Molai a Klubeliu er a Reprofet—Jona
1. Ngera el ungil el blekeradel a lullab a Jona?
1 Ngera ke mo omdasu er ngii sel omolatk el kirel a profet el Jona? A rebebil a omes er ngii el kmo ngdiak el mesisiich a rengul me a lechub e ngkedidai a rengul. Engdi a Jona a kmal ullecholt a klengariourreng me a blekeu e dimlak di lolatk er a di ngii. Ngmekerang e sebeched el ‘melai a klubeled’ er aika el kmal ungil el blekerdelel a Jona?—Jak. 5:10.
2. Ngmekerang e sebeched el oukerebai er a klengariourreng er a Jona?
2 Klengariourreng: Sera uchelel, e a Jona a chiliis el mo er cheroid er sel basio el mle kirel el mo er ngii. Engdi ngdiak lemechas a rengud er tiang e le a rechad er a Asiria a mirrael a chisir el kirel a kdekudel el omerellir, me sei a uchul me a Ninive a mle okedongall el “merserasech el beluu.” (Nah. 3:1-3) Me nguaisei, engdi a Jehovah a milellach er a Jona, el ngii a ulechotii a klengariourreng er a lluut el kongei er sel di mla ngerechelel el lebilsang a Dios. (Osi. 24:32; Jon. 3:1-3) Me alta ngchiliis er a kot el uchul, engdi ngmlo rullii sel soal a Dios. (Mt. 21:28-31) Me kid kede oba osisiu el blakerreng el mo omerk er a ungil chais alta kede ngmai a omellach me a lechub e ngchetituokel a basio el doldingel er ngii?
3. Ngera el telengtengil a omesiungem a kirem el ousbech a blekeu er ngii e dirrek el diak di molatk er a di kau?
3 Nguleba Blekeu e Dimlak Di Lolatk er Ngii: A Jona er a bo lodengei el kmo a tekoi el lengileltii a mle sebechel el mo uchul e tirke el chad el ngar er a diall a mad, e ngkilengei el mo mad me losobel a klengar er tirka el chad. (Jon. 1:3, 4, 12) Me sera loruul er tia el ngerechelel el ngar er a Ninive, e ngmirrael el mo er a chelsel a mats, el osiik er a ungil el basio el sebechel el mo ouchais er a kerrekerilel a Jehovah. Aikang a dimlak el blekerdelel a chad el mle medakt, e ngbai blekerdelel a chad el mle bekeu el profet er a Dios. (Jon. 3:3, 4) E kid a kuk mekerang er chelecha el taem? Kede ousbech a blekeu el mla er a Dios me bo el sebeched el omerk er a klumech alta kede chelebangel a omelsemai. (Rel. 4:29, 31) Me a leuaisei e lak dolatk er a di kid e bai dousbech a klou el temed me aike el ngar er ngii er kid el kirel a omesiunged.—Rel. 20:24.
4. Ngera me ngkired el ousbech a taem el melatk el kirel aike el ungil blekeradel el lullecholt tirke el profet er a Jehovah?
4 A bek el taem el monguiu er a cheldechedechal a ta er a reprofet er a Jehovah, e ngmo uchul a klungiolem a di lekau el melatk er kau omko ke chelebangel er a osisiu el tekoi. Di lekau el oker el kmo: ‘Ak mo mekerang omko ak chelebangel er a chouaisei el tekoi? Ngmekerang a kuukerebai aika el ungil el blekerdelel er a chelsel a klengar er ngak?’ (Heb. 6:11, 12) Aike el merael el mei el suobel el ngar er a Omesiunged el kirel a Renged a mo mesaod aike el sebeched el suub er a rebebil er a reblak a rengrir el profet er a Jehovah.