Uleklatk el Kirel a Ileakl el Ongdibel
Temel a Prokuram: A basio el mo er ngii a ongdibel a mengai a chesmerel er a 8:00 a.m. me a ongngak a mo omuchel er a 9:20 a.m. Ngar tia el taem, e ngkired el mo er a kingelled me bo el sebechel el omuchel a prokuram el ngar er a ungil el rolel. E a prokuram a mo merek er a bekord el 5:00 p.m.
Modengesii a Jehovah el Oba Chelitakl: A rechedal a Dios er a irechar a milengitakl a odanges el mo er a Jehovah, me a chelitakl a dirk melemolem el meklou a ultutelel el kirel a mera el omengull er chelechang. (Psa. 28:7) Me a bek el taem el omuchel a prokuram e ngmerael a ongngak er kid. Tiang a diak di el chelitakl el dorrenges er ngii e ngbai uleketmokl me ngmo sebeched el mesuub e mengull er a Jehovah. Me sel taem el ngike el odam el oungerachel a mesaod el kmo ngmochu omuchel a ongngak, e ngmla mo taem el bo dedengchokl e dekerekikl el orrenges aika el ongngak er a bai di dongedecheduch. Ngokiu tiang e kede ochotii el kmo kede mereng a sulir a rudam me a rudos el teloi er a Watchtower orchestra. E le bek el rak e ngar er ngii a eru el taem el tirka el rudam me a rudos a di tir el meleng er tir el mo er a Patterson, New York el mo olengeseu el mengetmokl aika el klebokel el chelitakl. Me a uriul er a dorrenges aika el ongngak e ngkired el rokui el mo dmak e mengitakl el oldanges er a Jehovah.
Parking: Ngar er aike el ileakl el ongdibel er kid el doungerachel a parking er ngii, e tirke el mereched el mei a sebechir el ngmai a diak locheraol el parking. Ngdi mekesai a parking, me ngungil a dedak el ngar er a osisiu el mlai. Ngdi tirke el ngar er ngii a license plate me a lechub a sticker er a mlirir el olecholt el kmo te chitechut a sebechir el park er aike el ulterekokl el parking er tir.
Kutmokl a Kingellir a Rebebil: Sel lemengai a chesmerel a basio er a bek el tutau, e lak morreched el mo melai aike el soam el kingall el ua di mongaidesachel. Bo mkerekikl el melatk er a rebebil e mkengei el mesterir a techellir me lengai a kingellir. Sel dolatk er a rebebil e ngolecholt el kmo kede mera el Kristiano e rulleterir tirke el omes er kid el mo kobkellii a Dios. (Jn. 13:34, 35; 1 Ko. 13:5; 1 Pe. 2:12) Ngdi sebeched el mengetmokl a kingellir tirke el kiei el obengked me a lechub e ngtirke el dedak el mei me a lechub e ngtirke el dosuub er a Biblia el obengterir. Ngungil a lak momechei a kloklem er a kingall el diak mousbech er ngii. A ungil el klaingeseu er kau el kirel tiang a mo uchul e ngsebechir a rebebil el mo ousbech aika el kingall. Ngar er ngii a ileakl el kingellir a remechudelang me a rechitechut. Aikang a kmal di mekesai, me ngdi sebechel a tang me a lechub e te teru el chad el olengeseu er tir el dengchokl el obengterir.
Ungilbesul el Bail: A biled er sel temel a ileakl el ongdibel a kirel el ungilbesul, el diak el uai a bilir a rechad er tia el beluulechad. (1 Ti. 2:9) Ngmo lmuut er sel temel a ulengull er a uchei me a uriul er a ongdibel, e ngsoad a biled a longebkall er a Jehovah. Ngdirrek el sebeched el ousbech a badge er kid e diak demerur el ousioning sel lebo er ngii a techelled el meruul el uaisei. Me a omengetmekled me a ungil el omerelled sel debo er aike el merael el mei el ongdibel er kid a mo olechau er a remelemalt a rengrir el chad el mo rongesii tia el klumech er a Biblia el uchul a klengar e dirrek el mo odeuir a rengul a Jehovah.—Sef. 3:17.
A Ungil el Usbeched er a Electronic Device: Sel letemel a prokuram e ngungil el dongkekerei a ngerel a dengua me aike el klekedall el uai ngii me lak dongesang er a rebebil. Me a lsekum kede ousbech a camera me a video recorder me a tablet me a lmuut el bebil e ngungil a dekerekikl me lak dongesang e dolenget a osengir a rechad. Ngdirrek el ungil a lak doluches a text me a e-mail er a temel a prokuram a lsekum ngdiak el klou a ultutelel.
Blengur er a Sueleb: Ngungil el mngai a sueleb er kau el mei me lak bo mtobed el mo omengur er a cheroid. Ngsebechem el ousbech er a kekerei el cooler el sebechel el mo er cheungel a kingall. A meklou el cooler me a ngii di el obebeu el klalo a diak el kired el ousbech er tia el basio.
Tenget: Ngsebeched el ochotii a omereng el saul er kid el kirel a oketmeklel tia el ongdibel el oeak a tengetenged el mo er a ureor er a beluulechad el rokir. A lsekum e ke melenget el ousbech er a check e ngkirem el luchesii el mo er a “Watch Tower.”
