREU ER KAU ME A TELUNGALEK ER KAU

A LOLEKOI A BIBLIA: “A mellomes a rengul chad a di blechoel el semeriar e soal el mesuub.” (Osisechakl 18:15) Ngkirem el mo medengei a rokui el meklou a ultutelel el tekoi el lousbech a telungalek er kau. Moker el mo medengei a lousbech a derta el chad er a telungalek er kau. Mdak el chadecheduch. E morrenges aike el lolekoi.​—Osisechakl 20:5.

E kuk mekerang a lsekum ngmad a betik er a rengum? Lak medakt el ouchais a kngtil a rengum. Bo modengei el kmo, ngmo lmuut er a ‘Jesus me nglilangel.’ (Johanes 11:35; Olisechakl 3:4) A ungil cheliuaiu me a ungil a ildisel el ulengull a dirrek el kmal klou a ultutelel. (Olisechakl 4:6) E le ngsebechel el ngosukau me ngmo beot er kau el outekangel a meringel el blekeradel.

SEBECHEM EL MERUUL:

• Bo blechoel el chadecheduch kau me a telungalek er kau er uchei er a leduubech a kerior. Me a lebo er ngii a mondai, e lsebechir el beot er tir el mengedecheduch er kau

• Mongedecheduch er a rebebil el mla mo chelebangel a osisiu el tekoi

3 MNGAI A NGESO EL MOUSBECH

A LOLEKOI A BIBLIA: “A sechelid a di blechoel el oubltikerreng, e a ta er kid el sechal a ngosukid er a chelebuul.” (Osisechakl 17:17) A resechelim a sorir el olengeseu engdi nglocha diak el lodengei el kmo te mekerang a lolengeseu er kau. Me lak momai er a rengum e mouchais er tir aike el mousbech. (Osisechakl 12:25) E dirrek el mosiik a ngeso er a tekoi er a klereng er tirke el chad el medengelii a Biblia. A ulekrael el bo mngai er tir el okiu a Biblia a sebechel el ngosukau.​—Jakobus 5:14.

Sel bo blechoel el obengterir a rechad el tir a mera el mesisiich a klaumerang er tir er a Dios e oumerang a telbilel e ke mo metik a ngeso el mousbech. Ke dirrek el mo metik a ongelaod sel molengeseu er a rebebil el tir a ousbech a omelisiich. Mouchais er tir er a klaumerang er kau el mo er a Jehovah me a telbilel. Molemolem el lolengeseu er a rechad el ousbech a ngeso, e lak mongeroid er kau er a rechad el betik a rengrir er kau e omekerreu er kau.​—Osisechakl 18:1; 1 Korinth 15:58.

SEBECHEM EL MERUUL:

• Mongedecheduch er a kmeed el sechelim e becherei me lengesukau

• Bo bleketakl e mouchais a klemerang el kirel a ngeso el mousbech