Bo Mungil Ousbech Aika el Suobel er a Biblia Olisechakl el Babier
A chad el mesuub er a Biblia sel losuub aike el mera el osisecheklel a Biblia e bo loltaut er a chelsel a klengar er ngii, e ngdi merael el mo ungil a blekerdelel. (Psa. 1:1-3) Ngsebeched el ngosuterir tirke el dosuub a Biblia el obengterir el mo olengeriakl er a omesubir el oeak sel dungil el ousbech aike el suobel er a Biblia Olisechakl el babier.
Aike el Ker el Ngar er a Uchelel: A bek el bliongel a ngar er ngii a ker er a uchelel el mo monger er a chelsel a suobel. Ngsebechem el oker er a chad el omdak el mesuub a Biblia aika el ker el mo omeksemeriar er ngii er a suobel el bo mosuub er ngii. Me a lechub e ngsebechem el olengit er ngii el mo ouchais er a uldesuel el kirel a derta er aike el ker. A lsekum e ngmelekoi er a cheleuid el uldasu, e ngdiak el kirem el mereched el sumecheklii a uldesuel er seikid el taem. A nger er ngii a mo ngosukau el mo medengei el kmo ngera el tekoi a kirem el mo melisiich er ngii.—Osi. 16:23; 18:13.
Bebil er a Omesodel: A lsekum ngike el omdak el mesuub a Biblia el lobengkel a mla mo ungil medengei aike el tekoi el mulsaod er a suobel, e ngsebechem el melisiich er ngii el mo omes er sel Bebil er a Omesodel el kirel seikid el suobel. Me sel ongingil el omesubiu, e ngsebechem el chemoit a sesei el bung el mo mesaod er a bebil er a omesodel me bo modengei el kmo ngmlo ungil medengelii me a lechub e ngdiak. Engdi a lsekum e ke mesa el kmo ngmo uchul a klungiolel a omosaod er sel Bebil er a Omesodel, e ngkirem el chemoit a taem er a omesubiu el mo mesaod er ngii el obengkel. Me a lechub e ko mesaod er a telkib er ngii el oeak sel monguiu a parakurab e moker er ngii a ker el kau a kiltmokl er a uchei.
Aike el Lolisechakl a Biblia: Sel baks el kirel aike el lolisechakl a Biblia el ngar er a ulebengelel a bek el bliongel a ngar er ngii a tekoi el onger er aike el ker el ngar er a uchelel. Ngsebechem el ousbech er tia el baks el mo oterekeklii el kmo a chad el mosuub el obengkel a kmal ungil medengei a tekoi el mulsuub e sebechel el smaod aike el meklou a ultutelel el tekoi. Mdak el terung e monguiu aike el tekoi me aike el bades el ngar cheungel sel Aike el Lolisechakl a Biblia. E sola e molengit er ngii el mo ousbech aike el bades el mo smodii el kmo ngera uchul me ngklemerang.—Rel. 17:2, 3.