Semecheklel Aike el Mondai er a Chebechiil

A BIBLIA a diak lolekoi el kmo a chebechiil a beot el tekoi. A apostol Paulus a mlukrael er a Dios el mo meluches a tekoi el kirir a rebechiil el chad el kmo ngkirir el osiik a semecheklel aike el tekoi el le ‘charm a klechad’ er a bek el sils. (1 Korinth 7:28) Engdi a rebechiil el chad a kmal sebechir el mengesadel a mondai er a bek el sils e bai meleketek a deurreng er a delongelir. Ka me bo dosaod a elolem el mondai er a rebechiil el chad er a bek el sils, e desang el kmo ngmekerang e sebechel a omellach er a Biblia el ngosuterir el kirel aika el tekoi.

1

MONDAI:

“A kumelechesiu er ngak me a bechik el di merael el mo chacheroid.”

OMELLACH ER A BIBLIA:

“Mo mketkelii a ungil ma mekngit.”​—FILIPI 1:10.

A chebechiielem a ta er a kot el klou a ultutelel el tekoi er a klengar er kau. Ngdirrek el ta er a tekoi el kirem el blechoel el melatk er ngii. Ngkmal kirem el mo ungil el merriter el kmo a temem el kirel a chebechiielem kele lolengesonges me luchul a mondai er a chebechiielem. Lak bechei a tekoi er a klechad er a bek el sils me lerellau kau me a bechim el mo kakerous a blekerdelel a klengar er kemiu. Ngmera el tekoi, a urered er a bek el sils me a lmuut el bebil er a tekoi a locha mo uchul e ngkiriu el mo kebii er a bek el tutau me ngmo sebechel el mo osengur sel temiu el kiriu el dmak el terung. Nguaisei, engdi kau a sebechem e dirrek el kirem el mo kerekikl a temem el kirel aike el tekoi el di soam el meruul me a lechub e ngomililem el kuk di obengterir a resechelim e merekong.

A rebebil el bechiil el chad a mengoit a lmuut el betok el sikang el di oureor me a lechub e te meruul a tekoi el kuk di sorir el mengesang a temir me bo lak a temir el obengterir a rebecherir. A rebebil er tirka el chad a meruul aika el tekoi e diak lolechesuar el kmo te mocha “cheroid” er a rebecherir. Engdi a rebebil a kuk meruul aika el tekoi e le ngsorir el mengeroid er tir er a rebecherir. Me a lsekum kau a melechesukau el urrebet er a ta er aika el omeruul, e ngkmal klou a ultutelel el kirem el mo mesmechokl er ngii. Ngkmal kirem el bai mo melisiich er a uldesuem el mo omdasu el kmo ngungil a bai mtengetengii a klengar er kau el kirel a bechim me bo el sebechiu el mekurulii a kmes el deleuill er kemiu me bom “tal chelechad.”​—Genesis 2:24.

Tirke el mla otireklii tia el ulekrael: A Andrewa me a Tanji el obekel er a beluu er a Australia, a mla bechiil el teruich el rak. A Andrew a melekoi el kmo: “Ak kmal mla mo medengei el kmo ngkmal kdekudel el tekoi el kirel a chebechiil, a lsekum ak mo mengoit a betok el sikang el oureor, e dirrek el milil el obengterir a rechad. Me chelechang e ngak me a bechik a kmal mla oterekokl a ileakl el taem el chadecheduch el kuk kauchais aike el tekoi el somam el mesaod.”

A Dave me a Jane el kiei er a beluu er a Merikel e mla bechiil el 22 el rak, a mengoit er sel kot el tedobech el sikang er a bek el kebesengei el mesaod a tekoi el dilubech er sel sils me a dirrek el bek el uldesuir me a sorir el mesaod el tekoi. A Jane a melekoi el kmo: “Tiang a kmal klou a ultutelel el temam, me ngdiak ki becherei a ngii di el ngera el tekoi me bo luchul e bo lak ki moruul er ngii.”

2

MONDAI:

“Ngkmal mla mo seselk a renguk er tia el chebechiil e le ngdiak a ngera el knguu er ngii.”

OMELLACH ER A BIBLIA:

“A chad lak di losiik ra di klungiolel, e bai bo losiik ra klungiolel a ngodech el chad.”​—1 KORINTH 10:24.

A chad el ngii a di osiik a soal me aike el mo uchul a klungiolel er a chelsel a chebechiil, a kmal diak el sebechel el mo dmeu a rengul, el mo lmuut me a lsekum e ngkuk mo bechil a ta er a chad. A chebechiil a mo ungil a lsekum a chad a dmeu a rengul el merous er a bai di lolatk el di melai e merekong. A Jesus a dillii a uchul tia el tekoi el kmo: “A dorous e ngbai ngeltengat ra dolai.”​—Rellir 20:35.

