Mlo Ua Rebek el Chad el Kirir a Rokui el Chad

TIA el tekoi a dilubech er a taem el bla bo ksemeriar er a klemerang. Me a delak a mlo er ngii a bebil el babilengel el mesaod er a Biblia el kmal mle soak. Ngileakl el kmal mle soak a siasing er a chelsel. A demak a dimlak lsoal a delak a losaod aike el tekoi el lesuub el mei er ngak. Engdi ngak a mle semeriar me ak blechoel el oker a ker, me aki mlo mesuub er sel taem el ledibus a demak. Me tiang a mlo uchul e ak tilbir er a renguk el mo tongetengii a klengar er ngak el mo er a Jehovah. Me ak mlo metecholb er a Blackpool er a beluu er a England er a rak er a 1943 er sel taem el dirk el 10 a rekik.

AK ULEMUCHEL EL MESIOU ER A JEHOVAH

Seikid el taem e ak ulemuchel el mo oldingel a obliil el obengkel a delak. E aki uluusbech a phonograph el omerk er a klumech. Aikang a kmal mle meklou e oberaod el locha ngar er a 10 el bond a berredel. Me ka di molatk er ngak el kmal mle kekerei e kulasem el mengider er a ta er ngii!

Me sera bo el 14 a rekik, e ngmle soak el mo pioneer. Me a delak a dilu el kmo ngkirek el mo mengedecheduch er a servant el mo er a brethren (el chelechang e ngodam el oldingel a ongdibel). Me ngika el odam a dilu el kmo ngungil a bo kusuub el mo meduch er a ta er a bedengel a ureor er a chim me bo el sebechek el di ngak el mengereker e kusiou el pioneer, me ak mirruul el uaisei. Me a uriul er a 2 el rak el kuureor, e ak uleker er a kuk ta er a odam el oldingel a ongdibel el kirel a klepioneer, e ngdilu el kmo, “Bo moruul er ngii!”

Me ngar er a April 1949, e ngak me a delak a ulterau a kloklam, e millukl el mo er a Middleton el beluu el ngar bita er a Manchester. E ngar isei e aki ulemuchel el pioneer. E a uriul er a eua el buil, e ngak me a ta er a odam a mlo dmak el pioneer. A obis er a Resioning er a Jehovah a ullengit me ki molukl el mo er a dirk beches el ongdibel er a beluu er a Irlam. E a delak me a ta er a odos a kuk mlo pioneer er a ta er a ongdibel.

Alta e ngdi mle 17 a rekik, engdi ngak me ngike el ki mdilak el pioneer a mlukngerachel el mo mengetmokl aike el miting er tia el ongdibel, e le te di mle mekesai a rudam el rredemelel tia el ngerachel. E a uriul, e ak millukl el mo er a ongdibel er a Buxton, e le te di mle kesai a re publisher er ngii, e dirrek el uluusbech a ngesou. Me aika el tekoi el dilubech a mlo uchul e ak mlo kltmokl el kirel a meklou el ureor el blo kchelebangel er a uriul.

Ngar er a rak er a 1951, e ak lilechesii a ongtik el soak el mo er a Watchtower Bible School of Gilead. E ngar er a December 1952, e ak mlokedong el mo teloi er a klsoldau. Me alta e a kulengit me ngdiak bo kteloi er a klsoldau, e le ngak el mle mui el taem el mesiou, engdi kort a dimlak lekengei er a ongtik e bai milengelebus er ngak el 6 el buil. Me ngar er a blil a kelebus, e ak kngiluu a kengei el mo er sel mong me 22 el skuul er a Gilead. Me ngar er a July 1953, er a uriul er a ktobed er a kelebus, e ak ngilasech er a diall el Georgic el mo kmerd er a beluu er a New York.

Me sera kbong, e ngmlo er ngii a techellek el mo er a 1953 el New World Society Assembly. E a uriul e ngmlo kirek el ngar er a train el mo er a South Lansing, er a New York el ngar er ngii tia el skuul. Engdi tiaikid el taem e ak dirk tilobed er a kelebus, me ngdimlak a ududek. Me sera bok metengel er a train, e ngmlo kirek el meleng er a 25 el sens er a chad el mla er bita er ngak me bo lsebechek el ngar er a bus el mo er a South Lansing.

