A Biblia​—Sebeched el Ultuil er Ngii

Ngar a reksi er a klechad, e a rechad el kakerous a blekerdelel a klengar er tir a kongei el kmo ngsebeched lultuil er a klemerang el ngar a Biblia. Chelecha el taem, e a rebetok el miliol a oltirakl a osisechakl el ngar a Biblia. Me nguaisei, engdi a rebebil a omdasu el kmo a Biblia a dikea ultutelel me a lechub e ngdi delbochel. E kau, a kuk uangera uldesuem? Ngsebechem el metik er a klemerang el ngar a Biblia?

A UCHUL ME NGSEBECHEM LOUMERANG ER A BIBLIA

Ke mekerang e tirterii el kmo ngsebechem lultuil er a Biblia? Me domekesiu er ngii er tiang: A lsekum a sechelim a di blechoel el ouchais er kau a mera el tekoi el mla mo betok el rak, e ke locha kmal oumerang er ngii. Me a Biblia, ngdi uai a ungil sechelim el blechoel louchais er kau a mera el tekoi? Me bo domes olechotel.

A Remilluches er Ngii a Millekoi a Klemerang

A remilluches er a Biblia a mle honest, e mle blechoel ouchais a cheleuid lomerellir me a chelitecheterir. El ua profet el Jona el milluches el kirel a omerellel el dimlak lolengesenges. (Jona 1:1-3) E ngar a ulebengelel a babilengel e nguluuchais el kirel sel rolel e a Dios a milellach er ngii, engdi ngdimlak losaod el kmo ngkuk mle uangera rolel e ngildechii a uldesuel. (Jona 4:1, 4, 10, 11) Me sel blekerdelir a remilluches er a Biblia el kmal mle honest, a ochotii el kmo ngmle betik a rengrir er a klemerang.

Klemerang a Tekoi er a Chelsel

A Biblia, ngblechoel meskid a ungil el ulekrael el sebeched el ousbech? Ochoi. El ua tiang, ka momtab a tekoi el losaod el kirel a ungil deleuill er kid me a rebebil. Ngmesaod el kmo: “Moruul el mor a re chad a ikel somiu a loruul el ekor kemiu.” (Mateus 7:12) “A medemedemek el nger a cholleklii a ngasechereng, e ngdi medecherecher el nger a olengasechereng.” (Osisechakl 15:1) Nguaisei, a klemerang er a Biblia a klou a ultutelel er chelecha el sils el di uai sera lekot el meluches.

Klemerang a Tekoi er a Reksi er a Chelsel

A rebetok el mengiis a chutem er aika el mereko el betok el rak, a mla meketeklii el kmo a tekoi el dilubech me a rekakerous el chad me a dirrek el basio a mera el mla er ngii er a irechar el ua losaod a Biblia. Ka me dolatk er a ta el kekerei el olechotel. A Biblia a mesaod er a taem er a Nehemia, el kmo tirke el chad er a Tyre (Fenisia) el kiliei er a Jerusalem a ‘ullab a ngikel ma bek el bedengel a klalo el mo olterau.’​—Nehemia 13:16.

Me a ker a kmo, ngar ngii a olechotel tia el tekoi el ngar a Biblia? Ochoi, ngar ngii. Tirke el mengiis a chutem a mla metik a bebil er aike el loterullir a rechad er a Fenisia el ngar a Israel, el ochotii el kmo a oterullel a klalo a mla er ngii er a delongelel aika el eru el beluu er a irechar. Me a lmuut el tang, ngar a Jerusalem, e te miltik a bebil er a ngikel er a Mediteranea. Me tirka el mengiis a chutem a oumerang el kmo a rechad er a oterullel a klalo a ullab aika el ngikel el mla er a cheroid el beluu el mei. Me a uriul er a lorriter er ngii, e a ta er a chellimosk a dilu el kmo: “A tekoi el medung er a Nehemia 13:16 el kmo a rechad er a Tyre a ulelterau a ngikel er a Jerusalem a klemerang el tekoi.”

Klemerang a Tekoi er a Science er a Chelsel

A Biblia a mesaod el kirel a tekoi er a klechelid me a reksi er a klechad. Engdi sel losaod a tekoi er a science, e ngkaisisiu. Ka molatk er tiang.

A bekord el 3,500 el rak er a uchei, e a Biblia a silodii el kmo a beluulechad a kldoel er a “bechachau el melidiul.” (Job 26:7) Me tiang a kmal ngodech a omesodel er aike el cheldecheduch el chelid el kmo a beluulechad a ombibechakl er a bebul a ralm me a lechub e ngar ngii a klou el uel el oltekau er ngii. E a bekord el 1,100 el rak er a uriul er a lemeluches a babier er a Job, e a rechad a uluumerang el kmo tia el beluulechad a diak lsebechel di kldoel er a bechachau el melidiul, e ngbai ngar ngii a oltekau er ngii. E a edei el dart el rak er a uchei, el ngar a rak er a 1687, e a Isaac Newton a ultebedii a babilengel el mesaod el kirel a gravity e mileketeklii el kmo a beluulechad a ngar a orbit er ngii el lomekrael er ngii a diak lemoues el klisiich. Tia el mla obeketakl el lomesodel a science a mla oterekeklii el kmo a tekoi el losaod a Biblia er a mla mo betok er a 3,000 el rak er a uchei a klemerang!