Aike el Tekoi el Dilubech

◼ Australia: A John, el ngar er ngii a skulel el chad, a mlo er a ikelesia er a lengalek engdi “ngmlo mesisiich el oumerang el kmo ngdiak a Dios.” A ta el pioneer a milsang a brochure el Was Life Created? e a kuk ta er taem e ngmilecherei a brochure el Origin of Life. Ngika el pioneer a millemolem el melisiich er sel klemeriarreng er ngii el oeak a lomsang a beches el magazine e lolecholt aike el suobel el mesaod el kirel a blebelel a Dios me a ulaoch er a Biblia. E sera lomdasu el kmo a John a mla mo sebechel el mesuub, e ngmilsang a babier el The Bible​—⁠God’s Word or Man’s? Uriul er a lechiuii, e a John a milsaod el kirel el kmo “ngdikea ksal oumededenger er a Dios.” Ngika el pioneer a milsang a Biblia Olisechakl el babier e ochotii a parakurab 8 el ngar er a 20 el llel me a parakurab 13-16 el ngar er a 23-24 el llel. Aike el bades el ngar tia el suobel a kmal chilsir a rengul a John me ngdilu el kmo, “Nglocha kirek el msang a Biblia a techall.”

◼ Mexico: A ta el chad a dilu er a odam el omerk er a klumech el kmo ngdiak loumerang el kmo a Biblia a mlukrael er a Dios. Ngika el odam a ullengit me bo el sebechel el ochotii a uchul me a Biblia a mlukrael er a Dios. Uriul er a losaod a bebil er a suobel, e aika el suobel er a Biblia a mlo ngar er ngii a lerellii er a rengul ngii el chad. Ngkmal mlo ungil a rengul er sera losuub el kirel a llechul a Dios. Ngdilu er a odam el kmo: “A kot el uchul e sera donguiu er a Biblia el terung, e ngdi ua ble el ulekrael el mla er a ta er a babier me ngdimlak a ngera el lerellii er ngak. Engdi sel donguiu er ngii er chelechang, el ileakl aike el ulekrael er ngii el kirel a tekoi er a kldung, e ngmera el ngar er ngii a lerellii er a ukltkek.”

◼ United States: Sera loruul a ileakl el odingel el ngar er a buai er a chelsel a klou el mats, e a teru el obekel a milengedecheduch er a redil er a Taiwan el uluumerang er a Dios engdi ngulemdasu el kmo a Biblia a di mo er a rechad er a Ngebard. Ngmlo er sel tebel el mla er ngii a babier er bebul e le ngulemechesiu er ngii el ua lak a ultutelel el chad alta e ngmle ungilbesul a klengar er ngii. Nguluureng el kmo ulekum a Biblia a mo ngosuir el mo metik er a moktek er a klengar er ngii. Tirke el obekel a miluchelii a omesuub el obengkel el ousbech er a Biblia Olisechakl el babier el obengkel a brochure el Lasting Peace and Happiness​—How to Find Them. Ngdimlak losuub er sel 2 el bliongel er a babier e bai milsaod er sel suobel el ngar er a brochure el dai er ngii a kmo “A Guidebook for the Blessing of All Mankind.” Uriul er a losaod aike el kot el elolem el parakurab er sel suobel, e ngika el redil a dilu el kmo ngkmal mechas a rengul er a Biblia el kmal ungil el babier a domekesiu er ngii el mo er aike el babier er a bebil er a klechelid. Me a uriul er a losuub el kirel a ulaoch er a Biblia el mla mutaut e ngdilu el kmo, “Ngdiak a ngodech el babier el ua Biblia el kmal melemalt a omesodel!”

◼ Japan: Alta e a chad er a blai a dilu er a odam el kmo ngdiak loumerang er a Dios, engdi ngii a millemolem el mo oldingel er ngii, el ouchais el kirel aike el suobel el ngar er a Awake! el dai er ngii a kmo “Was It Designed?” Cherengel a taem e ngii el chad a ngildechii a uldesuel e mocha melekoi el kmo nglocha ngar er ngii a Ulemeob. Chelechang e ngoumerang el kmo ngar er ngii a Dios, e mesuub er sel brochure el Good News From God!

◼ Canada: A ta el odos a ngilai a beches el magazine el msang a ta er a redil el tilobed er a blil el merael el mo er a mlil. E ngike el odos er a lluut el mong, e ngii el redil a dilu er ngii el kmo ngdiak el semeriar e dirrek el diak loumerang er a Dios. Ngika el odos a dimlak lemeterob el mong e bai mlo oldingel er ngii e milsang sel brochure el A Satisfying Life​—How to Attain It. Ngika el odos er a lebetik er ngii el ngar er a blil, e ngdilu er ngii el kmo ngmedengei el kmo ngdiak loumerang er a Dios, engdi ngdirrek el millatk er ngii el kmo ngar er ngii a ngelekel e di ngii el tang a omekeroul er ngii. Me ngulechotii a parakurab 6 el ngar er a 4 el llel sel brochure el mesaod el kmo kede mo metik a ungil el ulekrael er ker. E sola e millisiich er ngii me bo longuiu aike el uldasu el ngar er a 2 el suobel el kirel a ulekurulir a rengalek. Ngika el redil a kmal mlo ungil a rengul e ngiluu sel brochure.