Moltirakl a Kerebai er a Reprofet—Joel
1. Kede mekerang a doltirakl er a klengariourreng er a Joel sel domerk er a klumech?
1 Ngtechang a profet el Joel? Ngdi ochotii el kmo ngii a “ngelekel a Pethuel.” (Joel 1:1) Ngika el ngariou a rengul el profet a millisiich er a klemechel a Jehovah, el diak el sel urerel el oderuchel. Me ngdi osisiu, kid a diak dosiik a odanges me a lechub a chetengakl el kired, kede bai ngmai el mo er a Jehovah me a Biblia el ngar er a omesiunged. (1 Ko. 9:16; 2 Ko. 3:5) Kede dirrek el metik a omelisiich el ngar tia el klumech el douchais er ngii. Ngera el tekoi er a ulochel a Joel a sebechel el meskid a blakerreng me a omelatk er chelechang?
2. A kmeda el sils er a Jehovah ngotbechid el mo mekerang?
2 “A Sils er a RUBAK a Kmedang.” (Joel 1:15): Me alta e aika el tekoi a milluches er a irechar, engdi kid a kiei er a taem er a ulebongel el otutel. A blekeradel er a beluulechad el di merael el mengal mo mekngit me a rechad el diak el semeriar me a omelenguul el bo dechelebangel el ngar er a territory er kid a bleketakl el ochotii el kmo aika el uriul el sils er tia el mekngit el blekeradel er a beluulechad a mla mei. (2 Ti. 3:1-5; 2 Pe. 3:3, 4) Me sel dolebedebek el kirel tia el kmal kmedang el ulebongel, e ngmeskid a ungil el uchul e kede rullii a omesiunged el mo kot er a klengar er kid.—2 Pe. 3:11, 12.
3. Ngera me a omesiunged a kmal klou a ultutelel er chelecha el lolekedang a klou el ringel?
3 A Jehovah a “Mo Mesebechakl er a Re Chedal.” (Joel 3:16): A britel el losaod er ngii tia el bades a di melutk el kirel a otutel a kerrekerilel a Jehovah er a taem er a klou el ringel. Ngmechelaod a rengud el medengei el kmo a Jehovah a mo osobelterir a reblak a rengrir el mesiungel er seikid el taem. (Och. 7:9, 14) Me sel doureor el omerk er a klumech e dolechesuar a rolel a Jehovah a lomekerreu e lolisiich er kid, e ngmeteketek a klaumerang me a ducherreng el mo ngosukid er tia el merekung el klou el ringel.
4. Ngera uchul me kede oba deurreng e ulterekokl a rengud sel domes el bedul a ngar medad el klebesei?
4 Me alta e a rebebil a mesaod er a klemechel a Joel el kmo ngklumech el kirel a chelebuul, engdi ngbai mesterir a rechedal a Dios a mengasireng el omelatk el kirel osobel. (Joel 2:32) Me a leuaisei, e bo lulterekokl a rengud sel domes el bedul a ngar medad el klebesei e leblak a rengud el omerk er a ungil chais er a Rengedel a Dios e ‘bo le blekebek a medad’ kid el chedal a Jehovah el ua losaod a Joel 2:23.