MESIOU EL NGAR ER A TA ER A BELUU

Ngar er a Skuul er a Gilead e aki siluub a betok el ungil osisechakl el ngilsukemam el mo “uar bek el chad el bedul ar bek el chad.” (1 Korinth 9:22, BT) Me ngak me a Paul Bruun me a Raymond Leach a mlodurech el mo er a beluu er a Huriping, engdi ngmle kiram el mengiil a visa er kemam el sesei el buil. Me sera ki mngai a visa er kemam, e aki ngilasech er a diall el mo er a Rotterdam, er a beluu er a Netherlands. E a uriul, e aki mla er a diall el mo imuul er a Mediterranean Sea, me a Suez Canal, me a Indian Ocean el mo er a Malaysia e mo er a Hong Kong. E a uriul er a 47 el klebesei el ki mngar er a daob, e aki mlo kmerd er a Manila er a November 19, 1954.

Me ngar isei, e ngmle kiram el melodech a blekerdelel a klengar er kemam el mo oltirakl er a siukang me a omelekoi er tia el beluu. Me a kot el uchul, e aki mlodurech el mo er a ongdibel el ngar er a Quezon City el betok el chad er ngii a melekoi a tekoi er a Merikel. Me a uriul er a 6 el buil, e ngdirk mle kesai el tekoi er a Tagalog aki modengei. Engdi ngmlo er ngii a ngeldechel tia el tekoi er a ki mnguu a beches el ngerechelam.

Ngar er a May 1955 er a uriul er a ki moldingel e ki be mrei, e ngak me a Brother Leach a miltik er a babier el mesaod el kmo aki mla mukngerachel el mo mesiou el odam el oldingel a ongdibel. Sel taem e ngdirk 22 a rekik, engdi tia el ngerachel a mo uchul e ak mo suub a beches el rolel e ak mo “uar bek el chad el bedul ar bek el chad.”

El ua tiang, a uriul er ak mengilt el mo ta er a odam el oldingel a ongdibel e ak ultebedii a kot el cheldecheduch el mo er a buai er a medal a ta el stoang er tia el beluu. E ngar er a Huriping er sel taem, e a cheldecheduch el mo er a buai a blechoel el motobed el ngar er aike el basio er a buai! Me sel kuldingel a kakerous el ongdibel, e ak ultobed a cheldecheduch er a basio el ua gazebos me a blil a makit, me a medal a public hall, me a basketball court me a dirrek el park, me a tkul a rael. Engdi sera kbo er a San Pablo City, e ngkmal mle klou a chull me ngdimlak el sebechek el oltobed er a cheldecheduch el mo er a buai er sel blil a makit. Me ak ullengit er a rudam el oungerachel me lekengei me kutebedii a cheldecheduch er a chelsel a Blil a Ongdibel. E a uriul, e tirka el odam a uleker el kmo ngmekera loruul er a report el kirel tia el cheldecheduch el mo er a buai e le ngdimlak lemotobed er a basio er a buai!

Ak di mle blechoel el kiei er a blirir a rudam alta ngmle mekekerei, engdi ngmle ungil kltmokl. Ngbetok el taem, el di kmechiuaiu er a chedecholl el ngar er a ulaol. E a olechelubel a di ngar rikl, me ngdi sebechir a rechad el omes er kid el melecholb, me ak milsuub el mo meduch el melecholb el diak lesekak a rechad. Sel kumais e ak blechoel el ngar er a bus e a lebebil e ak ngar er a chert el mo er a bebil el iungs. Ngdimlak a ta lebo er ngii a mlik er a chelsel aike el rak el kusiou er a Jehovah.

Ak milsuub el mo meduch el melekoi a tekoi er a Tagalog, alta ngdimlak kulai a class el kirel. Ak mlo meduch el okiu sel kurrenges er a rudam sel ki moldingel me a dirrek sel ki mngar er a miting. A rudam a mle sorir el olengeseu er ngak el mo medengelii tia el omelekoi. Me ak kmal oba omereng el saul el kirel a kllourreng er tir me a melemalt el uldesuir el kirek.

