Ngera Uchul Me a Mekngit el Tekoi a Duubech el Mo er a Rungil el Chad?

A rebetok el chad a omdasu el kmo a Jehovah el Diosa a uchul aike el rokui el tekoi el duubech, el uldimukl er a mekngit el tekoi, e le ngii a Ulemeob a rokui el tekoi e olab a rokui el klisiich. Me bo desa el kmo ngerang dmung a Biblia el kirel a mera el Dios:

• “A RUBAK a melemalt er a ikel rokui el loruul.”​—Psalm 145:17.

• “A Dios . . . a blak a rengul e merang, ng meruul a llemalt ma ungil.”​—Duteronomi 32:4.

• “A Rubak a kmal bekokuii e chubechubchad.”​—Jakobus 5:11.

A Dios a diak el uchul a mekngit el tekoi el duubech. Me nguaisei, engdi ngii ngmelasem er a rechad er a tekoi el sebechel el mo uchul e te mo meruul a mekngit? Ngdiak. A Bades a kmo: “A lsekum a chad a measem er a ua isei el ongarm, e ng diak le kirel el kmo, ‘Tial ongarm a mlar a Dios el mei.’” E ngera uchul? “Ele Dios a diak el sebechel el mecharm er a mekngit, ma diak longarm er a ngii di le chad.” (Jakobus 1:13) A Dios a diak longarm me a lechub e lolasem er a chad el ua lerellii el mo meruul a mekngit. Me a Dios a diak el ngii a uchul a mekngit el tekoi el duubech, e dirrek el diak lolasem er a rechad el rulleterir el mo meruul a mekngit. Me ngtechang me a lechub e ngerang a uchul a mekngit el tekoi el duubech?

NGAR ER A BASIO ER A MEKNGIT EL TAEM

A Biblia a smodii a ta er a uchul me a rechad a mo chuarm. Ngdmu el kmo: “A taem ma techall a mor a re bek el chad.” (Olisechakl 9:11) Sel leduubech a tekoi el dimlak dolatk er ngii me a lechub e ngmo er ngii a accident, e a cho metemall me a lechub e ngdiak a di mo ultuil er a kmo ke mla er ker er sel taem er a leduubech tia el tekoi. A bekord el 2,000 er rak er a mla me mong, e a Jesus Kristus a milsaod el kirel a tellemall el dilubech er a lemuukel a turm el otelecheterir a re 18 el chad me te mlad. (Lukas 13:1-5) Tirkang a dimlak lemad e le ngmekngit el blekerdelel a klengar er tir a uchul, te mlad e le tir el mla er cheungel sel turm er sera lemuukel. Me a dirk mlo er ngii el desiu er a beluu er a Haiti er sera rak er a January 2010, a losaod er ngii a kabelment er a Haiti el kmo ngmlo uchul e ngririid a klengar er a betok er a 300,000 el chad. Me tirka el chad el mlad a dimlak lultuil er a kmo te rua techang me a lechub e te ua ngera blekerdelir el chad. A secher a dirrek el sebechel el mekodir a ngii di el chad er a ngii di el taem.

A rebebil a locha mo oker el kmo: ‘A Dios, ngdiak el sebechel el omekerreu er kid me lak demad? Ngdiak el sebechel el omekerreu er a rungil el chad me lak lemetemall?’ A lsekum ngmo meruul el uaisei e ngbelkul a kmo ngkirel el mo medengei a rokui el tekoi er a uchei er a leduubech. Me alta e a Dios a ngar er ngii a klisichel el sebechel el mo medengei a tekoi el mo duubech er a ngar medad, engdi kid a kired el mo melatk er a ker el kmo: A Dios ngdi mo blechoel el ousbech er tia el klisichel el mo medengei a rokui el tekoi el mo duubech?​—Isaia 42:9.

