Ungil Klengar el Mesiou er a Jehovah

MUKEROUL ER A TELUNGALEK EL DIAK EL TANG A KLAUMERANG

Ak mlechell er a 1934 el mora rechad er a Switzerland el millukl el mora Timmins el beluu er a Ontario, Canada el mla er ngii omengiis er ngii. Ngar er a bekord el 1939 e a delak ulemuchel el menguiu a Watchtower el magazine e ngar er a miting er a Resioning er a Jehovah. Ngulebekak ngak me a retelolem el bebil er ngak. Ngdi mle telkib e ngmo ta er a Sioning er a Jehovah.

A demak a kmal dimlak el deu a rengul, engdi delak a kmal mle betik a rengul er a klemerang e rirellii er a rengul el mo melemolem el loba blakerreng. Ngmillemolem el loba blakerreng er a uchelel aike el rak er a 1940 el lulerrob er a urered er a Canada. E millemolem lolecholt er omengull el mora demak e ungil er ngii alta ngkmal mle mekngit a tekoi el lullekoi er ngii. Ungil kerebai er ngii a ngilsukak ngak me a rebebil er ngak el mo kongei er a klemerang. Ngkmal mlo dmeu a rengmam er a lemengodech el mo ungil omerellel a demak el mei er kemam.

OMUCHEL ER A MUI EL TAEM EL OMESIOU

A August 1950 e ak mlora Theocracy’s Increase Assembly el mla er ngii er a New York City. Ak mle meet er a rudam me a rudos el meliuekl er a beluulechad el rokir e rirenges a interview er a redirk tilobed er a skuul er a Gilead e tia rirellak el mo soak el lmuut meruul a betok er a omesiungek el mora Jehovah! Ngkmal mirruul a renguk el mo soiseb er a mui el taem el omesiou. Me ak kmal di mlo remei e apply el mo regular pioneer. A branch office er a Canada milluches el mei er ngak el melekoi el kmo nglocha ungil ak metecholb el kot. Me ak miltecholb er a October 1, 1950. Ta el buil er uriul e ak mlo regular pioneer e ngiluu a assignment er ngak el mora Kapuskasing, el kekerei el basio el ngar ngii a delengchokl er ngii el dimlak lecheroid er a blimam.

A 1951 e a branch office a ullengit er a Resioning el sebechir el melekoi tekoi er a France me lolatk a melukl el mora ike el delengchokl er a Quebec el melekoi a French. Tia el beluu a kmal uluusbech a ngeso. Ak mlukeroul el melekoi tekoi er a Merikel me a French me ak kilengei er ongit el mora er a Rouyn. Ngdimlak kudengelii a ngii di el chad er tiang. Ngua kulsaod er a uchelel, ak di uleba address. Engdi rokui el tekoi a di mlo ungilbesul. Ngak me a Marcel a mlo ungil el friends e kmal mle dmeu a renguk el mesiou el ngar er a Quebec el eua el rak, el uriul e ak mlo special pioneer.

GILEAD ME A OMELATK EL MILTEMALL

Ngkmal mlo dmeu renguk el nguu a invitation el mora 26 el klas er a Gilead el mla er ngii er a South Lansing, New York. Me a omelilt a mlo er ngii er a February 12, 1956, e te mle assign er ngak el mora beluu el dodengelii er chelechang el kmo ng Ghana,b West Africa. Engdi ngmle kirek el lmuut el mora Canada e mengiil a babier el kuusbech el mo melukl el mora Ghana. Mle renguk ak di mora Canada el eru me a lechub e ngedei el sandei.

Ak milengiil aika el babier er a Toronto el euid el buil. Tiakid el taem e a telungalek er a Cripps a kilengei er ngak me a kkiei el lobengterir me ak mlo medengelii a ngelekir el redil er a Sheila. Aki mle fall in love. Me a leko kmelekoi a tekingek er a chebechiil e ngsoiseb a visa er ngak. Me ngak me a Sheila a milluluuch el kirel, e millilt el kmo ak mo merael el mora assignment er ngak. Engdi aki millemolem el keluches e mengiil er a ungil taem el ki bo bechiil er a ngar medad el klebesei. Tia dimlak el beot, engdi uriul aki mlo mtebengii el kmo tiakid a mle melemalt el omelilt.