Tirke el mla otireklii tia el ulekrael: A Maria me a Martin el kiei er a beluu er a Mexico, a mla bechiil el 39 el rak. Engdi dirrek el dimlak el beot a blekerdelel a chebechiielir er a uchelel. Te dirrek el dirk melatk er a ta el taem el kmal mlo metacherbesul a tekoi er a delongelir el obekel. A Maria a melatk er a taem e te kmal mlo meringel el kautoketok. Ngdilu el kmo: “Ak dilu tekoi el bedul a Martin el kmal diak lolechotel a omengull er ngak el mo er ngii. Ngkmal imis el ngilasech a rengul. Me a uriul e ak milluluuch er ngii el kmo, ngkmal dimlak el durenguk el melekoi el uaisei. Engdi ngkmal mlo diak el soal el lorrenges a nglunguchek.” A Martin a melekoi el kmo: “Sel taem e ak mlo omdasu el kmo ngdikea belkul el ki mdak el kiei, ngbai ungil a di ktobed el merael er a bai kulasem el mesmechokl a tekoi el diak el sebechel el mesmechokl.”

A Martin a uluusbech er a omengull er a bechil. E a Maria a kuk mengerechir er a bechil el mo oba uldesuel. Me tir el terung a dul mellatk a di sorir e merekong.

Me te milekerang e mlo sebechir el sumechokl aika el mondai er tir? A Martin a melekoi el kmo: “Ak milecherei a techall el mo sebechek el mo chelellakl a renguk, e aki mlo dengchokl el terung e tibir el mo oltirakl a mellomes el ulekrael er a Biblia el kirel a omengull me a ungil el omeruul. Me ngngar er a chelsel aika el mereko el betok el rak, e aki mla suubii el kmo alta e ngkmal mo betok a mondai engdi ngsebecham el sumechokl el mo ungil a lsekum aki meluluuch el mo er a Dios el olengit a ngeso er ngii, e dirrek el oltaut aike el ulekrael el ki betik er a chelsel a Biblia.”​—Isaia 48:17, 18; Efesus 4:31, 32.

3

MONDAI:

“Ngkmal diak el sebechel a bechik el remuul a ngerechelel.”

OMELLACH ER A BIBLIA:

“Misei e ar derta er kid a kirir el mo mesaod er tir ra Dios.”—ROM 14:12.

Ngkmal bleketakl, el chebechiil a diak el sebechel el ungil el merael a lsekum e ngdi ta el chad er a chelsel ngii el chebechiil a melasem el meruul er ngii el mo ungil. Engdi a blekeradel a sebechel el lmuut el kmal mo mekngit a lsekum e tir el terung el chedal a chebechiil a dul diak loruul a ngerechelir, e di blechoel el kautelechakl er a delongelir.

A lsekum e ke blechoel el di mechesang el melatk el kmo a bechim a kirel el mo ungil el remuul a ngerechelel, e ke ulterekokl el mo diak el deu a rengum. El ileakl a lsekum ke di kerekikl el omdidm aike el chelitechetul me ngmelisiich er a uldesuem el kmo a lsekum a bechim a kmal diak el sebechel el remuul a ngerechelel, me kau me ngdiak bo meruul a ngerechelem. Engdi a lsekum e ke bai mo melasem er a tkurrebab el sebechem el mo ungil el bechiil el chad, e ngulterekokl a chebechiielem el merael el mo ungil. (1 Petrus 3:1-3) Me a lmuut el tang, a ungil el omerellem a ochotii el kmo ke mengull a tekingel a Dios el kirel a chebechiil, e dirrek tia el ungil omerellem a kmal odeuir a rengul a Jehovah.​—1 Petrus 2:19.

Tirke el mla otireklii tia el ulekrael: A Kim me a bechil el kiei er a beluu er a Korea a mla bechiil el 38 el rak. Ngmelekoi a Kim el kmo: “A lebebil er a taem e a bechik a mo kesib a rengul er ngak el di mo lmuk el diak longedecheduch er ngak, el di diak a ungil el uchul. Me sel bo leuaisei, e ak mo omdasu el kmo nglocha mla mo diak el sal betik a rengul er ngak. A lebebil er a taem e ak mo omdasu el kmo, ‘Ngera uchul me ngmengerechir er ngak el mo oba klemedengei el bedul ngii a lsekum e ngdiak el sebechel el melasem el mo oba klemedengei el bedul ngak?’ ”

