Edei el Tekoi el Mousbech el Mo Meduch el Olisechakl
1. Ngera uchul me ngkired el mo meduch el olisechakl?
1 A rokui el Kristiano el omerk er a klumech a sensei. Me sel leketenged el mengedecheduch er a chad, me a lechub e kede lmuut el mo oldingel er a chad el semeriar, me a lechub e kede mesuub a Biblia el obengkel a chad, e kede ouchais er tir a meklou a ultutelel el tekoi. E a tekoi el dolisechakl a kmal mekreos. Kede olecholt a “chedaol Llechukl” el sebechel el omekllomes er a rechad el “mor cholsobel.” (2 Ti. 3:15) Tiang a mera el ungil el techall! Aikakid a edei el tekoi el dousbech el mo meduch el olisechakl.
2. Ngmekerang a dolisechakl el ngar er a beot el rolel?
2 Beot el Rolel: Sel dungil el medengelii a suobel, e ngmo beot er kid el obes el kmo tia el suobel a mo meringel er a chad el ketengel el rongesii. Me sel mosuub a Biblia el obengkel a chad, e lak msal mesaod a betok el komakai el tekoi e bai di molisiich aike el meklou a ultutelel. A chad el blechoel el mengedecheduch a diak el belkul a kmo ngungil el olisechakl. (Osi. 10:19) Ngkmal ungil a di donguiu aike el bades el mesaod er a suobel. A uriul er a mchiuii a bades, e mosaod er a tekoi el ngar er a bades el melisiich er a subeliu. A Cheldecheduch el ngar er a Rois el llechukl er a Matteus 5 el mo er a 7 el bliongel, a ngar er ngii a meklou a ultutelel el tekoi el kirel a klemerang er a chelsel, engdi a Jesus a ullisechakl el ngar er a beot el rolel e dirrek el uluusbech a mekesai el tekoi.
3. Ngera me ngklou a ultutelel a okesiu, e ngera aike el kot el ungil?
3 Okesiu: A okesiu a sebechel el rullii a chad el mo omdasu, e melisiich er a rengul, e ngosuir el mo blechoel el melatk a tekoi. Lak momdasu el kmo ngkirem el mo meduch el chad er a cheldecheduch me bo el sebechem el ouchais a ungil el okesiu. A Jesus a mle blechoel el ousbech a beot e mekedeb el okesiu. (Mt. 7:3-5; 18:2-4) Ngdirrek el sebeched el lemuches a siasing. Me sel mungil el omdasu, e ngmo sebechem el kutmokl a ungil el okesiu.
4. Kede mekerang e mo ungil el ousbech a ker?
4 Ker: A ker a rullii a chad el mosuub el obengkel el mo omdasu. Me a leuaisei, e ngungil a bo moba kllourreng er a uriul er a omoker er a ker. A lsekum e ke di mereched el onger er a ker, e ngmo diak mungil el medengelii a uldesuel ngike el mosuub el obengkel. Me a lsekum e ngcheleuid a nger er ngii, e nglocha ungil a omngesuir el mo melemalt a uldesuel el oeak a omoker a lmuut el bebil er a ker er a bai di mouchais er a nger er ngii. (Mt. 17:24-27) Me nguaisei, engdi ngdiak a ta er kid el cherrungel. Sei a uchul me a Biblia a melisiich er kid el mo kerekikl a tekoi el dolisechakl. A bo doruul el uaisei e ngmo uchul a diak a ulebengelel el klungiaol el mei er kid me tirke el orrenges er kid.—1 Ti. 4:16.