Me a cherengel a taem, e ngmle kirek el merruul a betok el omelodech er a klengar er ngak e le kngiluu a beches el ngerachel. Ngar er a rak er a 1956 er a lemei a Brother Nathan Knorr el me oldingel, e ngmlo er ngii a klou el ongdibel er kemam. E ngak a mlengilt el mo mengedecheduch el obengkel a news media. Alta ngdimlak a duch er ngak er tia el ureor engdi a rebebil a ullengeseu er ngak. Telkib el taem er a uriul, e ngmlo er ngii a klou el ongdibel er kemam, e ngak a mle overseer. E a Brother Frederick Franz el mla er a klou el obis er kid a mlei el me oldingel er kemam, e ak siluub a kmal betok er ngii. Me sera loltobed er a cheldecheduch el mo er a buai, e nguluubail er a barong Tagalog, el bilir a resechal el chad er a Huriping. E tia rilleterir a rudam er kid er tia el beluu el kmal mlo dmeu a rengrir, e dirrek ak silubii el kmo ngkirek el kongei a omelodech me bo kua rebek el chad.

Ngmle kirek el meruul a betok el omelodech er sera bo kusiou el odam el oungerachel aike el eru el sils el ongdibel. Seikid el taem, e aki ullecholt er sel mubi el The Happiness of the New World Society. Me aki mle blechoel el olecholt er ngii el ngar aike el basio er a buai, me a lebebil er a taem e a mekekerei el charm a me mengesang er kemam. Aika el charm a mle soal sel didech er sel projector me ngmo er ngii e mo diak el sebechel tuobed. Me ngkmal mo meringel e ousbech a klou el ureor el mengetmokl er ngii. Ngdimlak lebeot a omengetmeklel aika el tekoi, engdi ngkmal mle ungil a rengmam el meseterir a rechad el mei e mesuub el kirel tia el klou el cheldebechelel a Jehovah.

Ngar er a bebil el basio, e a reprist er a Katolik a ulerrimel er tirke el olab a dereder me lak lekengei er kid el mo oumiting er aike el basio. Me a bo lak el sebeched el orrenges er tirke el mengedecheduch el ngar aike el basio el kmeed er a ikelesia er tir, e te mengosm a kambalang er tir, me ngmo diak el sebeched el orrenges er sel cheldecheduch. Me nguaisei, engdi a rechad a millemolem el mesuub el kirel a klemerang, me a rebetok el kiei er aike el basio a mengull er a Jehovah er chelechang.

BECHES EL NGERACHEL ME A, BETOK EL OMELODECH

Ngar er a rak er a 1959, e ak mlodurech el mo mesiou er a obis er a Resioning er a Jehovah e siluub a betok er sera kngar sei. E a uriul, e te ulengit er ngak el mo oldingel a bebil el beluu el zone overseer. E ngar er a ta er aika el omerollek, e ak mlo medengelii a Janet Dumond el missionari er a beluu er a Thailand. Aki mle keluches el terung, e a uriul e aki mlo bechiil. Me ngmle 51 el rak el dmeu a rengmam el mesiou er a Jehovah el terung.

Ak kmal oba klou el deurreng el mla oldingel er a remesiungel a Jehovah er a 33 el beluu. Ngdirrek el kmal dmeu a renguk el kirel aike el ngerachel el mloterekokl er ngak er a uchei, e le ngilsukak er a rolel a kubengterir a rechad el kakerous a siukang er tir me a ulekurulir! Me aika el odngelek a ngilsukak el mo bleketakl er a renguk el kmo, a Jehovah a mera el betik a rengul er a rokui el chad.​—Rellir 10:34, 35.

NGDIRK NGAR ER NGII A OMELODECH EL KIRAM EL MERUUL

Ngmera el dmeu a renguk ngak me a Janet el mesiou el obengterir a rudam el ngar er a Huriping, e dirrek el melemolem el mesiou el ngar er a obis er a Resioning er a Jehovah er a beluu er a Quezon City. Ngar tia el beluu e ngteruich el chachisois a ildisir a re publisher er chelechang er sera kumuchel el mesiou er a 60 el rak er a mla memong. Me a uriul er aika el rak, e ngdirk kirek el kltmokl el mo meruul a ngii di el omelodech er a klengar er ngak er aike el ledu er ngak a Jehovah. El ua tiang, ngkired el kongei el mo meruul a betok el omelodech el ngii a omelodech el bla leketmokl a cheldebecheled.

Aki mla remuul aike el sebecham el mo oltirakl er a ulekrael er a Jehovah, e tiang a sel kot el ungil rolel a klengar. Aki dirrek el mla melasem el meruul a omelodech er a klengar er kemam el mo olengeseu er a rudam er kid. Me ngkmal ulterekokl a rengmam el mo “uar bek el chad el bedul ar bek el chad” el oltirakl er sel soal a Jehovah.