A Ileakl el Invitation
1. Ngoingerang e ngmo omuchel a ureor er a omerusel a invitation er aika el 2014 el convention er kid?
1 A lsekum e ke mirruul er a ileakl el blengur el kirir a resechelim me a lechub a telungalek er kau, el ousbech er a klou el taem me a udoud el meruul er ngii, e ke locha kmal mo blak a rengum el mengemedaol er a rechad el mo er ngii. Me nguaisei, ngkmal klou el ureor a luluusbech er ngii el mengetmokl er a mur er a Tekingel a Dios el mo er ngii er aika el 2014 el district me a international convention er kid. Me a edei el sandei er a uchei er a temel aika el convention er kid, e ngmo er ngii a techelled el mengemedaol er a rebebil el me obengked. Ngera sebechel el ngosukid el mo blak a rengud el merous aika el invitation?
2. Ngera ngosukid el mo blak a rengud el teloi er tia el ureor el mengemedaol er a rechad?
2 Ngmo blak a rengud el teloi er tia el ureor a lsekum e kede melebedebek el kirel a klungiaol el bo dengai er a osisechakl el lomeskid a Jehovah el okiu aika el convention. (Isa. 65:13, 14) Ngdiak el kired el obes el kmo a urered er a bek el rak el mengemedaol er a rechad a ngar er ngii a leketmeklii. A rebebil er a rechad el dongemedaol er tir a me obengked er a convention. Me alta ngdiak dodengei el kmo te tela el chad a me obengked, engdi a blakerreng er kid er tia el ureor a mo odengesii a Jehovah e olecholt er a blekerurau er ngii.—Psa. 145:3, 7; Och. 22:17.
3. Ngmo ua ngerang a omerusel aika el invitation?
3 A derta el chelechad er a remechuodel a kirir el merriter er a rolel a ongdibel a bo loruul er a klou el omerusel aika el invitation, el uldimukl er a kmo kede omechei er aike el blai el diak a chad er ngii me a lechub e kede merous sel doldingel er a basio er a buai. Sel Sebadong me a Sandei e ngsebeched el merous a babier el obengkel a invitation. A lsekum e sel kot el Sebadong er a chelsel a buil a mo ruebet er a chelsel a temel tia el ureor el merous a invitation, e a omelisiich a mo kirel a omerusel aika el invitation er a bai domuchel a omesubel a Biblia. Me sel bo el merek tia el ureor, e ngkmal mo dmeu a rengud el mo medengei el kmo ngmle blak a rengud el teloi er tia el ureor e milengemedaol er a rebetok el chad el me mosisechakl er a Tekingel a Jehovah!