“Ma Llemesiu Le Uaisei el Dmiich”
1. Kede oba ileakl el techall el mo meruul er a ngerang?
1 Ngomuchel er a dirk tutau el mo lmuut er a kebesengei, e a klebekelel a llomes a mera el mengebkall er a Jehovah el Dios. Me nguaisei, engdi ngngar er ngii a lmuut el ta er a bedengel a llomes el Jesus a milengemedaol er a redisaiplo er ngii el mo nguu, e tiang a “llomes ra klengar.” (Jn. 8:12) Tiaikid el llomes a kmal diak derredemelel a melai er ngii engdi kede oba ileakl el techall el mo sebeched el nguu, me ngkmal kired el mo blak a rengud el kutmeklii a ngerachel el mla moterekokl er kid. A Jesus a milengelechel el kmo: “Ma llemesiu le uaisei el dmiich er mederir ar chad” el mo uchul a klungiolir a rebebil. (Mt. 5:16) Me ngngar er a chelsel tia el milkolk el beluulechad e tia el ileakl el llomes a kmal kirel el muchais el mo er a rechad, e tiang a kmal orechudel er chelecha el taem! Me kede mekerang e mo uai a Kristus el mo dmiich er mederir a rechad?
2. Ngmilekerang a Jesus er a lolecholt er a klungel a ultutelel a berkel tia el llomes el kirel a klemerang?
2 Okiu a Berkel a Klumech: A Jesus a uluusbech a temel me a klisichel me aike el rokui el ngar er ngii er ngii el olecholt er a klemerang el mo er a rechad el ngar er a blirir, me a basio er a ureor me a bebul a rois, me a ngii di el basio el mle sebechel el metik er a rechad er ngii. Ngkmal mle ungil el medengelii a klungel a ultutelel a leberkii a llomes el kirel a klemerang. (Jn. 12:46) Ngdirrek el mlo sebechel el lmuut el merkii tia el llomes el oeak sera losisecheklterir a redisaiplo er ngii el mo “llomes ra belulechad.” (Mt. 5:14) Me ngmlo sebechir el mo ungil el rullii tia el ureor el ouchais er a klemerang el kirel a Dios el mo er a rechad er a belurir.
3. Kede mekerang e ochotii el kmo kede oba klou el omereng el saul el kirel tia el ileakl el llomes?
3 A rechedal a Dios a omes er tia el ngerachel el kmal mekreos, me ngkirir el ‘merael el ngara teletelir ar ngalek ra llomes,’ e dirrek el mo omerk er a klumech el mo er a rechad el rokui. (Efe. 5:8) A telkib el omengiuel a Biblia me a lechub aike el babilenged er a ongdibel sel dengar er a ureor me a lechub e ng skuul a kmal sebechel el mo uchul a techall el mo mesaod a Bades el mo er a rechad. Nguleak tiaikid el rolel e a ta el ngeasek el odos a mlo sebechel el omuchel a omesubel a Biblia, e dirrek el rirous a buk el mo er a 12 el ngalek er a skuul!
4. Ngera uchul me a ungil el omerelled a kirel el uldimukl er a ‘llemesed el mo dmiich’ er mederir a rechad?
4 El Okiu a Ungil el Urered: Ngsebeched el ochotii el kmo kede merael el ngar er a llomes el okiu a ungil el omerelled. (Efe. 5:9) Ngar er a ureor me a skuul me a lmuut el bebil er a basio er a buai, e a ungil el omerellel a Kristiano a meketeklii el kmo ngii a ileakl el ngodech er a rechad el mo uchul a techall er a omesodel a klemerang er a Biblia. (1 Pe. 2:12) El uaitiang, a mle ungil el omerellel a eim a rekil el buik a rirellii a sensei er ngii el mo omekedong er a rechad er a blil. Ngdilu er tir el kmo: “Ngketengek el mesang a ngalek el kmal imis el mesisiich a klaumerang er ngii e dirrek el kmal kedung!” Nguaisei, a omesiunged el mo er a Dios me a dirrek el ungil el omerelled a sebechel el ochau a osengir a rechad el mo sorir tia el “llomes er a klengar” e dirrek el mo uchul a omengebkall el mo er a Jehovah el Dios er kid.