A Tekoi el Mleketmokl el Kirir a Rekristiano
1. Ngera el beches el tekoi a mleketmokl er a 1938, e mle ngerang a moktek er ngii?
1 Sera 1938, e a cheldebechellel a Jehovah a ulemuchel er a beches el tekoi. Ngbetok el ongdibel a lulengemedaol er tir el mo er a zone assemblies, el chelechang e ngokedongall el eru el sils el ongdibel. El kirel a ngerang? A babier el Informant (el chelechang e ngokedongall el Omesiunged el kirel a Renged) er a January 1939 a onger el kmo: “Aika el eru el sils el ongdibel a bebil er a telengtengil a Cheldebechellel a Jehovah el lousbech el kirel a oketmeklel a ureor er a Renged. Aike el ulekrael el dengai er aikang a kmal dousbech me bo el sebeched el mo ungil el kutmokl aike el ureor el mloterekokl er kid.” Me sel dolatk er a ildisir a rumerk er a klumech el di mle 58,000 er a rak er a 1938 el mla ngosechekl el mo engelakl er a 7,000,000 er a rak er a 2009, e ngkmal sebeched el mesa el kmo aika el eru el sils el ongdibel a mla churrengelii a moktek er ngii el olengeseu er a rumerk er a klumech el mo ‘kutmokl aike el ureor el mloterekokl er tir.’
2. Ngerang a dai er a eru el sils el ongdibel er kid el kirel a beches el rak er a omesiou?
2 Dai er a Chelecha el Mei el Rak: Kede omes el beduluchei el mo er a prokuram er a eru el sils el ongdibel el mo er ngii el lomuchel er a Ongetiu el Buil me aike el omelisiich el bo dengai. A dai er ngii el “Kemiu a Diak Kom Chedal a Belulechad” a mlengai er a Johanes 15:19.
3. Ngera el klungiaol a sebeched el ngmai e le kid el mo er a eru el sils el ongdibel?
3 Uriul er a lebo er a ta er a dirk mlo merek el eru el sils el ongdibel, e a ta el odos el mlo diak el sal oldingel a milluches el kmo sel prokuram a ngilsuir el lmuut el mo merriter er a blekerdelel a klengar er ngii e mo blak a rengul “el mo oldingel e mo diak di losaod a orebil a tekoi.” Me ngulterekokl el kmo a prokuram er a eru el sils el ongdibel er a beches el rak er a omesiou a mo ngosukid el rokui el mo betik a rengud er a Jehovah el diak el tia el beluulechad. (1 Jn. 2:15-17) Me bo el sebechem el teloi er a eru el sils el ongdibel el blak a rengum el orrenges me bo mngai a klungiolem er tia el tekoi el mleketmokl el kirir a Rekristiano el oeak a bltikerreng!