Ngtechang a Mo Semeriar er Tiang?
1. Ngera kired el melatk er ngii sel donguiu A Ongkerongel me a lechub e ng Awake!, e ngera uchul?
1 A Ongkerongel me a Awake! a meketmokl el kirir a rechad el domerk a klumech el mo er tir. Sei a uchul me a suobel el ngar er a chelsel a mesaod a kakerous el tekoi. Me sel donguiu er a babilenged, e ngungil a dolatk el mo ngtechang a mo semeriar el menguiu er ngii, e sola e nguu el mo msa ngii el chad.
2. Ngera el suobel el ngar er a magazine er kid a bo lesemeriar er ngii a rechad?
2 A beches el Ongkerongel ngmesaod a suobel el ngar er a Biblia el dirk mulsaod er ngii lobengkel a chad er a urerem? Ngar er ngii a suobel el mesaod er a klengar er a telungalek el sebechel ngosuir a ta er a rechedam? Ngar er ngii a chad el modengelii el melatk el mo mesarech er a ta er a beluu el losaod er ngii a Awake!? Ngar er ngii a ta er a magazine el ungil el kirel a bebil er a siobai me a lechub e ngobis er a kabelment el ngar er a territory er kid? El uai tiang, a magazine el mesaod aike el tekoi el lechelebangel a remechuodel a bo lesemeriar er ngii aike el obis el omekerreu er a remechuodel. Aike el blil a bulis a locha dirrek el mo semeriar er a magazine el mesaod a tekoi el kirir me a lechub e ngmekngit el omeruul.
3. Mouchais a bebil er a tekoi el dilubech el ochotii a klungel a ultutelel a dorous a magazine el mo er tirke el domdasu el kmo te mo semeriar aike el tekoi el ngar er a chelsel.
3 A Tekoi el Dilubech: A uriul er a lenguu sel suobel el “How to Raise Responsible Children” el mla er a October 2011 el Awake!, e a ta el obekel er a South Africa a ulemekedong a 25 el skuul el ngar er a territory er tir. A lluich me a eru er aike el skuul a kilengei el melai a babier e mirrous el mo er a rengalek er a skuul. A kuk ta er a obekel el ngar sel beluu a dirrek el uleba osisiu el uldasu me te rirous a babier er aike el skuul el ngar er a territory er tir. A resensei er a ta er aike el skuul a ngileltii el mo ousbech er tia el babier el olisechakl er a rengalek. Tirka el obekel a uluuchais el kirel tia el tekoi el mo er ngike el odam el oldingel a ongdibel el ngii a millisiich a bek el ongdibel el leblo er ngii me bo lorous er tia el babier er aike el skuul el ngar er a territory er tir. Ngkmal mle betok a ongit el mo er a branch obis el kirel aika el babier me ngmle kirir el lmuut el print er ngii.
4. Ngera me ngsoad el merous a magazine er kid el mo er a rebetok el chad?
4 Aika el magazine er kid a mesaod a mera el belkul a tekoi dubechang e dirrek el omekrael er kid el mo er a Biblia me a Rengedel a Dios. Chelecha el taem e ngdi ikaikid el magazine er kid a “ouchais er a klisiich.” (Isa. 52:7) Me a leuaisei, e ngsoad el mo er sel tkurrebab el sebeched el merous er ngii el mo er a rebetok el chad. A ungil el rolel a doruul er tiang a oeak sel di el kid el oker el kmo, ‘Ngtechang a mo semeriar er tiang?’