A Biblia a kmo: “A Dios er kemam a ngar a eanged; el meruul a ikel bek el soal.” (Psalm 115:3) A Jehovah a meruul a tekoi el lomes el kmo ngmeklou a ultutelel el kirel el meruul, ngdiak loruul a rokui el tekoi el sebechel el meruul. Me ngdi osisiu, ngmelilt aike el tekoi el kirel a ngar medad el taem el soal el omes e mo medengei. El ua tiang, sera lesal mocha klou a mekngit el omeruul er a beluu er a Sodom me a Gomora, e a Dios a dilu er a Abraham el kmo: “Ngar ngii a meringel el otutakl el kirel a Sodom ma Gomora, ma kngterir a kmal mla mo klou. Ng kirek el mo metengel e mesang el kmo a ultutakl el krirengesii ng klemera ng diak. Ak mo tirterii.” (Genesis 18:20, 21) Me ngbleketakl el kmo ngmla er ngii a taem el Jehovah a dimlak lodengei a mekngit el omeruul el mla er ngii er aike el beluu. Me a Jehovah a sebechel el melilt el mo medengei a rokui el tekoi me a lechub e ngdiak. (Genesis 22:12) Engdi tiang a diak lebelkul a kmo a Dios a diak lecherrungel me a lechub e ngar er ngii a chelitechetul. Ngii el “cherrungel e melemalt el ngar a rokui el rolel” a uchul me ngdi ousbech er a klisichel el mo medengei a tekoi el mo duubech er a ngar medad el klebesei el oltirakl er a moktek er ngii. Me ngkmal diak lolterekokl a tekoi e lorrimel er a rechad el mo meruul er ngii.b (Duteronomi 32:4) Me tia ngera belkul? Ngoltirakl er a moktek er Ngii e ngmelilt aike el tekoi el soal el mo medengei me a lechub e ngdiak.

A RECHAD TE UCHUL A MEKNGIT EL TEKOI EL DUUBECH?

A rechad a dirrek el uchul a mekngit el tekoi el duubech. Ka molatk er a omesodel a Biblia sel losaod a tekoi el mo uchul a mekngit el omeruul. “Ngdi chad a di ngii el mor ongarm sel le mekesuseu e lobedikl er a ikel mekngit el soal a rengul. E a ikel mekngit el soal a rengul a be le dubech e ng mo mechellii a klengit; e a klengit, a le medechang e ng mechellii a kodall.” (Jakobus 1:14, 15) Me a lsekum a chad a lomelemii a ngelbesel a rengul e mo rullii a klengit, e ngulterekokl el mo uchul a telemellel. (Rom 7:21-23) A reksi er a klechad a ochotii el kmo a rechad a mla remuul a betok el mekngit el tekoi el uchul a klou el ringel me a chelebuul el mo er a rebetok el chad. Me a lmuut el tang, a rechad a sebechir el mengesuseu er a rebebil el mo meruul a mekngit el uchul me ngdi meleketek a mekngit el omeruul.​—Osisechakl 1:10-16.

Me a Dios ngkirel el mo merrob er a rechad me lak loruul a mekngit el tekoi? Ka molatk er sel rolel e ngulebeob a chad. A Biblia a kmo a Dios a milebii a chad el di ua teletelel. Me a rechad a ngar er ngii a duch er tir el sebechir el olecholt a blekerdelel a Dios. (Genesis 1:26) Ngar er ngii a techellir el di tir el melilt a tekoi me ngsebechir el melilt el mo betik a rengrir er a Dios, e mo blak a rengrir el mo er ngii, e meruul a tekoi el melemalt er a osengel. (Duteronomi 30:19, 20) Me a lsekum a Dios a orrimel er a rechad el mo meruul a tekoi, e tia el omerellel a rulleterir el mo diak el sebechir el di tir el melilt a tekoi el bo loruul. A bo leuaisei e a rechad a di mo ua mesil el mileketmokl el di meruul aike el kirel el meruul e merekong! Me a lsekum a rokui el tekoi a kuk mlo kirel er a Dios, e ngdirrek el uaisei el mo ua lak a ilmekled el melilt a tekoi el bo doruul. Me ngkmal dmeu a rengud e le Dios a mengedidai er kid el mechikid me ngsebeched el di kid el melilt a tekoi el bo doruul! Me nguaisei, engdi tiang a diak lebelkul a kmo a mekngit el tekoi el duubech el rechad a uchul me a mekngit el omelilt er tir a di melemolem el omekcharm er a rechad.

A KARMA, NGUCHUL A RINGEL?