A Kim a mle sebechel el mo mechesang el di melatk er sel kngtil a tekoi el meketmokl, e dirrek el di mo omes er a ngerachel el bechil a kmal kirel el omuchel el kutmeklii. Engdi ngbai dimlak bo lomdasu el uaisei. Ngmelekoi el kmo: “Ak mla suubii el kmo ngkot el ungil tekoi a lsekum ak melasem el omuchel el meruul er a budech, er a bai kuruul er ngak el mo kesib a renguk. Me sel kuruul el uaisei, e ngblechoel el mo uchul a budech, e dirrek el mo sebecham el chelellakl a rengmam e dengchokl el ungil el mesaod a tekoi.”​—Jakobus 3:18.

4

MONDAI:

“A bechik a kmal diak lolengesenges er ngak.”

OMELLACH ER A BIBLIA:

“A bderrir ar bek el sechal a Kristus.”​—1 KORINTH 11:3.

A bechiil el sechal el omdasu el kmo a bechil a diak lolengesenges er ngii a kmal kirel el omuchel el merriter er ngii el kmo, ngkongei el chederedall er a Bdelul el ngii a Jesus Kristus me a lechub e ngdiak. A bechiil el sechal a mo sebechel el olecholt el kmo ngchederedall er a Bdelul el okiu a kerebil a Jesus.

A apostol Paulus a milluches el kmo: “Kemiul sechal, bo le betik a rengmiu rar bechemiu, el ua Kristus el mlo betik a rengul ra eklesia, me ngdi mle ngii lodersii el kirel.” (Efesus 5:25) A Jesus a dimlak el meringel el “mengedereder” er a redisaiplo er ngii. (Markus 10:42-​44) Ngbai mle blak a rengul el omeketakl a tekoi el mo er tir e dirrek el milsmechokl er tir sel lebo el kirel. Engdi ngdimlak a ta el bo lemeringel el mengedereder er tir. Ngkmal mle chubechub el bedul tir e dirrek el uleba klou el klemedengei el kirel aike el chelitecheterir. (Matteus 11:29, 30; Markus 6:30, 31; 14:37, 38) Ngdimlak a ta el di lomdasu a mo uchul a klungiolel, ngbai mle blechoel el melatk er tir me aike el mo uchul a klungiolir.​—Matteus 20:25-​28.

A rebechiil el sechal a kmal kirir el di tir el oker er tir el kmo, ‘A osengek me a uldesuek el kirel a tekoi el kmo a sechal a bdelul a redil, ngoltirakl er a siukang er a beluu me a lechub e ngoltirakl a omellach me a kerebai el ngar er a Biblia?’ El uaitiang, ngera uldesuem er a redil el diak el kengei er a uldesuel a bechil engdi ngoeak a omengull e ngouchais er ngii el kirel sel uchul me ngdiak el kengei er a uldesuel? A Biblia a ouchais el kirel a Sara el bechil a Abraham el kmo ngkot el ungil el kerebai el kirel a redil el ullengesenges er a bechil. (1 Petrus 3:1, 6) Me nguaisei, engdi mla er ngii a ta el taem e ngmle bleketakl el mesaod er a uldesuel el mo er a Abraham er sera lomes el kmo a lochotii a uldesuel el kirel a tekoi e ngmo uchul a klungiolel me a ulekerreuil a telungalek er ngii.​—Genesis 16:5; 21:9-​12.

Me ngbleketakl el kmo a Abraham a dimlak bo lemeringel el mengedereder er a Sara el rullii me bo lemedakt el olecholt er a uldesuel. Ngdimlak el mekngit a blekerdelel el chad. Me ngdi osisiu, a rebechiil el sechal a kmal kirir el mo oltirakl a ulekrael er a Biblia, me lak bo lemeringel el mengedereder er a rebecherir, e lomdasu el kmo ngkmal kirir a rebecherir el di olengesenges er tir el kirel a rokui el tekoi. Ngbai sebechel el nguu a klou el omengull er a bechil a lsekum e ngmo ungil el bdelul a delengchokl.

Tirke el mla otireklii tia el ulekrael: A James el kiei er a beluu er a England el mla bechiil el eai el rak a melekoi el kmo: “Ak melasem el diak di kulib a tekoi el di ngak el tang e diak ksbedii a bechik er a uchei. Ak melasem el diak di kulatk er ngak, e bai kerekikl el melatk er ngii me a uldesuel el ngaruchei er a uldesuek.”

A George el kiei er a beluu er a Merikel el mla bechiil el 59 el rak a melekoi el kmo: “Ak kmal kerekikl el omekerreu er a bechik el di ua meringelchad e mekreos el ngisel a chesiuch.”​—Osisechakl 31:10.