Kar: A lsekum e ngngar er ngii a kerum, e mngai a ungil el ildisel e le ngdiak a kar er tia el basio el mo er ngii a ongdibel. A orus el lousbech tirke el smecher el sukal a diak el kirel mechoit er a blil a komi er tia el basio me a lechub a hotel el mkiei er ngii.
Tekoi el Kired el Mo Kerekikl er Ngii: Bo mkerekikl me lak mtorech el metemall. A bek el rak e a rechad a blechoel el metemall el oecherir a uchul, el ileakl sel loureacher a mekemanget a btil el oeacher. Sei a uchul me ngungil a doureacher a ungilbesul el oeacher el sebechel el ngosukid me ngdiak demekesakl a dorael er a mekedidai el basio, me a terebel, me a tkul a dobu.
Mekngit a Oderngesir: A lsekum a prokuram a mo motobed er a FM radio frequency, e ngkirem el nguu a kekerei el razio er kau el obengkel a earphone me bo el sebechem el orrenges a prokuram.
Baby Stroller me a Lawn Chair: Ngdiak dolab a baby stroller me a lawn chair el mo er a basio el mo er ngii a ongdibel. Engdi a kingellir a rengalek a sebeched el olab el mong a lsekum e ngar er ngii a kingall el sebechir el ousbech el kmeed er a demerir me a derrir.
Kosui: Oumesingd er aika el ongdibel a ngar er a basio el di chelsimer el ousbech a air condition. Me ngolechotel a bltikerreng a lsekum e kede olengeasek a usbechel a mesisiich a bul el kosui e le ngsebechel el ngar er ngii a letemellii er a rechad el ngul me a lechub e ngsecher el uai ngii.—1 Ko. 10:24.
Please Follow Up (S-43) el Babier: Sel Please Follow Up el babier a dousbech er ngii el meluches a tekoi el kirir a rechad el ullecholt a klemeriarreng er a dousioning el mo er tir er a temel a ulengull. Sel mketmeklii tia el babier e mnguu el mo er a Book Room me a lechub e ke nguu el msa melechesel a ongdibel er kau.
Blil a Blengur: Mongebkall er a ngklel a Jehovah el oeak a ungil el omerellem sel omngar er a blil a blengur. Moubail a ungilbesul bail el ochotii el kmo ke Kristiano. E becherei a tip a lsekum e ngsiukang er a beluu.
Hotel:
Ngdiak el kired el reserve a betok el room el medeel er aike el dousbech, e diak el kirel el mo engelakl a ildisir a rechad el kirir el ngar er a chelsel aike el room.
Ngsebechem el cancel a reservation a lsekum e ngduubech a bkaischemrungel el tekoi, engdi ngkirem el mereched el mesubed er a hotel me bo el sebechir el ngmai a room el mesterir a rebebil. (Mt. 5:37) A lsekum e ngkirem el cancel er a reservation er kau, e lak mobes er a cancellation number er kau. Ngkirem el mereched el rullii tiang el kesengil e 2 el klebesei er a uchei er sel temem el mong, e le lak e ngmo diak el sebechem el lmuut el ngmai a ududem.
A lsekum e kede ousbech a debit me a lechub a credit card sel de check in er a hotel, e ngblechoel a hotel el orreked a ududed me bo el sebechel el harau a room er kid, me a ngii di el telemall me a lmuut el bebil. Me ngkired el mengiil el sesei el klebesei e mochu sebeched el ousbech a ududed.
Mnguu a luggage cart a lsekum e kom ousbech er ngii, e mereched el olutii me bo el sebechir a rebebil el ousbech er ngii.
A lsekum e ngsiukang er a beluu, e ngsebechiu el tip er tirke el chad el oureor er a hotel sel longider a torangk er kemiu, e dirrek el sebechiu el tip er tirke el mengetmokl a room.
Ngdi sebechiu el meruul a kall er a room a lsekum e te kongei.
Bo letabesul a usbechem er aike el lomeskau a hotel el di tada, el uldimukl er a kall, me a kohi, me a ice.
Ngkired el bek el taem el ungil a blekerdeled el mo er tirke el oureor er a hotel. Tirkang a meringel el oureor el oungerachel er a rebetok el okiak me ngungil a rengrir sel dolecholt a blekokeuii, kllourreng, me a tabesul el blekeradel.
A ruungalek a kirir el mo kerekikl el omtebechel er a rengelekir er a bek el taem el lengar er a hotel, elevator, swimming pool, lobby, exercise room me a kuk bebil el basio.
A cheral a room er a ta el sils el mocholt er sel Recommended Lodging List a diak luldimukl er a tax. A lsekum e te overcharge er kau, e lak mongkad er ngii e mereched el mo ouchais er a Rooming Department.
A lsekum e ngmo er ngii a mondai el kirel a room er kau, e mouchais er a Rooming Department er sel basio el mo er ngii a ongdibel me bo el sebechir el ngosukau.
Tirke el Sorir el Olengeseu: A ngii di el chad el soal el olengeseu er tia el ongdibel a kirel el mo er sel Volunteer Service Department. A rengalek el ngariou a rekrir er a 16 a dirrek el sebechir el olengeseu el oeak a loureor el obengterir a redemerir me a lechub a rederrir, guardian er tir, me a lechub e ngchad el lekengei er ngii a rechad er a blil el loungerachel er ngii.