Mesuub er a Re Publisher el Ngar er Ngii a Duch er Tir

Kede kmal oba omereng el saul el kirir a rengar er ngii a duch er tir el publisher el ngar er a ongdibel er kid. A rebebil er tir a mla mesiou er a Jehovah el betok el rak. E a rekuk bebil a dirk mlo mesiou er a Jehovah. Tirka el publisher a mla mesa rolel a Jesus a lomekrael er a ongdibel er a Rekristiano er a chelsel aika el uriul sils el oeak sel longlou er a ureor er a berkel a klumech me a omeruul el disaiplo. (Mt. 28:19, 20) Me sel loruul er a omesiungir, e te nguu a “klou el klisiich” sel bo el chelebangel a omelsemai me a ringel. (2 Ko. 4:7) Ngkmal betok a sebeched el suub er tirka el ngar er ngii a duch er tir el publisher. Sel bo er ngii a techellir, e te melechesuar er a deurreng sel lolisechakl er a rebebil aike el bla lesuub. (Psa. 71:18) Sei a uchul me ngkired el osiik a techall el mo mesuub er tir. Ngmekerang a doruul er tiang?

Ngar er a Omesiunged. A rebeches me a lechub tirke el diak a kmal duch er tir el publisher a ousbech a osisechakl me bo el sebechir el mo ungil er a omesiungir. Ngkmal betok a sebeched el suub sel domes er tirke el ngar er ngii a duch er tir el publisher el meruul er a omesiungir. (Momes er a February 1, 2015, el Ongkerongel, “Molemolem er a Blakerreng er Kau er a Berkel a Klumech,” er a ongedei el parakurab er cheungel sel suobel el “Molengeseu er a Rebeches el Publisher.”) Ngera el klungiaol a bla mngai e le kau el oureor el obengterir a chouaitirka el chad er a omesiungem?

Ngsebechem el olengit er a ta er a ngar er ngii a duch er ngii el publisher me bo loureor el obengkem el oldingel a obliil? A lsekum ngii el publisher a chitechut, e nglocha sebechem el nguu a chad el mosuub a Biblia el obengkel el mo er a blil ngika el publisher e mesuub. E a uriul, e mkerir a uldesuel ngii el publisher el kirel tia el dirk mlo merek el omesubiu.

Mchoit a Taem el Obengterir: Bo modengelterir a rengar er ngii a duch er tir el publisher el oeak sel mongoit a taem el obengterir. Molengit er a ta er tir me lobengkemiu er a temel a omengull el telungalek e moker a ker er ngii. A lsekum ngii el publisher a chitechut, e ngsebechem el sikii a ungil taem e mo er a blil e moruul er a omengull el telungalek er kemiu. Moker er ngii el kmo ngmilekerang e ngmlo medengelii a klemerang. Ngera el klengeltengat a luleldeu a rengul er ngii? Ngua ngera el ngelsecheklel a ureor a bla lesang er a beluad? Ngera el deurreng a blo lolechesuar e le ngii el mesiou er a Jehovah?

Moba sekutaberreng e bo el tabesul a osengem el kirel aike el sebechir el remuul el mo ngosukau. A remeketeketang el publisher a di uai kid el kakerous a duch er tir er a omesiou. (Rom 12:6-8) A rebebil a mechudelang me ngdi telkael a temir el sebechir el obengked. Engdi ngkmal sebeched el suub a betok er tir e le te meketeketang el mesiou er a Jehovah el oba blakerreng.