Mngesuterir a Remeiko el Mo Mesuub el Kirel a Jehovah

1. Ngmilekerang a Jesus e olecholt a klechubechub el mo er a remeiko?

¹ Uchei er a kodellel a Jesus er a lorael el tuobed er a mats er a Jeriko, e a reteru el meiko a uleldiu el kmo: “Bo mchebkemam, e Rubang!” Me alta Jesus a millatk el kirel aike el meringel el mondai el bo lechelebangel, engdi ngmlo stob, e ulemekedong er tirka el chad el mei er ngii, e ulemekungil er tir. (Mt. 20:29-34) Ngmekerang a doukerebai er a Jesus el olecholt a klechubechub el mo er a remeiko?

2. Ngmekerang a dousioning el mo er a chad el meiko sel debetik er ngii er a buai?

² Molengeseu er Ngii: A lsekum e ke metik er a meiko el chad, el ngar er a buai, e mouchais er a ngklem e moker er ngii el kmo ngousbech a ngeso. A rechad a blechoel el mekngit a blekerdelir el mo er a remeiko, me ngii el chad a locha mo ngodech a uldesuel. Engdi a ungil el blekerdelem me a klemeriarreng er kau a sebechel cholleklii a rengul. E lak mobes el kmo a remeiko a kakerous a lousbech me tiang a mo oterekeklii a klungel a ngeso el momesterir. A uriul er a omngesuir, e ngsebechem el ouchais er ngii el kmo ke teloi er a ureor er a osisecheklel a Biblia. Ngsebechem el chiuii a ta er a bades el ua Psalm 146:8 me a lechub e ng Isaia 35:5, 6. A lsekum e ngsebechel el menguiu a Braille, e moker er ngii a lsekum e ngsoal a ta er a babilenged el ngar er a Braille el mo ngosuir el mesuub a lmuut el betok el kirel a Biblia. Ngdirrek el sebechem el ngosuir el melai a audio files er a jw.org. E a lsekum a computer er ngii a ngar er ngii a prokuram el menguiu a llechukl er a screen el klou a ngerel, e nglocha mo soal aike el mla motobed el suobel el ngar er a jw.org me aike el babier el sebeched el download el ngar er a RTF (Rich Text Format).​—Momes er a baks el “Sel Molengeseu er a Meiko el Chad . . . ”

3. Ngmekerang a dosiik er a remeiko er a basio el domerk er a klumech er ngii?

³ Mosiik er a Remeiko: Ngdiak deblechoel el metik er a remeiko sel doldingel a obliil e le rebetok er tir a diak el sal sorir el mengedecheduch er a rengodech el chad el mo er a blirir. Sei a uchul, me ngkired el mo blak a rengud el ‘osiik’ er a reuaisei el chad me bo el sebeched el ousioning el mo er tir. (Mt. 10:11) Ngar er ngii a chad el moureor el obengkel me a lechub e kom dmak el ngar er a skuul el meiko? Momuchel el mo mengedecheduch er ngii. A lsekum e ngar er ngii a skulir a remeiko er a basio el momerk er a klumech er ngii, e besterir a bebil er a babilenged el ngar er a Braille el mo er a library er tir. Kau ke medengelii a chad el ngar er ngii a chedal el meiko? Ngar er ngii a cheldebechel el olengeseu er a remeiko me a lechub e ngblai el lekiei er ngii a remeiko el ngar er a basio el momerk er a klumech er ngii? Mouchais er a chedal a telungalek, receptionist me a lechub e ng director el kmo a Resioning er a Jehovah a kmal sorir el olengeseu er a remeiko, e besterir a babier me a lechub a audio recordings el ngar er a Braille. Mochotii er ngii a telbiil el ngar er a Biblia el kmo ngdi kmedung e a Dios a mo rulleterir a rechad el mo diak el meiko el mo cherechar. Nglocha dirrek el mo soam el ochotii sel video er a jw.org el dai er ngii a kmo “Without It, I Would Feel Lost,” el ouchais er a tekoi el dilubech el mo er a ta el meiko el chad el mla ngmai a klungiolel e le ngmilsuub a Biblia el ngar er a Braille. Sel mosaod er a uchul me ke oldingel er ngii, e tiang a mo uchul me ngmo sebechem el mengedecheduch er a remeiko el chad.

4. Ngera sebeched el suubii er a tekoi el dilubech el mo er a Janet?

⁴ A ta el meiko el odos el Janet a ngklel a mlo oldingel er a blirir a remeiko. Ngulemuchel el mengedecheduch er a ta el kekerei el redil. A Janet a dilu er ngii el kmo, “A Jesus a ulemekungil er a remeiko el olecholt er aike el bo loruul el kirir a rokui el meiko el chad.” Te dilak el mesaod er a Ocholt 21:3, 4 e a Janet a milsaod el kmo tia el telbiil a mo meketmokl el okiu a Rengedel a Dios. Ngii el redil a mlo lmuk e dilu el kmo: “Ngdirkak a ta el krengesii a meiko el chad el mesaod aika el tekoi. A ruumesingd el chad el sebechir el omes a oumerang el kmo a rechad a meiko e le ngtekoi el lurruul me a lechub e ngmirruul a rechederir er a irechar a uchul.” A Janet a mle e-mail er a link er a Biblia Olisechakl el babier el mo er ngii e chelechang e te mesuub er a Biblia el eru el taem er a ta el sandei.

5. Alta ngdiak el sebeched el omekungil er a remeiko el ua Jesus, engdi ngera el klengeltengat a bo dengai e le kid el olecholt a klemeriarreng er kid er tir?

⁵ Nguaisei el diak el sebeched el rulleterir a rechad el mo diak el meiko el ua Jesus, engdi ngsebeched el ngosuterir a rokui el chad el cheldeng a rengrir el chelid er tia el beluulechad a uchul, el uldimukl er tirke el mera el meiko, el mo medengelii a klemerang er a Tekingel a Dios. (2 Ko. 4:4) A Jesus a ulemekungil er tirke el teru el chad el mla er a bita er a Jeriko e le ngmle “chubteterir.” (Mt. 20:34) A lsekum e kede olecholt a osisiu el klemeriarreng el mo er a remeiko, e ngsebeched el mo oldeu a rengud er a techall el mo ngosuterir a rebebil el mo mesuub el kirel a Jehovah, el ngike el mo rulleterir a rechad el mo diak el meiko el mo cherechar.