Uriul er a ta el buil el kngar omerael loeak train, diall, me a skoki e ak mlora Accra, Ghana. Te mle assign er ngak el mo district overseer. A mle uldimukl er a ngerechelek a omais er a beluu er a Ghana el rokir e dirrek el mora Ivory Coast (chelechang e ng Côte d’Ivoire) me a Togoland (chelechang e ng Togo), el beluu el kmeed er a Ghana. Oumesingd el taem e ngdi ngak el tang el merael el ngar er a mlai el lebilskak a branch. Ngkmal mle ungil a renguk el meruul er tiang!

Me sel le weekend e ngngar ngii a assignment er ngak er aike el circuit assembly el mla er ngii. Ngdimlak a Assembly Hall me a rudam a di uluusbech a bamboo me a llel a kerrekar el meruul er a omderungel er a sils el sebeched el kldibel er cheungel. Ngdirrek el dimlak a icebox er a uum me ngmla er ngii a charm el dirk chad el lomekoad e meruul el mo kall lomekang er a rechad.

Ngmle betok omosiroi el tekoi el dilubech er aika el assembly. A ta el taem e a Herb Jennings,c el dirrek el ta er a missionari a uleltobed er a cheldecheduch e ngchemiis a ta er a kerbou. Ngrirurt el mei er a delongelel a stage me a rechad. Me a Herb a stob el mengedecheduch e ngii el kerbou omes el kmal rrau a rengul. A reteua el mesisiich el odam a mle sebechir el mdechemii e kiderii el mora uum, me a rechad a mle oieng.

Sel lekot lureor el mo ongeim el ureor e a kullecholt er a movie el The New World Society in Action er aike el kmeed el delengchokl. A kullecholt er a movie lousbech er a becheleleu el mamed el klechetii er a delongelel a teblo el tang me a lechub e ngteblo el kerrekar. A rechad a kmal mle sorir! Tia mle kot el movie el lulsang a ruumesingd er tir. Ngkmal mle klou a ngerel a brotech sel lebo lolecholt er a rechad el metecholb. Tia el movie a kmal ngilsuterir tirke el milsang el mo mesa el kmo, a Resioning er a Jehovah el meliuekl er a beluulechad el rokir a tang.

Uriul er a bekord el eru el rak el kngar er a Africa e ngkmal mle dmeu a renguk el mora international convention el mla er ngii er a New York City er a 1958. Ngkmal mle dmeu a renguk el mesa Sheila el ngii a mla er a Quebec el mei el milsiou el special pioneer. Aki dirk mle keluches engdi chelecha el bla ki mluut el kasoues e a kullengit a chebechiil er ngii me ngkilengei. Ak milluches el mora Brother Knorrd lolengit el kmo ngsebechel a Sheila el mora Gilead e a uriul e ngmei e obengkek el ngar er a Africa. Me ngkilengei. Me a Sheila a mlei er a Ghana me aki mlo bechiil er a Accra er a October 3, 1959. Aki mle feel el kmo a Jehovah kmal ulemekngeltengat er kemam el ngiluu el mo kot er a klengar er kemam.

DMAK EL MESIOU EL NGAR ER A CAMEROON

A 1961 e te mle assign er kemam el mora beluu er a Cameroon. Ak kmal mle mechesang le te ullengit er ngak el mo kutmeklii a beches el branch office er tiang. Ngak el mlukngerachel el mo omekerreu er a ureor er a Cameroon a kmal mle betok a kirek el mesuub. E a bo el 1965 e aki metik el kmo a Sheila a dioll. Aki uluusbech er a taem el mo smau er tia el chais. Engdi sera ki bocha msemeriar el kirel e melib er a omerollam el lmuut el mora Canada e ngii a duubech a kmal mekngit el tekoi.