A lsekum ke mo oker er a chad er a Hindu me a lechub a Buddhist er tia el ker el ngar er a medal tia el makesin, e nglocha mo onger el kmo: “A doltirakl er a llach er a Karma, e a mekngit el tekoi a duubech el mo er a rungil el chad, e le te meridm a belsir el kirel a tekoi el lurruul er a chelsel sel dimla klengar er tir er a uchei.”c

Ngokiu tia el osisecheklel a Karma, e ngungil a bo domtab aike el lolekoi a Biblia el kirel a kodall. Ngar er a chelsel a sers er a Eden el lekiliei er ngii tirke el kot el obekel, e ngike el Ulemeob er tir a dilu er a sechal el Adam el kmo: “Ng di subed cho mongang a redechel a rokui el kerrekar el ngar a chelsel a sers, e ngdi sel kerrekar er a mo medengei a ungil ma mekngit a diak monga er a redechel. Ele sel sils el mkelii e kom mad.” (Genesis 2:16, 17) Me a oleko a Adam a dimlak lerebet er a klengit el mlo diak lolengesenges er a Dios, e ngmillemolem el kiei el diak a ulebengelel. Me a kodall a mlo er ngii el belsir a rechad el dimlak lolengesenges a llechul a Dios. Me sera bo loungalek e a “kodall a ulemerk el mor a re chad el rokui.” (Rom 5:12) Me ngsebeched el melekoi el kmo a “omeksullel a klengit a kodall.” (Rom 6:23) A Biblia a dirrek el mesaod el kmo: “Sel le mad a chad e ng mengubet er a klisichel a klengit.” (Rom 6:7) Me ngbelkul a kmo, sel lemad a chad e ngdikea lluut el mukerrekeriil el kirel a kngtil.

Chelecha el taem e a rebetok el miliol a oumerang el kmo a Karma a uchul a chelebuul me a ringel el mo er a rechad. Me a rebetok er tir a diak bo lemeringel a uldesuir sel bo lechelebangel a ringel me a lechub e te omes er a rebebil er a rechad el chuarm. Me nguaisei, engdi tia el klaumerang a diak lebesterir a rechad a omelatk el kirel a taem el bo lak a mekngit el tekoi el duubech. Te bai oumerang el kmo, a di ta el rolel e ngmo sebechel a chad el mengubet er tia el blekeradel el kmo sel lemad e nglmuut el mechell el kuk ngodech el chad, a okiu a ungil el omeruul me a omesubel a ileakl el tekoi. Engdi ngbleketakl el kmo tia el klaumerang a kmal ngodech er a tekoi el losaod er ngii a Biblia.d

NGIKE EL UCHUL A BETOK EL RINGEL!

Me nguaisei, engdi a rechad a diak el tir a uchul a kmal betok el mekngit el tekoi el duubech. A Biblia a mesaod el kirel a ta er a anghel el mlo diak el blak a rengul el mo er a Dios el kmo: “Ng mle ungil a blekerdelem er ser cho mobeob el mo lmuut er ser cho bocha moruul a mekngit.” (Esekiel 28:15) Me ngika el anghel a mlo Satan el Diabelong el ngii a uchul me a klengit a siliseb er a beluulechad. Ngii a miluchelii a ultok er a chelsel a sers er a Eden. (Genesis 3:1-5) A Jesus a ulemekedong er ngii el “Ngikel Mekngit” e dirrek el “merreder er tial beluulchad.” (Mateus 6:13; Johanes 14:30) Me chelechang e a ruumesingd el chad a oltirakl er a Satan el ngii a melisiich er a rechad el mo mengemikr a llechul a Jehovah. (1 Johanes 2:15, 16) A 1 Johanes 5:19 a kmo: “A beluulchad el rokir a ngar eungel Ngikel Mekngit.” Te dirrek el ngar er ngii a relmuut el bebil er a rechanghel el mlo omtok me te mlo obengkel a Satan. Me a Biblia a mesaod el kmo a Satan me a rechanghel er ngii a “mengeblad er a beluulchad el rokir,” el uchul me ‘ng kmal chebuul a beluulchad.’ (Ocholt 12:9, 12) Me ngike el mera el uchul a mekngit el omeruul a Satan el Diabelong.

Me ngkmal bleketakl el kmo a Dios a diak el uchul a mekngit el omeruul el duubech el mo er a rechad, me a lechub e lomekcharm er tir. Ngbai mla tibir el mo olekngemed a mekngit el omeruul el ua bo losaod a ongingil el suobel.