A Kot el Klou a Ultutelel el Blekerdelel a Ungil el Sensei
1. Ngerang a kot el klou a ultutelel el blekerdelel a ungil el sensei?
1 Ngera el tekoi a sebechel el rullii a chad el mo ungil el sensei el olisechakl el kirel a Biblia? Ngngarbab el skuul? Ngklemedengei er ngii er a tekoi? Me a lechub e ngkuk di dechal? A mera er ngii, ngsel blekeradel el ngii a otutel a Llach, e tiang a olengchelir a redisaiplo er a Jesus, e dirrek el kot el ngarbab el ungil el blekerdelel a Jehovah. (Jn. 13:35; Gal. 5:14; 1 Jn. 4:8) Tiang a bltikerreng. A rungil el sensei a olecholt a klou el bltikerreng.
2. Ngera uchul me ngklou a ultutelel el kired el mo betik a rengud er a rechad?
2 Moubltikerreng el Mo er a Rechad: Ngike el Klou el Sensei el Jesus, a ullecholt er a klou el bltikerreng el mo er a rechad, e tia el omerellel a rirelleterir a rechad el mo sorir el lorrenges er ngii. (Lk. 5:12, 13; Jn. 13:1; 15:13) Me a lsekum kede omekerreu er a rechad, e kede ulterekokl el soad el ouchais er a klumech er a bek el techall. A omelsemai el ua rechad el diak el semeriar me a odechelakl a diak el sebechel el mengitechut er kid. Kede mo olecholt er a klemeriarreng el mo er tirke el dolisechakl er tir, e dirrek el mo kltmokl el melodech a cheldechedechad me bo el sebeched el mengelaod er tir er aike el tekoi el suebek a rengrir er ngii. Kede dirrek el kongei el mengoit a temed er sel taem el dosuub a Biblia el obengkel a chad me sel dongetmokl er kid er uchei er a bo dosuub.
3. Ngmekerang e sebechel a bltikerreng er kid el mo er a klemerang er a Biblia e ngosukid el kirel a omesiunged?
3 Bo Lebetik a Rengum er a Klemerang er a Biblia: A Jesus a dirrek el kmal mle betik a rengul er a klemerang er a Biblia e ulemes er ngii el ua mekreos el klalo. (Mt. 13:52) Me a lsekum ngbetik a rengud er a klemerang, e ngkired el semeriar el ouchais er ngii, e tiang a mo uchul e ngsebechel el omeksemeriar er a rechad el orrenges er kid. Chouaitia el rolel a bltikerreng a sebechel el ngosukid el mo melemolem el omes aike el meklou a ultutelel el tekoi el kid a ouchais el mo er a rechad er a bai di dolatk a chelitechetud. E seikid e ngmo klou a rengud e bekeu el omerk er a klumech.
4. Ngmekerang e mo sebeched el mekurulii a bltikerreng?
4 Momekeroul er a Bltikerreng: Kede mekerang e mo sebeched el mekurulii a bltikerreng er kid el mo er a rechad? Ngoeak sel doukerebai er a bltikerreng el lulechotii a Jehovah me a Ngelekel me a dirrek el sel meringel el blekeradel er a klengar el lechelebangel er ngii a rechad el ngar er a teritory er kid. (Mk. 6:34; 1 Jn. 4:10, 11) A bltkil a rengud el kirel a klemerang er a Biblia a lmuut el mukeroul el okiu sel bo lulterekokl a temel a omesubed er ngii e dolebedebek aike el dosuub. A bltikerreng a ta er a telengtengil a rodech er sel oureor el klisichel a Dios. (Gal. 5:22) Me ngsebeched el melemolem el olengit er a Jehovah el kirel a chedaol el klisichel e dirrek el lolengit er ngii me lengesukid el omekeroul er a bltikerreng. (Lk. 11:13; 1 Jn. 5:14) Me kid a kmal sebeched el mo ungil el sensei el olisechakl er a Biblia sel dolecholt er a bltikerreng el diak el oeak a ngarbab el skuled, klemednegei er kid er a klemerang, me a lechub e ngduch er kid el meruul a tekoi.