5

MONDAI:

“A bechik a kmal diak el sebechel el rullii a ngerechelel el ungil bdelul a delengchokl.”

OMELLACH ER A BIBLIA:

“A re mellomes a rengrir el redil a remuul a delengchokl, ngdi klebelung a toruud.”​—OSISECHAKL 14:1.

A lsekum a bechim el sechal a kora meringel er ngii me a lechub e ngmetitur el melib a tekoi e omekrael er a telungalek er kemiu, e ngngar ngii a edei el tekoi el sebechel el meketmokl. (1) Ngsebechem el di kerekikl el omtutk aike el rokui el chelitechetul me a lechub (2) ngsebechem el orebechii sel deruchellel el bdelul a delengchokl e nguu me ngngerechelem, me a lechub e (3) ngbai sebechem el blechoel el chemat er ngii el kirel aike el mekekerei el tekoi el lolasem el meruul, e dirrek el melisiich er ngii. A lsekum ke melilt el mo meruul aike el kot el eru el tekoi, e ke bai di kau el mridii a delengcheklem. Engdi a lsekum ke ngiltii el mo meruul er sel ongedei, e ngulterekokl el mo uchul a omelisiich er a chelsel a delengcheklem, e dirrek el smisichii e okesengii a chebechiieliu.

A rebetok el sechal a bai kongei el nguu a omengull er a rechad el kuk ngaruchei er a bltikerreng. Me a lsekum e ke rullii a bechim el mo melechesuar a klou el omengull er kau, e dirrek el rullii el mo omdasu el kmo a ngerechelel er a delengchokl a kmal ungil me ke dirrek el kmal mereng a sulel, e ngulterekokl el lmuut el mo blak a rengul el meruul er tia el ileakl el ngerechelel. Ngmera el tekoi, a lebebil er a taem e ngmo kakerous a uldasu el kirel a tekoi el ketmekill. Engdi kemiu el terung a kmal kiriu el dmak el mesaod e mesmechokl aika el tekoi. (Osisechakl 18:13) Engdi a tekoi el mousbech me a delecherul a ngerem a kmal sebechel el melemall me a lechub e ngmeleketek er a chebechiieliu. (Osisechakl 21:9; 27:15) Molecholt er a uldesuem el okiu a omengull, e tia el omerellem a ulterekokl el mo uchul e ngsebechel a bechim el mo ungil el meruul er a ngerechelel el bdelul a telungalek.

Tirke el mla otireklii tia el ulekrael: A Michele el kiei er a beluu er a Merikel el mla bechiil el 30 el rak a kmo: “A delak a kmal mle mesisiich a ngerel e dirrek el mle meduch a rengul el di ngii el tang e omekeroul er ngak me a rebebil er ngak. Me sel mesisiich el uldesuel me a omerellel a uchul me a lebebil er a taem e ak meruul a tekoi el uai ngii. Me tia el blekerdelek a kmal kirek el oureor er ngii me bo el sebechek el chederedall er a bechik. El uaitiang, ak blechoel el oker er a bechik el kirel a rokui el tekoi el kulatk el mo meruul el diak di kuba uldesuek e lak kuker er ngii.”

A Rachel el kiei er a beluu er a Australia el mla bechiil ngii me a Mark el 21 el rak, a dirrek el ngar ngii a mesisiich el blekerdelel el oltirakl er a ulekurulel. Ngmelekoi el kmo: “A delak a kmal dimlak lorrenges er a demak. Ngdi mle blechoel el ngar ngii a klautoketok er a blai, e kmal diak a omengull me a omelengmes er a chelsel a delengchokl. Me ngngar er a uchelel a chebechiielek e ak mirruul a tekoi el ua omerellel a delak. Engdi cherengel a taem, e ak silubii a klungel a ultutelel a bo kultirakl a ulekrael er a Biblia el kirel a omengull. Me chelechang e ngak me a Mark a kmal dmeu a rengmam er a ungil el chebechiielam.”

6

MONDAI:

“Ngkmal dikea el sebechek el mtekengelii a renguk er a mekngit el omerellel a bechik.”

OMELLACH ER A BIBLIA:

“Bo mkaberekakl a chetimiu rar chad, ma le ngarngii a klaotutakl ra delongeliu e mkausubes.”​—KOLOSE 3:13.

