Lak Momai er a Rengum
1. Ngera el tekoi a ousbech a blekeu, e ngera uchul?
1 Ngmla ta el momai er a rengum el omerk a klumech er a skuul e le ke medakt a bo lolenguul er kau a rechad? Ngmera el tekoi, tia el omeruul a kmal ousbech a blekeu, e ileakl a lsekum e kede sekemerur. Me ngngera el tekoi a sebechel ngosukau?
2. Ngera uchul me kede ousbech a ungil el omelilt sel domerk a klumech er a skuul?
2 Bo Mungil el Melilt: Me alta e a skuul a sebechem el omes er ngii el ua el ileakl el basio el moldingel er ngii, engdi ngdiak el belkul a kmo ngkirem el mengedecheduch er a rebek el chad el meseterir el uai sel moldingel a obliil. Bo mungil el melilt el kmo ngoingerang e ngsebechem el mengedecheduch. (Oli. 3:1, 7) A tekoi el mosaod er ngii er a chelsel a klas me a lechub a urerem er a skuul a sebechel el meskau a techall el mo olecholt a klaumerang er kau. Me a lechub a ngalek er a skuul a sebechel el oker er kau er a uchul me ngdiak omteloi a bebil el tekoi er a skuul. A rebebil el Kristiano a mla ouchais er a resensei er tir er a uchelel a skuul el kmo te Sioning er a Jehovah e mla mesterir a babier el mesaod el kirel a klaumerang er kid. A rekuk bebil a mla mechei a bebil er a babilenged er a bebul a tebelir me bo el sebechir a rengalek er a skuul el omes e bo loker a ker er tir.
3. Ngmekerang a omongetmokl er kau el mo omerk er a klumech er a skuul?
3 Bo Mungil el Kltmokl: A lsekum ke mo ungil el kutmeklau, e ngsebechel el mo ulterekokl a rengum. (1 Pe. 3:15) Me ngungil a omolasem el melebedebek a ker el sebechel el duubech, e molatk el kmo ke mekerang a omonger er ngii. (Osi. 15:28) A lsebechel, e mnguu a Biblia er kau me a bebil er a babilenged el mo er a skuul, me sel bo mousbech e ngngar er ngii. Molengit er a rechad er a blim me mdak el melasem a bebil el olechotel e ngsebechem el mesaod er a klaumerang er kau er sel temel a omengull el ongalek.
4. Ngera me ngkirem el melemolem el omerk er a klumech er a skuul?
4 Bo Moba Ungil el Uldasu: Lak momdasu el kmo tirke el omdak el ngar er a skuul a mo blechoel el melenguul er kau sel mosaod el kirel a klemerang. A rebebil a locha mo chemat er a blekengem e mo sorir el lorrenges er kau. Engdi lak bo lemechitechut a rengum a lsekum e ngdiak a chad el soal el lorrenges er kau. A Jehovah a kmal mo dmeu a rengul e le ke millasem el meruul er tia el tekoi. (Heb. 13:15, 16) Molemolem el olengit er ngii me lengesukau el mo ‘bekeu el mengedecheduch a tikingel.’ (Rel. 4:29; 2 Ti. 1:7, 8) Ka di molatk er a deurreng el bo mobang er sel taem el chad a mo kongei el lorrenges. Ngii el chad a locha sebechel el mo ta er a remesiungel a Jehovah!