Ngar er Ngii a Mengesang er a Osengem?
1. Ngera belkul a bo lak a mengesang a osengem?
1 A tekoi el doltaut a osenged er ngii a ngar er ngii a lerellii er a omerelled. Sei a uchul me a Jesus a dilu el kmo: “Misei e a lak a [mengesang] a medam e ngmellomes a bedengem el rokir.” (Mt. 6:22) Sel bo lak a mengesang er a osenged el kirel a tekingel a Dios e ngmo sebeched el melemolem el meruul a soal a Dios. Kede nguu a Renged el mo kot e diak bo demechesang er a diak a belkul el tekoi er a kerruul me a lechub e ngii di el ngerang el mo mengesang er a omesiunged.
2. Ngerang a sebechel el choudur a osenged, engdi ngngera sebechel el ngosukid?
2 Ngkired el Di Kid el Merriter er Kid: A osenged el kirel aike el dousbech a sebechel el mo cheleuid el loeak aike el tekoi me a klekedall el ouchais e olecholt a chais er a beluu el kirel aike el dousbech me a lechub aike el ngar er ngii er a rebebil. A uchei er a bo dolasem el meruul a tekoi me a lechub e kede omechar er a klalo el ngii a mo mechoit a klou el taem, me a udoud, me a lechub e ngklisichel a bedenged el kirel, e ngungil a ‘domekbuk a cheral’ e dirrek el di kid el oker er kid el kmo, ‘Tiang ngrullii a omesiungek el mo er a Jehovah el lmuut el mo ungil me a lechub e ngtomellii?’ (Lk. 14:28; Fil. 1:9-11) Ngdirrek el bebil er a taem e ngmo uchul a llomeserreng sel dolatk el kmo ngmekerang e sebeched el lmuut el omekbeot er a klengar er kid me bo el sebeched el menglou er a omesiunged.—2 Ko. 13:5; Efe. 5:10.
3. Ngera kede suubii er a ta el odos el mlo sebechel el meruul a omelodech el mlo omekbeot er a klengar er ngii?
3 A ta el odos er a lomuchel el ngar er a mui el taem el omesiou, e ngmle sebechel el di oureor el tedobech el taem el mengereker a ungil a ildisel el udoud el kirel aike el lousbech, engdi ngii a tilbir el di melemolem el oureor el mui el taem. A uriul e ngmillekoi el kmo: “Ngdiak a chad el sebechel el mesiou er a reterung el mastang. Ngmle kirek el chemoit aike el soak me ngmo sebechek el kutmokl aike el kuusbech. Ak mlo melechesuar el kmo a kerruul a mo diak a ultutelel e a lsekum ak di millemolem el melai aike el kulemdasu el kmo ngsoak, e ak ulterekokl el mo mesaul a renguk.” A blekerdelel a klengar er ngii a mlo uchul e ngmlo sebechel el meruul a omelodech el mlo omekbeot er a klengar er ngii, e ngodechii a urerel, e dirrek el mlo sebechel el melemolem el ngar er a mui el taem el omesiou.
4. Ngera me ngorechudel el taem er a chelechang el dolemolem el diak a mengesang er a osenged?
4 Tia el orechudel el taem el dengar er ngii a uchul me ngkmal klou a ultutelel a dolemolem el diak a mengesang er a osenged. Me sel lengelakl a bek el sils, e ngokedid er a ulebongel er tia el beluulechad me a uchelel a beches el beluulechad er a Dios. (1 Ko. 7:29, 31) Me sel dotaut a osenged er a berkel a klumech, e ngsebechel el mo uchul a osebeled e dirrek el mo uchul a osobelir tirke el orrenges er kid.—1 Ti. 4:16.