A Beches el Suobel el Bo Dousbech er Ngii el Omuchel a Omesubel a Biblia
1. Ngera el beches el suobel a mlo er ngii er a February 1 el A Ongkerongel, e mileketmokl el kirel a ngerang?
1 A beches el suobel el bo dousbech er ngii el omuchel a omesubel a Biblia a ngar sel February 1, 2012 el A Ongkerongel. A dai er ngii a kmo “Mosuub er a Tekingel a Dios.” Alta e a rebebil el ngar er aike el basio el doldingel a mo semeriar el menguiu aika el suobel, engdi ngmileketmokl me bo el sebeched el mesaod el obengkel a chad er a blai.
2. Ngera bebil er a tekoi el ngar er a chelsel aika el suobel?
2 Tekoi el Ngar er a Chelsel: A dai me a mekekerei el dai er tia el suobel a milluches el ua el ker el sebeched el oker er a chad er a blai sel dosaod a suobel. Aike el meklou a ultutelel el bades a mocholt, me bo el sebechel a chad er a blai el oldeu er a rengul el mesuub el ousbech er a Tekingel a Dios. A parakurab a mekedeb me bo el sebeched el mesaod el mo er a chad er a blai sel doldingel a obliil. A derta er aika el suobel a ngoikau el mo er a Biblia Olisechakl el babier me bo el sebechiu el melemolem er a omesubiu.
3. Ngmekerang a dousbech er tia el suobel el omuchel a omesubel a Biblia sel doldingel a obliil?
3 Rolel a Dousbech er Ngii: Sel morous er A Ongkerongel e ngsebechem el oker er a ker el omeksemeriar er a chad el mesaod er a tekoi el ngar er a chelsel a suobel. El ua tiang, a February 1 el Ongkerongel a mesaod aike el tekoi el dosuub er a ulaoch er a Biblia. Nglocha sebechem el oker el kmo: “A omomdasu e a ulaoch er a Biblia ngtoutang er chelechang? [Morrenges er a nger er ngii.] Ak chiliuii a ungil el tekoi el kirel tia el suobel.” E mochotii a ongedei el ker, e monguiu aike el parakurab, e momes a bades. Mluut el chiuii a ker, e moker er a uldesuel a chad er a blai. Moba tabesul uldasu el kirel a ildisel a suobel el bo mosaod el ousbech aike el ker. A uchei er a omorael e mochotii a ongingil el ker e mketmeklii a taem el sebechem el lmuut el mong e mesaod er ngii el ker. Mluut el mong e mosaod aike el bebil er a tekoi el ngar tia el suobel el mo lmuut er a omnguu a beches el babier el msang. A ta er a rolel a doruul er tiang a sebeched el oker er a chad er a blai a lsekum me ngsoal el mesuub a Biblia. E sola e dousbech er tia el suobel er a makesin el olecholt er a rolel a dosuub.
4. Ngmekera dousbech aika el suobel sel doldingel er tirke el mle semeriar el orrenges?
4 Ngdirrek el sebechem el mo ungil el ousbech er tia el beches el suobel sel moldingel er tirke el melai a makesin me a remle semeriar el orrenges. Ngsebechem el dmu el kmo: “Ngar er ngii a beches el suobel el ngar er A Ongkerongel. Me kuchotii a rolel a omousbech er ngii.” Me ngngar er a nglunguched, e kede olengit me tia el beches el suobel bo lerelleterir a rebetok el chad me “bo lodenge klemerang.”—1 Ti. 2:4.