A Sheila milengai. A toktang uluuchais el kmo ngmle sechal a ngelekam. Tia mle betok er a 50 el rak er a mla me mong engdi ngkmal dirkak ki mobes er ngii. Alta ngkmal mlo mekngit a rengmam engdi aki di millemolem el ngar er a assignment er kemam, el kmal somam el tekoi.

A rudam er a Cameroon a mle blechoel el mo modechelakl e le tir el diak lekengei el mo omekbitang er a tekoi er a balatiks. Ngtokubets el kmal mo meringel a blekeradel sel lebo er ngii a sengkio. A May 13, 1970 e ngtilaut a tekoi el ki ble medakt el kmo ngmo el duubech. Te mlo merrob er a urered a Resioning er a Jehovah. Tia el klebokel el branch el kmal dirk ki msiliseb er ngii er a eim el buil er uchei a lengiluu a kabelment. Ngdi mle chelsel a ta el sandei e a rokui el missionari el luldimukl er ngak me a Sheila a mlodik er a beluu. Ngkmal mle meringel er kemam a merael e mengoit er a rudam me a rudos e le ngkmal mle betik a rengmam er tir e bekikl el kirel a tekoi el bo lechebangel.

Ngmle elolem el buil el ki mkiei er a branch office er a France. Ngar itiang e ak mirruul aike el rokui el sebechek lolengeseu er a rudam er a Cameroon er aike el lousbech. A December er tia el osisiu el rak e te mle assign er kemam el mora branch er a Nigeria el ngii a mlo oungerachel er a ureor er a Cameroon. A rudam me a rudos er a Nigeria a kmal uluuetkeu er kemam, e kmal mle dmeu a rengmam el mesiou er ngar tiang el sesei el rak.

MERINGEL EL OMELILT

A 1973 e ngmlo kiram el meruul er a kmal klou a ultutelel el omelilt. A Sheila mle chuarm er a bebil loberaod el secherel a bedengel. Sera ki bora convention el mla er ngii er a New York e nglilangel e ouchais er ngak el kmo: “Ngdikea el sebechek el melemolem! Ngoumesingd el taem el di lemesaul a bedengek e smecher.” Ngika mla mo 14 el rak el losiou lobengkek er a West Africa. Ak mle chemat er ngii er a blakerreng er ngii engdi chelechang aki ousbech el meruul a bebil el omelodech. Uriul er aki mosaod er a blekeradel e ki meringel el meluluuch el kirel, e aki millilt el lmuut el mora Canada me lsebechel mo ungil lomekerreu er a health er ngii. Chitel a assignment er kemam el missionari me a mui el taem el omesiou a sel kot el meringel el omelilt el mle kiram el meruul er ngii.

Sera ki bora Canada e ak miltik a ureor lobengkel a kmal meketeketa el sechelik el lulerrurt er a car dealership el mlara diluches er a Toronto. Aki mle rent er a apartment, milechar a used el furniture, e mle sebecham el melukl e diak ki bo mblals. Ngmle somam lomekbeot er a klengar er kemam, lomeltkam a kmo a ta er a klebesei e ngsebecham el lmuut el mora mui el taem el omesiou. Ngmle mechas a rengmam le ngkmal di mle mereched er sel taem el ki mulemdasu er ngii e aki lmuut el soiseb er a mui el taem.

A kulemuchel el volunteer sel Sebadong el teloi er a ureor el omekedechor er a beches el Assembly Hall el ngar er a Norval, Ontario. Cherengel a taem e te mle assign er ngak el mo omekerreu er tia el Assembly Hall. A health er a Sheila a ulengeriakl me aki mlo feel el kmo ngsebechel el meruul er tia el beches el assignment. Me aki millukl el mo kiei er a apartment er tia el Assembly Hall er a June er a 1974. Ngkmal mle dmeu a rengmam el liluut el mora mui el taem el omesiou!

