Kid, Ngkired el Medakt er a Satan?

A Satan a di ua carbon monoxide el meringel er a rechad el mesang e dongchii, e dirrek el sebechel el tomellid. Engdi a Dios a sebechel el omekerreu er kid er ngii. Me ngdiak el kired el mo medakt er a Satan a lsekum kede mo ungil el ousbech aika el tekoi el bla lebeskid a Dios:

A ilmekled el melilt a tekoi. A Jakobus 4:7 a kmo: “Momtok er a Diabelong, me bo lechiis er kemiu.” Alta e a Satan a kmal mesisiich engdi ngdiak el sebechel el orrimel er kau el mo meruul a tekoi el chetim el meruul, e le ngar er ngii a ilmeklem el melilt a tekoi. A 1 Petrus 5:9 a kmo: “Bo mesisiich el oumerang e momtok er ngii [el Diabelong].” E lak mobes, sel taem el Jesus a uleltngakl aike el edei el ongarm er a Satan e ngchilitii e merael. (Mateus 4:11) Me kau me ngdirrek el sebechem el oltngakl a omengetikaik er a Satan.

A deleuill er kid el obengkel a Dios. A Jakobus 4:8 a mengelechel er kid el kmo: “Molekeed er kemiu er a Dios.” A Jehovah a kmal soal a cho mokurulii a kmes el deleuill er kau el obengkel. Me ngmekerang a cho moruul er tiang? A kot el ungil el rolel a cho momuchel el mesuub el kirel el ousbech er a Biblia. (Johanes 17:3) A tekoi el mosuub el kirel a Jehovah a rullau el mo betik a rengum er ngii, e tia el bltkil a rengum a rullau el mo meruul a soal. (1 Johanes 5:3) Ngmo mekerang ngika el Demad el ngar er a eanged sel molekeed er kau er ngii? A Jakobus a melemolem el kmo: “Me bo lekeed er kemiu.”

A telbiil el kirel a ulekerreu. A Osisechakl 18:10 a kmo: “A ngklel a RUBAK a mesisiich el cheuatel; a melemalt a remurt el mor ngii e mo selebechakl.” Me nguaisei, engdi tiang a diak lebelkul a kmo, a ngklel a Dios el Jehovah a ua klekedall el omeklusech er kid. Ngbai belkul a kmo tirke el mera el betik a rengrir er tia el ngklel a Dios, a sebechir el omekedong er ngii er a ngii di el taem el kirel a ulekerreu.

A rungil el kerebai. A Rellir 19:19 a mesaod a ungil el tekoi el kirir tirke el dirk mlo Kristiano er a Efesus el kmo: “Te betok er tirkel uluuelai a uldekdak a babier er tir e sileseb er mederir a re chad. Tuldak a cheral ngiil babier me ng mle 50,000 el silber el udoud.”a Tirka el Kristiano a tilemall aike el rokui el klekedellir el mle chelsechusem er a tekoi er a olai el dimlak lomekerreu er a cheral. Me a kerebai er tir a kmal ungil el kired er chelechang. Tia el beluulechad a kmal mio er a tekoi er a olai me a oltuubladek. Me a ngii di el klekedall me a omeruul el ua lak lemekngit engdi ngchelsechusem er a tekoi er a olai, a sebechel el mo uchul e a remekngit el anghel a mo er ngii a klisichir el mengetikaik er kid. Me ngklou a ultutelel el doruul aike el sebeched el mengikiid er a klengar er kid er aika el tekoi.​—Duteronomi 18:10-12.

A Rogelio el dulsaod er ngii er sel kot el suobel a dimlak loumerang er a Diabelong er a chelsel a 50 el rak er a klengar er ngii. Engdi a uriul e ngmlo ngodechii a uldesuel. E ngera uchul? Ngdmu el kmo: “Ngmle ketengel el mo er ngii a Biblia er ngak. Me ngokiu a omesubek er a Bades e ak mlo medengei el kmo a Diabelong a mera el ngar er ngii. Me tia el osisiu el klemedengei a omekerreu er ngak er chelechang me ngdiak rebet er a ongetikaik er ngii.”

Me kau, ngsoam el mo mesang sel taem el bo lak a Satan? Ngkmal sebechem. A Bades a omlaoch el kirel a taem el ngika el Diabelong el mengeuid er a rebetok a mo obidokl er a “diosech el ngau ma sulfur.” (Ocholt 20:10) Ngmera el tekoi, a ngau me a sulfur a diak el sebechel el tomellii a diak lemeues el anghel. Me a leuaisei, e a diosech el ngau a omtechei er a diak a ulebengelel el tellemall. Me a Satan a mo nguemed el mo cherechar. Me seikid el taem e ngkmal mo dmeu a rengrir tirke el betik a rengrir er a Dios!

Me chelechang e molemolem el mesuub el kirel a Jehovah me a rolel.b E molatk er sel taem el mo sebechem el dmu el kmo, a “Satan a mla mo diak!”