“Ng Mo Ua Ngera Klteketel el Kulengit a Ngesou?”
A kasinoma er a Jayne a mla obriid er a bedengel. Me nglmangel e melekoi el kmo: “Ngdi soak a lestob tia el ringel!” Me ngulterekokl a telungalek er ngii me a resechelil el locha kmal loureng el ulekum e ngsebechir el torebengii tia el rakt me a ringel el lecharm er ngii! Te meluluuch el mo er a Dios me lolengeseu er ngii. Me ngulerrenges er tir? Ngulemekerreu?
A DIOS a kmal ungil el medengelii a blekerdelel a telungalek er a klechad. A Tekingel, el Biblia a melekoi el kmo: “A bleob el rokui a dul ongingd e ngara ringel ra cheroll el me lmuut er chelechang.” (Rom 8:22) A Dios a medengei el kmo te ngar er ngii a kmal betok el dart el miliol el chad el ua Jayne, el chuarm a ringel er a bek el sils er a bedengir me a rengrir me a lechub a uldesuir. A Dios a omes er a re 800 el miliol el chad el mo mechiuaiu a leklebesei el songerenger, me a rebetok el miliol el chuarm a odechelakl er a chelsel a delengcheklir, me a rebetok el chedam me a rechedil el suebek a rengrir er a mo klengar er a rengelekir er a ngar er a mederir el klebesei. Ngmla ta el omolebedebek el kmo a Dios ngngerang mo meruul el kirel aikang? Me a lsoad el olengeseu er a rebetik er a rengud, e a Dios ngdiak el dilerrek el uaisei el soal el olengeseu a telungalek er a klechad, el blebelel?
A lsekum ke mla ta el momdasu a chouaisei el tekoi, e ngkmal diak di el kau el tang. Ngbetok er a 2,600 el rak er a mla me mong, e a blak a rengul el chad el Habakuk, a ulemdasu el ua rebetok el chad er a chelecha el sils, me nguleker er a Dios el kmo: “RUBAK, ng mo ua ngera klteketel el kulengit a ngesou e ke mochu rongesak, e osebelemam er a mekngit el bekeu el omeruul. Ng kol ngera uchul me ke rullak el mes a ua isel chelebuul ma mekngit? A omelemall ma mekngit el bekeu el omeruul a di iliuekl er ngak. Ng ngar ngii a klakoad ma klautoketok er ker me ker.” (Habakuk 1:2, 3) A Habakuk, el mle profet er a Israel, a miles a mekngit el delengerenger me a odechelakl er a taem er ngii. Chelecha el sils, e a chouaika el omeruul a metebetobed er a chais er a bek el sils el mengas a rengrir a rechubechub el chad.
A Dios ngulemes er a sebekreng er a Habakuk el ua lak a ultutelel? Ngdiak. Ngulerrenges er a keril a Habakuk me ngmilengelaod er ngii e melisiich er ngii. A Jehovah a silisichii a klaumerang er a Habakuk el loeak a telbilel el kmo Ngmo torob a ringel. Aika el klemechel a Dios el kirel a omelatk a sebechel el meskau a ulterekokl el reng el di ua lerirellii el mo er a Jayne me a telungalek er ngii. Aike el ongingil el suobel a mo onger aika el ker el kmo: Kede mekerang e mo sebeched el mo ulterekokl a rengud el kmo a Dios a mera el omekerreu er kid? Ngerang mo meruul er ngii a Dios el mo merrob a ringel, e mo meruul er ngii er a oingerang?