A Dmolech el Nglunguuch—A Lousbech er Ngii Tirke el Blak a Rengrir er a Omesiungir
1. Ngerang a ngilsuir a Jesus me lak lebechei a ngii di el ngerang me longesang er ngii er tia el kot el klou a ultutelel el urerel?
1 A Jesus a mle ta el kesus el lomekungil er a rechad e uleldik er a remekngit el anghel. A redisaiplo er a lebetik er ngii er sel ongingil el sils, e te dilu el kmo: “Tosiik er kau el rokui,” e ullengit er ngii me lolemolem el meruul aika el ngar er ngii a klisichel el urerel. Engdi a Jesus a dimlak lebecherei tiang me bo longesang er ngii er tia el kot el klou a ultutelel el urerel el omerk er a ungil el chais. Ngulenger el kmo: “Mei me de bora ikel ngar bita er kid el mats, me dilerrek el kulisechakl er iaikei; ele tiai a uchul e ak mlei.” Ngera ngilsuir a Jesus me lolemolem el uldellomel a osengel er tiang? Ngmilekiis er a dirk tutau e mle dmolech el meluluuch. (Mk. 1:32-39) Ngmekerang a dmolech el nglunguuch a kuk lengesukid el mo blak a rengud el ngar er a omesiunged?
2. Ngera sebeched el melebedebek el kirel el mo ngosukid el melemolem el blak a rengud el ngar er a omesiunged?
2 Melebedebek el Kirel a Ngerang? A Jesus a milsa el kmo a rechad a mle “ua ikel diak chomekang el sib, me ngmechitechetong me ngblengkangk.” (Mt. 9:36) Me ngdi osisiu, ngsebeched el melebedebek er a klungel a ultutelel a usbechel tia el ungil el chais el mo er a rechad. E sebeched el omtab el kmo ngorechudel el taem er chelechang. (1 Ko. 7:29) Ngsebeched el melatk el kirel a urerel a Jehovah me a blekerdelel, me a techall el dobang el ta er a Resioning er Jehovah, me aike el mekreos el ulekrael er a Jehovah el bla desuub el okiu a Tekingel, el ngii a meringel er a rechad el ngar er a basio el doldingel er ngii el mo medengei.—Psa. 77:11-13; Isa. 43:10-12; Mt. 13:52
3. Ngoingerang e ngsebeched el melebedebek a tekoi?
3 Melebedebek er a Oingerang? El ua Jesus, a rebebil a omkokl sel lak a cherrodech er a dirk tutau. A rekuk bebil a metik er ngii el kmo ngungil sel lolebedebek a tekoi sel leklebesei er a uchei er a bo lebechiuaiu. (Gen. 24:63) Malta ngbetok a chelsengud, engdi ngsebeched el metik a taem el mo melebedebek a tekoi. A rebebil a melebedebek a tekoi sel lengar er a olidiuul er a buai. A rekuk bebil a ousbech er a temel a sueleb er tir el mo melebedebek a tekoi. A rebetok a metik er ngii el kmo sel lechoit a telkib el taem el melebedebek a tekoi er a uchei er a bo loldingel, e ngngosuterir el mo omerk el oba klou el blakerreng me a blekeurreng.
4. Ngera me ngkired el melebedebek a tekoi?
4 A dmolech el nglunguuch a mo smisichii a urunguled el soad el mesiou er a Jehovah, e mo ngosukid el omes er a omengull er kid el ua el kot el klou a ultutelel er a klengar er kid, e smisichii a blakerreng er kid el melemolem el omerk er a klumech. A Kot el Ngarbab el Mesiungel a Jehovah, el Jesus, a ngilai a klungiolel e le ngii el millebedebek a tekoi, me kid me ngdirrek el sebeched el mo uaisei.