Sera omomuchel el kasisiik, e ke ulterekokl el mle blechoel el di omes aike el ungil el blekerdelel el diak momes aike el chelitechetul ngii el chad. Me tia el omeruul, ngdirk sebechem el meruul er ngii er chelechang? Ngulterekokl el mo er ngii a taem el bechim a rullii a tekoi el sebechel el mo uchul a mondai er a delongeliu. Me di lekau el oker er kau el kmo, ‘Ngungil a kumes er a ngera el blekerdelel a bechik, ngsel mekngit el blekerdelel me a lechub e ngsel ungil?’

A Jesus a uluusbech er a kmal mesisiich el okesiu el ulechotii el kmo ngklou a ultutelel el kired el mo diak di dekerekikl el omes a kngterir a rebebil. Nguleker el kmo: “Ngera me komes ra chieb el ngara medal chodam er kau, e diak molechesuar a chesbocheb el ngara medam?” (Matteus 7:3) A chieb a di ua kekerei el chudel. Engdi a chesbocheb a kmal klou el kerrekar el dousbech er ngii el lorreked er a chedoel a blai. Me ngngera mle belkul a tekingel? “Momuchel el nguu a chesbocheb el ngara medam, me bo mungil lomes me bo lsebechem el nguu a chieb era medal chodam er kau.”​—Matteus 7:5.

A Jesus a milsaod er tia el okesiu el uluusbech er a mesisiich el uleklatk. Ngdilu el kmo: “Lako moukerrekeriil, el kirel me lak mukerrekeriil. Le sel kerrekeriil el bo moukerrekeriil er ngii cho bo mukerrekeriil er ngii.” (Matteus 7:1, 2) Me a lsekum e ngsoam a Dios a lomes er kau el engelakl er aike el chelitechetum, el ngii a ua chesbocheb el ngar er a medam, e ngkmal ungil a omomes el engelakl er aike el mekekerei el chelitechetul a bechim.​—Matteus 6:14, 15.

Tirke el mla otireklii tia el ulekrael: A Jenny el kiei er a beluu er a England e mla bechil a Simon el etiu el rak a melekoi el kmo: “A chetik el blekerdelel a bechik a sel di lebekerokl el meruul a tekoi el diak louchais er ngak er a uchei. Engdi tiang a kora ngodech el tekoi, e le sera dirk kim kasisiik e ngkmal mle soak ngii el blekerdelel el kora di mereched el kongei e mekerokl el mo meruul a tekoi. Engdi chelechang e ak dirrek el melechesuar el kmo ngak me ngkmal ngar ngii a chelitechetuk, el soak el mengedereder. Me aki kmal melasem el diak di ki momes aike el mekekerei el chelitechetmam.”

A Berrotel el Tekoi el Kirel a Ungil Chebechiil

Aika el kerebai a kmal ungil el kirel a betok el omelsemai er a chebechiil el ngii a diak el sebeched el oleiub er kid er ngii, engdi ngdiak el kuk el sal meklou. Me ngngerang a berrotel el tekoi el kirel a ungil el chebechiil? Momekeroul er a bltkil a rengum el mo er a Dios, e bo leblak a rengum el oltirakl a omellach me a ulekrael el ngar er a Tekingel el Biblia.

A Alex me a Itohan er a beluu er a Nigeria el mla bechiil el kuk betok er a 20 el rak, a mla suubii a ta el mekreos el tekoi. A Alex a melekoi el kmo: “Ak kmal mla metik er ngii el kmo a ngii di el meringel el tekoi el duubech er a chelsel a chebechiil a kmal sebechel el mesmechokl a lsekum a rubekel a kongei el oltirakl a omellach er a Biblia sel losmechokl a mondai er tir.” A bechil a melekoi el kmo: “Aki mla suubii a klungel a ultutelel aki mdak el meluluuch e dirrek el dmak el oltaut a ulekrael er a Biblia me bo el sebecham el dul kaubltikerreng, e dirrek el loba kllourreng er a delongelam. Chelechang e ngmla mo kesai a mondai el diak el ua sera uchelel a chebechiielam.”

Ngsoam el mo medengei a lmuut el betok el kirel a rolel a omellach el debetik er a chelsel a Tekingel a Dios el ngii a kmal sebechel el mo uchul a klungiolel a telungalek er kau? A lsekum e ngsoam, e ngsebechem el mengedecheduch er a Resioning er a Jehovah, me bo ltelkib el smodii sel 14 el bliongel er a babier el Ngerang Mera el Losisechakl a Biblia?b

[Aike el Footnote]

[Siasing el ngar er a 5 el llel

Ngak ak melasem el meruul a lmuut el betok er aike el kuk kulai?

[Siasing el ngar er a 6 el llel]

Ngak ak blechoel el omuchel el melasem el mesmechokl er a mondai?