Dart el Rak el Domerk el Kirel a Renged!
1. A rechedal a Jehovah te millisiich er tir el mo mekerang er a bekord el dart el rak er a mla me mong?
1 “A Jesus a mengedereder el King! E kemiu a omtechei er ngii. Me chelechang e momerk, momerk, momerk a chisel a King me a rengedel.” Ngobengkel aika el mesisiich el tekoi el lullekoi a Brother Rutherford er a bekord el dart el rak er a mla me mong, e a rechedal a Jehovah a lullisiich er tir el mo omerk el kirel a klumech er a Renged el mo er a cheroid el basio. E tiakid a bla doruul er ngii! Ngdi uai tirke el Kristiano er a irechar, e kede mla merkii tia el ungil chais er a Renged el “mor a re bek el chad er a beluulchad.” (Kol. 1:23) A domes el beduluriul er aika el mereko el dart el rak, e ngera kede mla remuul el mo omerk er a Rengedel a Dios? Ngmekerang a dolemolem el omerk el kirel a Renged er chelecha el dolekedang er a 100 el rak er a lomuchel tia el Renged?
2. Ngmekerang a babilenged e melisiich er a Rengedel a Dios?
2 Momes el Beduluriul: Aika el mereko el betok el rak, e aika el babilenged a millisiich er a Rengedel a Dios. Ngulemuchel er a 1939 e a dai er sel kot el klou a ultutelel el magazine er kid a: A Ongkerongel Ouchais er a Rengedel a Jehovah. Tia el magazine a blechoel el mesaod el kirel a Renged me aike el tekoi el bo longetmokl. A Awake! el magazine a dirrek el melisiich er a Rengedel a Dios el di ta el uchul a omelatk el kirel a klechad. Me chelechang e aika el teblo el magazine a kot el betok a oidel me a omerusel er a beluulechad el rokir!—Och. 14:6.
3. Ngera bebil er a rolel el dousbech el omerk el kirel a Renged?
3 A rechedal a Jehovah a mla ousbech a kakerous el rolel el mo omerk el kirel a Renged. A irechar, e kede uluusbech a mlai el ngar er ngii a spika er ngii, razio, me a karmobol. Me aika el bebil er a rolel a mla ngosukid el mo omerk a ungil chais el mo er a rebetok el chad er a dirk lemekesai a ruumerk er a klumech er a Renged. (Psa. 19:4) Ngar er aika el mereko el rak, e kede mla otobed a kakerous el tekoi el ngar er a jw.org, el uchul me tia el klumech er a Renged a mla mo er a remiliol el chad, el uldimukl er tirke el kiei er aike el beluu el merrob er tia el ureor.
4. Ngera bebil er a ileakl el rolel el dousbech el omerk er a klumech?
4 A rechedal a Jehovah a dirrek el mla kutmokl a ileakl el rolel a lomerk er a klumech er a Renged. El ua tiang, ngulemuchel er aike el rak er a 1990, e kede millasem el menglou er a urered er a odingel obliil el oeak sel dousioning a park er a buai, me a parking lot, me a siobai. Kede dirk kiltmokl a bebil er a rolel el dousbech el omerk a klumech er a buai er aike el meklou el mats el meliuekl er a beluulechad. Nguldimukl er aikang, e a betok el ongdibel a ousioning er a belurir el ngar er a buai el ousbech a cart me a tebel el ngar er aike el basio el betok a rechad er ngii. Nguaisei, a oldingel obliil a dirk melemolem el klou a ultutelel el rolel a domerk er a klumech.—Rel. 20:20.
5. Ngera el techall a me er kid er chelecha el beches el rak er a omesiou?
5 Momes el Beduluchei: Omuchel er chelecha el beches el rak er a omesiou er a September, e a rebetok a mo omuchel el mesiou el regular pioneer. Ngsebechem el mo teloi er tir? A lak, e ngsebechem el mo auxiliary pioneer a lebebil er a buil? Me a bo el sebechem el pioneer me a lak, engdi a Jehovah a ulterekokl el mo omekngeltengat a ngii di el rolel a omelenget el moruul me bo el sebechem el teloi er a ureor el omerk el kirel a Renged.—Mal. 3:10.
6. Ngera uchul me a October 2014 a kmal ileakl el buil?
6 A October 2014 a mo me ng 100 el rak er a lomuchel a Renged. Me A Ongkerongel er seikid el buil a mesaod el kirel a Rengedel a Dios. Ngera me ngdiak bai molasem el mo merous er tia el babier el mo er a rebetok el chad? Me sel domes el beduluchei, e bo el sebechel a derta er kid el omerk el “kirel a ungil chais er a Rengedel a Dios” el mo er tirke el rokui el sorir el orrenges.—Rel. 8:12.