51 EL SUOBEL
Ngmekera Sebeched Lodeuir a Rengul a Jehovah Sel Dongedecheduch er a Rechad?
A Jehovah er a lebebid e ngmilskid a kmal ungil sengk el ngii a duch er kid el mengedecheduch. Ngklou a ultutelel er ngii a rolel a dousbech er tia el sengk? Chochoi! (Monguiu er a Jakobus 1:26.) Me ngmekera sebeched lousbech er tia el sengk er a rolel e ngodeuir a rengul?
1. Ngmekera dousbech er a sengk er omengedecheduch el ngar er a ungil rolel?
A Biblia dmu er kid el mo ‘melemolem el kasisiich a rengud e kaingeseu.’ (1 Thesalonika 5:11) Ngsebechem el lotketerir a rechad lousbech a omelisiich? Ngera sebechem el rullii me ngmo ungil a rengrir? Molterekokl a rengrir el kmo te meklou a ultutelir er kau. Nglocha sebechem louchais er tir er a tekoi el kmal soam er tir. Ngsebechem el mdesuii a bades el mo melisiich er a chad el modengelii? Ngkmal betok a bades el sebechem el melilt. Lak mobes el dirrek el kmo a rolel a omolekoi a tekingem a dirrek el kmal mo smisicheterir a rechad. Me molasem el mora tkurrebab el sebechem el mo ungil e medemedemek omongedecheduch.—Osisechakl 15:1.
2. Ngera el rolel a cheldecheduch a kmal diak dousbech?
A Biblia melekoi el kmo: “Lak mousbech a ikel melemall el tekoi.” (Monguiu er a Efesus 4:29.) Tia belkul a kmo ngdiak dousbech a mekngit el tekoi me a lechub e dolekoi a tekoi el moktek er kid a melemall er a rengul a chad. E kmal diak bo dolekoi a mekngit el telulechoid me a lechub e ngotuub.—Monguiu er a Osisechakl 16:28.
3. Ngera mo ngosukid el mengedecheduch el ngar er a rolel e kede melisiich er a rechad?
A tekoi el dolekoi ochotii el kmo, ngngera mera el ngar er a rengud me a uldesued. (Lukas 6:45) Me ngkired el train er kid el mo melatk a ungil el tekoi el ngii a melemalt, bliochel, bltikerreng, e klungiaol. (Filipi 4:8) A doruul er tiang e ngkired el kerekikl a rolel ongelaod el doruul me tirke el dolilt er tir el mo sechelid. (Osisechakl 13:20) Ngdirrek el ngosukid sel dongoit a taem el omdasu er a uchei er a dongedecheduch. Molatk a bo lerellii er a chad a tekingem. A Biblia kmo: “A lak dungil el dobedebek a tekoi e dolekoi e ng ua saider el merus, e a dungil el dobedebek a tekoi e dolekoi e ng sebechel el omekungil.”—Osisechakl 12:18.
BOM DMOLECH EL MERRITER
Msuubii a rolel a cheldecheduch lodeuir a rengul a Jehovah e melisiich er a rechad.
4. Mkerekikl a cheldechedecham me a rolel omongedecheduch
A lebebil e kede dmu tekoi el uriul e kede ouuchel a rengud el kirel. (Jakobus 3:2) Monguiu er a Galatia 5:22, 23 e mosaod aika el ker:
Ngera er aika el blekeradel a sebechem el meluluuch el kirel el ngosukau er a cheldechedecham me a rolel omongedecheduch? Ngmekera ika el blekeradel e sebechel ngosukau?
Monguiu er a 1 Korinth 15:33 e mosaod er tia el ker:
A rolel ongelaod el moruul me a rechad el mobengterir ngera ngrullii el mora rolel omongedecheduch?
Ngera mo ngar ngii a lerellii er a rolel omongedecheduch?
Monguiu er a Olisechakl 3:7 e mosaod er tia el ker:
Oingerang e ngolechotel a llomeserreng a di deluk me a lechub e kede mengiil el mora ungil taem e mengedecheduch?
5. Molekoi a ungil el kirir a rechad
Ngmekera lak bo dolekoi a tekoi el diak lungil me a lechub e ngmo tomall a rengrir a rechad? Momes er a VIDEO e mosaod aika el ker.
Ngera uchul me a odam er a video mlo soal melodech er a rolel a losaod er a rebebil?
Ngerang ngmirruul el melodech er a rolel a longedecheduch?
Monguiu er a Olisechakl 7:16 e mosaod er tia el ker:
Ngera kired el melatk er ngii sel bo lsoad el melekoi a mekngit el kirel a chad?
Monguiu er a Olisechakl 7:21, 22 e mosaod er tia el ker:
Ngmekera ika el bades e ngosukid me ngdiak el ngasech a rengud sel lolekoi a mekngit el kired a chad?
6. Bo lungil a rolel omongedecheduch er a telungalek er kau
Jehovah a soal a dungil e dolecholt er a bltikerreng sel dongedecheduch er a rechedal a telungalek er kid. Momes er a VIDEO e mosaod er a ker.
Ngera mo ngosukau el mo ungil mengedecheduch er a rechedal a telungalek er kau?
Monguiu er a Efesus 4:31, 32 e mosaod er tia el ker:
Ngera el rolel a cheldecheduch a meleketek er a telungalek?
Jehovah uluuchais er a uldesuel el kirel a Ngelekel er a Jesus. Monguiu er a Mateus 17:5 e mosaod er tia el ker:
Ngmekera sebechem loukerebai er a Jehovah sel mongedecheduch er a rechedal a telungalek er kau?
Mosiik a techall el mo chemat er a rechad
A REBEBIL A KMO: “Ngak a di bleketakl a kungedecheduch. Ngdiak el problem er ngak a lsekum a rechad a chetirir aike el kdung.”
Ke kongei er tiang? Ngera uchul me ke melekoi el uaisei?
SUMMARY
A tekinged a ngar ngii a klisichel. Ngkired el mo kerekikl el melatk aike el dolekoi, rolel a dolekoi, me a taem el dedung.
Review
Ngera bebil er a rolel e ngsebechem lousbech er a cheldecheduch lolengeseu er a rebebil?
Ngera el rolel a cheldecheduch a soam el mengeroid er kau er ngii?
Ngera sebechel ngosukid el mo blechoel el ungil e melisiich sel dongedecheduch?
A LSEBECHEM E MOMES
Ngera sebechel ngosukid el mo ousbech a rolel a cheldecheduch el ngii a melisiich?
Msuubii a sebechel ngosukau el mo diak mousbech a mekngit el tekoi.
“Is Cursing Really That Bad?” (Suobel el ngar er a Internet)
Mesa rolel e ngsebechem el diak bo molekoi a mekngit el kirir a rebebil.
Mesa rolel e a Jehovah ngilsuir a ta el chad el mo diak lolius.
“I Began to Think Seriously About Where My Life Was Headed” (The Watchtower, August 1, 2013)