Aki uleba omereng el saul e le ngmillemolem el improve a health er a Sheila. Eru el rak er uriul e ngmlo sebecham el kongei er a assignment el mo oldingel ongdibel. A assignment er kemam aike el ongdibel el ngar er a Manitoba el beluu er a Canada lodengelii a rechad el kmo ngkmal telemall er a snow. Me nguaisei engdi ngkmal mle dmeu a rengmam er a mekeald el deleuill el lobengterir a rudam me a rudos er tiang. Aki silubii el kmo ngdiak el klou a ultutelel a basio el mosiou er ngii e ngbai sel dolemolem el mesiou er a Jehovah er a ngii di el basio el dengar ngii.

SUUBII A KLOU A ULTUTELEL EL TEKOI

Uriul er a sesei el rak el ki mosiou el loldingel ongdibel e te mle invite er kemam el mo mesiou el ngar er a Canada Bethel er a 1978. Kedeb el taem er uriul e ak silubii a meringel engdi ngkmal klou a ultutelel el tekoi. Te mle assign er ngak el mo oltobed er ta el sikang me a tedobech el cheldecheduch el tekoi er a French er a ileakl el miting el mla er ngii er a Montreal. Ngklengiterreng e le ngmle meringel er a rechad a melemolem el semeriar er a cheldecheduch, me a ta er a odam er a Service Department a milsmechokl er ngak. Ngmle kirek el mtebengii er seikid el taem a tekoi el bla bo kudengelii er chelechang. Ngak a diak meduch el loltobed a cheldecheduch. Me nguaisei ngdimlak kungil nguu omesmechokl er ngii. Ngdimlak bo lungil tia el cheldechedechemam, e dimlak lungil a renguk e le kmle feel el kmo ngkmal mle mesisiich a tekingel me ngii a dimlak a kora lechat er ngak el kirel. Ak mlo mekngit lengak el uluukerrekeriil er a rolel ak ngiluu omesmechokl me a chad el milsmechokl er ngak.

Sesei el klebesei el uriul e a ta er a chedal a Branch Committee a milengedecheduch er ngak el kirel. Ak kilengei el kmo ngdimlak lungil omerellek el bedul a omesmechokl el kngiluu ak dirrek el dilu el kmo ngkmal ouuchel a renguk el kirel. Uriul e ak milengedecheduch er ngii el odam el milsmechokl er ngak. Ngulechotii a klechubechub e kongei lousubes er ngak. Tia el experience a ulsisecheklak er a klungel a ultutelel a bo lengariou a rengud, e kmal diak kubes er ngii. (Osi. 16:18) Ak mla meluluuch el betok el taem el mora Jehovah el kirel, e mla rullii er a renguk el diak kluut el mo omes omesmechokl er a mekngit el rolel.

Ngmla mo betok er a 40 el rak el kusiou er a Canada Bethel, e sera 1985 el mei e a kuba ileakl techall el mesiou el chedal a Branch Committee. A February 2021 e a betik er a renguk el Sheila a mlo mechiuaiu er a kodall. Ak kmal miss er ngii. Ak dirrek el outekangel a secherel a bedengek. Engdi omesiungek el mora Jehovah a uchul me ak mechesang e dmeu a renguk me “ngdiak kutab a ildisel a sils el lengelakl.” (Oli. 5:​20, NW) Alta ngngar ngii a ringel el bla bo kchebangel er a klengar er ngak, a deurreng el kulab a lmuut el ngaruchei er ngii. Ngkmal dmeu a renguk el mla nguu a Jehovah el mo kot er a klengar er ngak e mla oldeu er a renguk er a 70 el rak el kusiou er ngii el mui el taem. Nglunguchek el kmo a remekekerei el odam me a odos lolemolem el nguu a Jehovah el mo kot er a klengar er tir el dirrek, e le ngkmal ulterekokl a renguk el kmo a deurreng e ungil klengar a di sebechel mo er ngii a dosiou er a Jehovah.